Ձեր վստահելի աղբյուրը

Անցած մրցաշրջանը շատ վատ դասավորվեց Հայաստանի ֆուտբոլի ազգային հավաքականի կիսապաշտպան Արաս Օզբիլիսի համար: Ծնկի լուրջ վնասվածք, երկարատև բուժում, խաղային պրակտիկայի բացակայություն… Իսկ ապրիլին նա հարցազրույց տվեց՝ քննադատելով թիմի գլխավոր մարզիչ Մուրատ Յակինին: Այժմ, երբ թուրքական ծագում ունեցող շվեյցարացին հեռացել է մոսկովյան թիմից, Օզբիլիսը համաձայնվել է խոսել այն տհաճ իրավիճակի մասին և ևս մեկ անգամ բացատրել իր մոտեցումները: «Սպորտ Էքսպրեսին» նրա տված հարցազրույցը մեր ընթերցողներին ենք ներկայացնում որոշակի կրճատումներով:

- Հավանաբար, գլխավոր հարցը մարդուն, ով բաց է թողել անցած մրցաշրջանը. ինչպես է Ձեր առողջությունը:
- Ամեն ինչ լավ է: Օրեցօր ինձ ավելի ու ավելի լավ եմ զգում: Ուժեր եմ հավաքում: Ծնկի վնասվածքն արդեն չի անհանգստացնում: Ոչ մի ցավ չեմ զգում:

- Ինչպե՞ս ընդունեցիք մարզչական շտաբի փոփոխությունը:
- Մի մասնագետ հեռանում է, նրան փոխարինում է մեկ ուրիշը. նման բաներ ֆուտբոլում հաճախ են պատահում և ինձանից կախված չեն: Իմ գործն աշխատելն ու 100 տոկոսով նվիրվելն է:

- Հիմա չեք ափսոսո՞ւմ, որ գարնանը հարցազրույց տվեցիք, որում լրջորեն անցաք Յակինի վրայով:
- Հասկանում եմ, որ տհաճ պատմություն ստացվեց: Եվ ինձ համար, և նրա: Դա տեղի ունեցավ այն պատճառով, որ ես ինձ թիմի մասնիկը չէի զգում, չէի տեսնում, որ ինձ հետ հույսեր են կապում: Դա այդ պահին ինձ համար շատ կարևոր էր… Ամեն դեպքում՝ երբ վերադարձա ու «Ամկարի» հետ հանդիպման ժամանակ 20 րոպե անցկացրեցի խաղադաշտում, Յակինին շնորհակալություն հայտնեցի ինձ տրամադրած հնարավորության համար: Արդյոք ափսոսո՞ւմ եմ այն հարցազրույցի համար: Գիտակցում եմ, որ դա իմ կողմից այնքան էլ լավ քայլ չէր: Բայց երբ երիտասարդ ենք, միշտ դասեր ենք քաղում տարբեր իրավիճակներից: Իսկ այժմ, եթե նույնիսկ ափսոսում եմ, անհնար է ինչ-որ բան փոխել:

- Հետո շփվե՞լ եք Յակինի հետ:
- Այո, իհարկե: Բայց ես չէի ուզենա բացահայտել զրույցի մանրամասները: Ամեն ինչ թող մնա մեր մեջ:

- Նրանից ներողություն խնդրեցի՞ք: Կամ միգուցե հիմա՞ եք ցանկանում դա անել:
- Նրան ասացի, որ դա տգեղ էր իմ կողմից, որ գուցե արժեր, որ ամեն ինչ ուղղակի հենց իրեն ասեի:

- Յակինը հետո ասաց, որ իր համար շատ ցավալի էր լսել Ձեր բառերը: Նշեց, որ գլխավոր թիմից Ձեր հեռացումը բացառապես մարզական որոշում է, որը կայացվել է բժշկական նկատառումների հիմքի վրա:
- Բայց չէ՞ որ եթե, ըստ մարզչի, վնասվածքից հետո դեռ պատրաստ չեմ խաղալ, անհրաժեշտ է աշխատել ինձ հետ, օգնել, որպեսզի վերականգնվեմ: Ես չէի պահանջում ինձ անմիջապես ասպարեզ դուրս բերել հիմնական կազմում: Կարելի էր ամեն ինչ բացատրել ինձ և հնարավորություն տալ՝ մարզվելու թիմի հետ: Դա իմ կարծիքն է: Եվ այն հարցազրույցում ես պարզապես պատմեցի, թե ինչ էի զգում այդ պահին: Կարծում էի, որ դա պետք է ինձ:

- Ըստ զգացողության՝ ե՞րբ կարող էիք վերադառնալ խաղադաշտ:
- Դժվար է ասել: Գլխավորն այն է, որ հիմա լիարժեք առողջ եմ ու ինձ գերազանց եմ զգում:

- Եթե հնարավոր լիներ վերադարձնել ժամանակը, նման հարցազրույց կտայի՞ք:
- Այո, հնարավոր է: Բայց արդեն անպայման կխորհրդակցեի մամուլի քարտուղարի հետ:

- Յակինն ուժե՞ղ մարզիչ է:
- Կարծում եմ՝ այո: Նրա որակներին ես չեմ կասկածում: Նա իր փիլիսոփայությունն ունի, արժանիքները, գերազանց է հասկանում ֆուտբոլը: Դա հաստատ գիտեմ, չնայած նրա հետ շատ չեմ աշխատել: Չեմ կարող պատասխանել, թե ինչու «Սպարտակում» նրա աշխատանքն արդյունավետ չստացվեց, սակայն վստահ եմ, որ կարող է հաջողության հասնել մեկ այլ թիմում:

- Լուրեր կային, որ որոշ ֆուտբոլիստներ նրան մինչև վերջ չեն հասկանում: Ընդհանրապես՝ ինչպե՞ս եք գնահատում շվեյցարացու օրոք թիմում առաջացած մթնոլորտը:
- Ամեն ինչ կարգին էր: Եվ Կարպինի, և նրա օրոք, ինչպես նաև հիմա թիմում միշտ լավ մթնոլորտ է: Այն կարող է մի քիչ փչանալ, երբ արդյունք չկա, բայց դա նորմալ է: Հաղթում ես, տրամադրությունդ բարձր է, իսկ եթե պարտվում ես՝ ոչ:

- Անձամբ հրաժեշտ տվեցի՞ք Յակինին:
- Նրան շնորհակալություն հայտնեցի համատեղ աշխատանքի համար: Նա նույնպես շնորհակալություն հայտնեց ինձ, հաջողություններ մաղթեց, հույս հայտնեց, որ դեռ կտեսնվենք: Բաժանվեցինք` պահպանելով լավ փոխհարաբերություններ: