Ձեր վստահելի աղբյուրը

«Վերածնունդ» մրցույթ-փառատոնը, որն ամեն տարի Գյումրիում հավաքում է երաժիշտ-կատարողների, այս տարի անցկացվում է «Ընդդեմ ցեղասպանության, ընդդեմ պատերազմների» խորագրի ներքո և նվիրվում Հայոց ցեղասպանության 100-րդ տարելիցին և Հայրենական մեծ պատերազմում ֆաշիզմի դեմ տարած հաղթանակի 70 -ամյակին: Այս մասին հայտնում են մշակույթի նախարարությունից: 

Մշակութային այս նախաձեռնության հիմնական նպատակն է խթանել դասական և ազգային երաժշտության հանրահռչակումը, տարբեր ազգերի երաժիշտ-կատարողների միջև զարգացնել ստեղծագործական ու բարեկամական կապերը, օտարազգի արվեստագետներին հաղորդակից դարձնել Հայոց պատմությանն ու մշակութային ժառանգությանը: Փառատոնը պատանիներին և երիտասարդներին ընձեռում է ինքնադրսևորման, սեփական ունակությունները ճանաչելու, կատարողական վարպետությամբ մրցելու հնարավորություն:

Այս տարի մրցույթ-փառատոնին մասնակցության հայտ են ներկայացրել 2800 երաժիշտ-կատարողներ, որոնցից 700-ը 36 երկրից՝ ԱՄՆ, Անգլիա, Ավստրիա, Բելգիա, Բելառուս, Գերմանիա, Եգիպտոս, Եմեն, Էստոնիա, Թայվան, Թուրքմենիա, Իսպանիա, Իտալիա, Իրան, Իրաք, Լատվիա, Լիտվա, Լեհաստան, Լիբանան, Ղազախստան, Ղրղզստան, Մոլդովա, Մոնղոլիա, Շվեյցարիա, Չինաստան, Ռուսաստան, Սերբիա, Սիրիա, Սուդան, Վրաստան, Տաջիկստան, Ուզբեկստան, Ուկրաինա, Ֆրանսիա: Վերոնշյալ երկրների ներկայացուցիչներից բացի, փառատոնին կմասնակցեն նաև Հայաստանի, Արցախի և Ջավախքի պատանիներն ու երիտասարդները:

Երաժիշտ-կատարողների «Վերածնունդ» 7-րդ միջազգային մրցույթ-փառատոնի հանդիսավոր բացման արարողությունը տեղի կունենա 2015 թ. ապրիլի 15-ին: 

Մրցույթ-փառատոնը բաղկացած է 14 անվանակարգերից՝ դաշնամուր, լարային գործիքներ, փողային գործիքներ, ժողովրդական գործիքներ, կամերային անսամբլ, կոնցերտմայստերական վարպետություն, ակադեմիական երգեցողություն, երգչախումբ, երաժշտական թատրոն, էստրադային երգեցողություն, հեղինակային երգ, էստրադային-ջազային անսամբլ, կոմպոզիցիա, ազգային երգեցողություն: Ժյուրիների կազմում ընդգրկված են արվեստի 85 ճանաչված գործիչներ՝ աշխարհի 20 երկրներից: Նրանց թվում են հանրահայտ երաժիշտներ՝ Ղազախստանի Հանրապետության ժողովրդական արտիստ, պետական մրցանակի դափնեկիր Լակի Կեսօղլուն, միջազգային մրցույթների դափնեկիր, ջութակահար Եկատերինա Շոտտը (Գերմանիա), ՀՀ ժողովրդական արտիստ Մեդեա Աբրահամյանը, Լոնդոնի թագավորական երաժշտական քոլեջի պրոֆեսոր Յուրի Ժիսլինը, վիրտուոզ կիթառահար Մարկո Մինան (Իտալիա), Աբայի անվան օպերայի և բալետի մեներգիչ, պետական մրցանակի դափնեկիր Շահիմարդան Աբիլովը, Էստոնիայում սաքսոֆոնահարների դպրոցի հիմնադիր, դոկտոր, պրոֆեսոր Օլավի Կաասեմաան, անվանի կլարնետահար, միջազգային մրցույթների դափնեկիր Ջուլիան Միլկիսը (ԱՄՆ), միջազգային մրցույթների դափնեկիր, դաշնակահար Եվգենի Բրախմանը (ՌԴ), ժողովրդական արտիստ, անվանի ջութակահար Միխայիլ Գանտվարգը (ՌԴ), ՌԴ ժողովրդական արտիստ, անվանի երգեհոնահար Ռուբին Աբդուլինը, օպերային ռեժիսոր, պրոֆեսոր Ժանեթ Աստերը (Ֆրանսիա) և ուրիշներ:

Փառատոնի օրերին ժյուրիի բոլոր անդամները և նշանավոր երաժիշտները մասնակիցների համար վարպետության դասեր կանցկացնեն Երևանում և Գյումրիում:

Ապրիլի 13-23-ը մենահամերգներով հանդես կգան դաշնակահար, միջազգային մրցույթների դափնեկիր Վալերիան Շիուկաշվիլին (Վրաստան), ջութակահարներ Յուրի Ժիսլինը (Անգլիա) և Եկատերինա Շոտտը (Գերմանիա), երգիչներ Շահիմարդան Աբիլովը (Ղազախստան) և Մագդա Մկրտչյանը (Հայաստան), ջազմեններ Վալերի Գրախովսկին և Սերգեյ Մանուկյանը (ՌԴ), կլարնետահար Սեմյոն Դուժան (Մոլդովա), Ռուսաստանի Դաշնության Օսիպովի անվան ազգային գործիքների ակադեմիական պետական նվագախումբը: Իսկ ՌԴ ժողովրդական արտիստներ` երգեհոնահար Ռուբին Աբդուլինը և ջութակահար Միխայիլ Գանտվարգը, համերգով հանդես կգան Գյումրիի Սբ Յոթ Վերք եկեղեցում:

Փառատոնի շրջանակներում կանցկացվի «Մշակույթների երկխոսություն» միջազգային 9-րդ գիտաժողովը՝ նվիրված Հայոց ցեղասպանության 100-րդ տարելիցին և Հայրենական մեծ պատերազմի հաղթանակի 70-ամյակին։ Կմասնակցեն շուրջ հինգ տասնյակ գիտնականներ Հայաստանից և արտերկրից: Ներկայացված գիտական զեկուցումները կհրատարակվեն առանձին ժողովածուով:

Մրցույթ-փառատոնի մասնակիցները և հյուրերը կայցելեն Հայոց ցեղասպանության զոհերի հուշահամալիր, Հայոց ցեղասպանության թանգարան-ինստիտուտ, կծանոթանան Շիրակի մարզի (Հառիճ, Սառնաղբյուր, Մարմաշեն) պատմամշակութային հուշարձաններին, կայցելեն Երևան և Էջմիածին:

Մրցույթ-փառատոնն անցկացվում է ՀՀ նախագահի տիկին Ռիտա Սարգսյանի հովանու ներքո: Կազմակերպիչներն են՝ ՀՀ մշակույթի նախարարությունը, մարդկային ռեսուրսների զարգացման «Փյունիկ» համահայկական հիմնադրամը, Կոմիտասի անվան պետական կոնսերվատորիայի Գյումրիի մասնաճյուղը, «Վերածնունդ» միջազգային մրցույթ-փառատոն» հասարակական կազմակերպությունը: