Ձեր վստահելի աղբյուրը

Ադրբեջանի Ազգային ճակատ կուսակցությունը կազմակերպել է համացանցային արշավ՝ ի պաշտպանություն ադրբեջանցի հայտնի իրավապաշտպան, քաղբանտարկյալ Լեյլա Յունուսի: Այս մասին հաղորդում է ադրբեջանական «Ազադլիգ» թերթը՝ նշելով, որ կուսակցությունը Ֆեյսբուք սոցիալական ցանցի շատ էջերում հրապարակել է հեշթեգերով լուսանկարներ՝ կոչ անելով Ադրբեջանի իշխանությունների առջև բարձրացնել ինչպես Լեյլա Յունուսի, այնպես էլ մյուս քաղբանտարկյալների ազատման հարցը:

Ինչպես ասվում է նյութում, Ադրբեջանի Ազգային ճակատ կուսակցության հայտարարության մեջ ընդծված է, որ արդեն հնարավոր չէ լսել և կարդալ «երկրի իշխանությունների մոտ գերության մեջ գտնվող» ադրբեջանցի իրավապաշտպանի՝ հիվանդության սրացման, առողջության վատթարացման և կյանքին սպառնացող վտանգի մասին: «Տարեց կինը, ով սկզբունքային պայքար է վարում հանուն մեր և ձեր իրավունքների, և որ ձերբակալվել է հենց այդ պայքարի արդյունքում՝ մահվան մշտական սպառնալիքի մեջ է բանտային պայմաններում: Մենք որոշել ենք անցկացնել ակցիա՝ ի պաշտպանություն նրա, որը կկայանա մեր՝ Ադրբեջանի քաղբանտարկյալներին աջակցման արշավի շրջանակներում»,- նշված է հայտարարության մեջ:

Համաձայն թերթի՝ տվյալ հայտարարության մեջ նշված է նաև, որ անհրաժեշտ է ակտիվացնել ադրբեջանական հասարակությանը, սոցիալական ցանցերում տարածել լուսանկարներ և նյութեր Լեյլա Յունուսի մասին, տեղադրել ադրբեջանցի իրավապաշտպանի լուսանկարը՝ Ֆեյսբուք սոցիալական ցանցի էջի անձնական գլխավոր լուսանկարի փոխարեն, հաճախ կատարել գրառումներ՝ իրավապաշտպանին ազատ արձակելու պահանջով՝ օգտագործելով #FreeLeyla и #Leylaniazadet հեշթեգերը:

Թերթը գրում է, որ Ադրբեջանի Ազգային ճակատ կուսակցության ղեկավարների կարծիքով՝ անհրաժեշտ է նաև ուշադրությունը սևեռնել Լեյլայի ամուսնու՝ կոնֆլիկտաբան Արիֆ Յունուսի առողջության հետ կապված խնդրին, ով նույնպես ձերբակալվել է կեղծ մեղադրանքներով:

Հիշեցնենք, որ վերջերս Ադրբեջանի Նասիմի շրջանային դատարանը ևս 5 ամսով երկարաձգել էր «Խաղաղության և ժողովրդավարության ինստիտուտի» տնօրեն, ադրբեջանցի իրավապաշտպան Լեյլա Յունուսի ձերբակալման ժամկետը: Հունվարին հայտնի էր դարձել, որ գերմանացի բժիշկ Քրիստիան Վիտտը հաստատել էր Լեյլա Յունուսի՝ լուրջ հիվանդության մասին փաստը: Ք. Վիտտի խոսքերով՝ արյան հետազոտությունը ցույց է տվել, որ ադրբեջանցի իրավապաշտպանի մոտ իսկապես սկսվել է լյարդի քայքայման գործընթացը: Նա շարունակում է նիհարել. 6 ամսվա ընթացքում նիհարել է 62-ից մինչև 46 կգ՝ կորցնելով 16 կգ քաշ: Բժշկի կարծիքով՝ այս ամենն ակնառու կերպով հաստատում է անդառնալի գործընթացների առկայության փաստը նրա օրգանիզմում:

Հավելենք նաև, որ իրավապաշտպան Լ. Յունուսը ձերբակալվել է 2014-ի հուլիսի 30-ին իր տան բակում: Նրան մեղադրանքներ են առաջադրվել պետական դավաճանության, հարկերը չվճարելու, ապօրինի գործարարության, փաստաթղթերի կեղծման և մեծ չափերի խարդախության հոդվածներով: Պետական դավաճանության և մեծ չափերի խարդախության մեղադրանքներ են առաջադրվել նաև նրա ամուսնուն՝ Արիֆ Յունուսին: Բաքվի Նասիմի շրջանի դատարանը վերջերս ևս 5 ամսով ՝ մինչև 2015 թվականի օգոստոսի 5-ը, երկարաձգել է նրա ձերբակալման ժամկետը:

Նյութեր թեմայի շուրջ՝
«Deutsche Welle». «Ադրբեջանի իշխանությունները մտադիր չեն ազատ արձակել Լեյլա Յունուսին» 
Ադրբեջանում ձերբակալված Լեյլա Յունուսն արժանացել է ՄԱԿ-ի մարդու իրավունքների բարձրագույն հանձնակատարի անվան պարգևի 
The Economist. Լեյլա Յունուսը չստացավ Սախարովի մրցանակ, սակայն նա ուշադրության կարիք ունի
Ջեն Փսակին կոչ է արել ազատ արձակել Լեյլա և Արիֆ Յունուսներին 
ԵԽ հանձնակատարը դատապարտում է Ադրբեջանում Լեյլա Յունուսի ձերբակալումը