Ձեր վստահելի աղբյուրը

Կասպյան նավթով հարուստ պետությունը օգտագործում է Եվրոպական խաղերը` երկրում մարդու իրավունքների գարշելի խախտումների ալիքը թաքցնելու համար: Անդրադառնալով Ադրբեջանի մայրաքաղաք Բաքվում մեկնարկած Եվրոպական խաղերին` գրում է «The Daily Beast» պարբերականը:

«Երբ Բաքվում դիտում եք հույն ոճաբանի կողմից նախագծված Եվրոպական խաղերի բացման գեղեցիկ շոուն, հիշենք, որ համանման ֆանտաստիկ շոուներ են տեղի ունենում նաև Ադրբեջանի տարբեր բանտախցերում, որտեղ շուրջ 8 լրագրողներ, 5 իրավապաշտպաններ և մի քանի տասնյակ այլ քաղբանտարկյալներ են փակված շինծու մեղադրանքների հիման վրա»,- գրում է պարբերականը:

Պարբերականը նկատում է, որ միջազգային մակարդակով անցնող խաղերը կոչված են լավ օրինակ ծառայելու այլ երկրների համար, հետևաբար, անհասկանալի է, թե Ադրբեջանի դեպքում որն է այդ լավ օրինակը, եթե այդ երկիրը աչքի է ընկնում մարդու իրավունքների զանգվածային խախտումներով:

Վկայակոչելով Ադրբեջանի իշխանությունների կողմից քաղաքական նպատակներով իրականացրած ձերբակալությունները` պարբերականը հիշեցնում է եվրոպական տարբեր կառույցների և մի շարք հայտնի անհատների կողմից Բաքվին ուղղված դատապարտող կոչերը` կապված քաղբանտարկյալներին ազատ արձակելու հետ: Այդուհանդերձ, աղբյուրը նկատում է, որ թեև կոչերը Ալիևի վարչակարգի կողմից անպատասխան են մնացել, սակայն ձերբակալվածները հույս ունեն, որ Եվրոպական խաղերը փոքրիկ լույս կսփռեն իրենց անտանելի վիճակի վրա:

Լրատվամիջոցը նաև հիշեցնում է, որ ինչպես իրավապաշտպան, այնպես էլ մի շարք սպորտային կազմակերպություններ քննադատություններ են հնչեցրել Եվրոպայի օլիմպիական կոմիտեի իռլանդացի ղեկավար Պատրիկ Հիքիի հասցեին` ադրբեջանական վարչակարգին գովաբանելու և խաղերի բացման արարողության ժամանակ հանդես գալու համար: Ի պատասխան կոմիտեի ղեկավարի խոսքի` պարբերականը նկատում է, որ իսկապես Ադրբեջանի իշխանությունների ուշադրությունը շատ մեծ է, հատկապես եթե խոսք է գնում երկրում այլախոհության ցանկացած դրսևորման դեմ:

Պարբերականն անդրադառնում է նաև Ադրբեջանում կոռուպցիայի ահռելի մակարդակին` նշելով, որ կոռուպցիան Ալիևների ընտանեկան բիզնեսն է: Վկայակոչելով «Կազմակերպված հանցավորության և կոռուպցիայի զեկուցման նախագիծ»-ի կողմից հրապարակված զեկույցը` զլմ-ն հիշեցնում է արտասահմանում` Պանամայում, Չեխիայի Հանրապետությունում և այլ երկրներում Ալիևիների ընտանիքին պատկանող բիզնեսների և դրանց հետ ասոցացված ընկերությունների մասին, որոնք գործում են արդեն Ադրբեջանում:

Այս համատեքստում լրատվամիջոցը հիշեցնում է, թե ինչպես էր 2009 թվականին ամերիկացի դիվանագետը գաղտնի խողովակով Վաշինգտոնին տեղեկացրել, որ Ադրբեջանը վերածվել է «մաֆիոզ պետության»:

«Ինչպես և բոլոր հանցագործները, այնպես էլ կասպիան Կորլեոնեն ցանկանում է իրեն օրինապահ բիզնեսմեն ներկայացնել: Բայց բոլոր հանցագործների նման այս դեպքում էլ նրա համար այլախոհների հետ հարաբերվելու միակ ճանապարհը ահաբեկությունը և հալածանքն է»,- գրում է պարբերականը: