Ձեր վստահելի աղբյուրը

Կառավարությունն այսօրվա նիստում հավանություն տվեց ՀՀ կենտրոնական բանկի 2015 թվականի դրամավարկային քաղաքականության ծրագրի վերաբերյալ ՀՀ կառավարության եզրակացության նախագծին:

Ինչպես գործադիրի նիստում ասաց ՀՀ ֆինանսների փոխնախարար Վախթանգ Միրումյանը, 2015 թվականի դրամավարկային քաղաքականության ծրագրում արտացոլված մակրոտնտեսական միջավայրի զարգացումների վերաբերյալ ԿԲ-ի գնահատականները ընդհանուր առմամբ համահունչ են ՀՀ կառավարության մակրոտնտեսական ծրագրերով նախատեսվող ուղղություններին:

Ըստ նրա՝ 2014թ-ի ընթացքում կենտրոնական բանկը շարունակել է իրականացնել ընդլայնող դրամավարկային քաղաքականություն, որն, ընդհանուր առմամբ, համահունչ է եղել գնաճի զարգացումներին և տնտեսական աճի տեմպերի վերականգնման, մակրոտնտեսական կայունության ապահովման ՀՀ կառավարության ծրագրով նախատեսված ուղղություններին:

Տարվա ընթացքում ՀՀ կենտրոնական բանկը, ելնելով գնաճային միջավայրի զարգացումներից և հաշվի առնելով ֆինանսական կայունության ապահովման կարևորությունը, մշտապես արձագանքել է դրամավարկային քաղաքականության միջոցով: Հատկապես տարեվերջին, ըստ փոխնախարարի, երբ արտարժութային հոսքերի կտրուկ նվազման սպասումների և ռուսական ռուբլու արժեզրկման ազդեցությամբ պայմանավորված դրամի արժեզրկման պայմաններում գնաճային միջավայրը ընդլայնվել էր, ԿԲ-ն արձագանքել է կտրուկ բարձրացնելով լոմբարդային ռեպո տոկոսադրույքը և արժութային պարտավորությունների դիմաց պարտադիր պահուստավորման նորման:

Արդյունքում, ինչպես նշեց Վ.Միրումյանը, գնաճը 2014 թվականի տարեվերջին արագացավ և արդյունքում կազմեց 4.6%՝ գտնվելով տատանումների թույլատրելի միջակայքում:

Անդրադառնալով գնաճին՝ նշեց, որ, 2015թ-ի առաջին եռամսյակում գնաճը 5.8%՝ համընկնելով գնահատականների հետ: Սակայն գյուղատնտեսության ճյուղում կանխատեսումները ակնկալում են 3.5-4.5% իրական աճ, ինչի վերաբերյալ 2015 թվականի առաջին եռամսյակի օպերատիվ տվյալները թույլ են տալիս ավելի լավատեսորեն վերաբերվել ճյուղի և գնաճի զարգացումներին 2015 թվականի ընթացքում:

«Կարծում ենք, որ երկրորդ եռամսյակի Դրամավարկային քաղաքականության ծրագրում Կենտրոնական բանկը կարիք կունենա վերանայելու գյուղատնտեսության և գնաճի կանխատեսումները»,- ասաց նա:

Այսպիսով, ըստ Վ.Միրումյանի, ՀՀ կենտրոնական բանկի կողմից 2015 թվականի համար նախանշված դրամավարկային քաղաքականությունը առաջնորդվելով գնաճի նպատակային ցուցանիշի ապահովման սկզբունքներով, և կարևորելով ֆինանսական կայունության ապահովումը Հայաստանում, մյուս կողմից հաշվի առնելով, որ միջնաժամկետ հորիզոնում Կառավարության կողմից իրականացվող խթանող հարկաբյուջետային քաղաքականությունը սահմանափակված է լինելու և կրելու է առավելապես զսպող բնույթ` պայմանավորված պետական պարտքի կայուն կառավարման պահանջներով, դրամավարկային քաղաքականությունը կոորդինացվելով հարկաբյուջետային քաղաքականության հետ պետք է իրական նախադրյալներ ստեղծի այս ժամանակահատվածում մակրոտնտեսական կայունության ապահովման և տնտեսական աճի տեմպերի վերականգնման համար:

Վարչապետ Հովիկ Աբրահամյանը դիմելով փոխնախարարին՝ հետաքրքրվեց, թե եզրակացության մեջ՝ «Արտաքին միջավայր» բաժնի «ՀՀ հիմնական գործընկեր երկրների տնտեսական աճեր» ենթաբաժնում, ինչու է ներկայացված, որ Ռուսաստանում 2014 թվականի վերջին և 2015 թվականի սկզբին արձանագրված էական տնտեսական տատանողականության արդյունքում 2015 թվականին ակնկալվում է տնտեսական անկում, ինչը կկազմի շուրջ 2%:

Սակայն Վ.Միրումյանը չկարողացավ հարցին պատասխանել, և վարչապետը խոստացավ, որ այդ տեղեկանքը կտա նրան, որպեսզի նա ուսումնասիրի, որից հետո ավելացրեց. «Ձեր ակնկալիքները չեն իրականանալու, եթե ակնկալում եք, որ տնտեսական անկում պետք է լինի... նման բան է գրված, ես չգիտեմ, միգուցե տեղեկանքն է սխալ»:

Վարչապետն առաջարկեց ևս մեկ անգամ նայել փաստաթուղթը, քանի որ ԱՎԾ-ի տվյալներով արդեն տնտեսական ակտիվություն կա:

«Էկոնոմիկայի նախարար շատ լավ հիմնավորում բերեց, եթե մարդիկ կան, որ կանխատեսումներով, ենթադրություններով են խոսում, մենք խոսում ենք թվերով, և հիմնավորում ենք, որ տնտեսական աճ ունենալու ենք: Հիմա ես համոզված եմ, որ 2,2-2,3 % տնտեսական աճ ունենք չորս ամսում, և նման դատարկ խոսակցություններին պիտի վերջ տրվի, թե տնտեսական անկում են ունենալու և այլն: Որոշ քաղաքական ուժեր կամ գործիչներ ցանկություն ունեն, որ կառավարությունը ձախողվի, տնտեսական անկում լինի, բայց ես համոզված եմ, որ իրենց ցանկությունը չի իրականանալու, և մենք արձանագրելու ենք տնտեսական աճ»,- ասաց Հ.Աբրահամյանը:

Անդրադառնալով այս ամիսների ընթացքում իրականացվող ծրագրերին, վարչապետն ասաց, որ դրանք տնտեսական աճ կապահովեն:

Նա միաժամանակ նշեց, որ 2015 թվականի համար կանխատեսել էին 1 տոկոս տնտեսական աճ, բայց վստահ է, որ ավելին է լինելու՝ 2-3 տոկոս:

«Եթե այն ծրագրերը, որ պլանավորել ենք այս տարի իրականացնելու, ես համոզված եմ, որ մեր բյուջեում դրված 4.1% տնտեսական աճը ապահովելու ենք: Հասկանալի է, որ կան տարածաշրջանային պրոբլեմներ, բայց դա հիմք չէ և տնտեսական աճ արձանագրենք մեր երկրում: Սա է մեր մոտեցումը»,- ընդգծեց Հ.Աբրահամյանը:

Փոխվարչապետ Վաչե Գաբրիելյանը էլ նկատեց, որ եզրակացության մեջ նշված է Ռուսաստանի, այլ ոչ թե Հայաստանի վերաբերյալ կանխատեսումները:

Վարչապետը հարցրեց, թե Ռուսաստանի հետ ինչ գործ ունենք, Վ.Գաբրիելյանն էլ արձագանքեց, որ դա ազդում է մեր տնտեսության վրա: Վարչապետն էլ նշեց, որ տեղեկանքով չի երևում, որ Ռուսաստանի է վերաբերում». «Իսկ եթե այդպես է, ավելի լավ: Ամեն դեպքում պետք է ամեն ինչ անենք, որպեսզի արձանագրենք տնտեսական աճ»: