Արեգ Միքայելյան. Հեշտ չէր հասնել Հայաստանը Տարածաշրջանային աստղագիտական կենտրոն հռչակելուն
Բյուրականի աստղադիտարանն իր ստեղծման օրվանից ունեցել է խիստ ընդգծված միջազգային ուղղվածություն, «մեղավորը» հենց աստղադիտարանի հիմնադիր Վիկտոր Համբարձումյանն է, ով նույնպես կարևորություն էր տալիս միջազգային համագործակցությանը: Լրագրողների հետ հանդիպման ժամանակ ասաց Բյուրականի աստղադիտարանի տնօրեն Հայկ Հարությունյանը:
Հիշեցնենք, որ ՀՀ ԳԱԱ Վ. Համբարձումյանի անվան Բյուրականի աստղադիտարանը Միջազգային աստղագիտական միության որոշմամբ հռչակվել է տարածաշրջանային աստղագիտական կենտրոն:
Աստղադիտարանի փոխտնօրեն, Բյուրականի աստղադիտարանը տարածաշրջանային կենտրոն հռչակելու ծրագրի նախաձեռնող, ղեկավար Արեգ Միքայելյանն ասաց, որ տարածաշրջանային կենտրոն ճանաչվելը պետք է ներկայացնել որպես քաղաքական իրադարձություն. «Մեր հասարակության մեջ գիտությունն իր դիրքը զիջել է: Սակայն այս փաստը հերիք է ապացուցելու համար, որ գիտությամբ շատ ավելի հարցեր կարելի է լուծել, քան քաղաքականությամբ: Հայաստանը գրեթե ոչ մի ոլորտում չի կարող ճանաչվել տարածաշրջանային կենտրոն, միայն գիտություն, աստղագիտության: Պատճառները՝ մեր աշխարհագրական դիրքն է, նաև կոնֆլիկտային տարածաշրջան է: Հեշտ չէր մեր ծրագիրն անցկացնելը թեկուզ մենք հայտնի ենք մեր աստղագիտությամբ, այս տարածաշրջանում աստղագիտությունն ամենազարգացածը Հայաստանում է: Հարևան երկրներից գրեթե ոչ մեկը չէր համաձայնվում աջակցության նամակ ուղարկել, որը պարտադիր պայման էր: Ի վերջո Վրաստանից ու Իրանից կարողացանք ստանալ»:
Ա. Միքայելյանի խոսքով, Հայաստանի հայտում ներկայացված հիմնավորումներն շատ ուժեղ էին՝ սկսած Վիկտոր Համաբարձումյանի գործոնից, վերջացրած ժամանակակից մեր ակտիվությունը, ինչի արդյունքում Միջազգային աստղագիտական միության կողմից Հայաստանի ներկայացրած հայտը հավանության արժանացավ:
Տարածաշրջանային կենտրոնները կոչվում են «Աստղագիտության զարգացման համար»: Ա. Միքայելյանի խոսքով, արաբական երկրներն ուզում են առանձին կենտրոն ստեղծել՝ համախմբելով արաբական բոլոր երկրները:
«Հայաստանն այժմ պետք է նամակներով հայտնի հարևան երկրներին, այդ թվում նաև Թուրքիային, Ադրբեջանին, որ Հայաստանը Միջազգային աստղագիտական միության հետ համատեղ ստեղծել է տարծաշրջանյին կենտրոն: Իրենք կամ կհամաձայնվեն միանալ, կամ ոչ: Բացասական պատասխանի դեպքում իրենք կտուժեն՝ դուրս մնալով Միջազգային աստղագիտական միության ծրագրերից»,- ասաց նա:
Ա. Միքայելյանի խոսքով, կենտրոնի մեջ կարող են ընդգրկվել բացի Իրանից, Վրաստանից, Թուրքիայից ու Ադրբեջանից, նաև Միջին Ասիայի երկրները, ինչպես նաև Արևելյան Եվրոպայի երկրները, քանի որ Հայաստանն աստղագիտության մեջ դիտարկում են որպես Եվրոպայի հետ կապող երկիր:
Ըստ Ա. Միքայելյանի, Հայաստանում պետք է միության ֆինանսավորմամբ անցկացվեն հատուկ ծրագրեր, գալու են խոշորագույն գիտնականներ, Նոբելյան մրցանակակիրներ: Նա հույս ունի, որ պետությունն անտարբեր չի թողնի այս երևույթը, թեև նախապես որևէ աջակացություն, նույնիսկ աջակցող նամակ չի տրամադրել:
«Այս կենտրոնը մեծ հեղինակություն կբերի մեր երկրին: Այս տեսակետից մենք մեկ քայլ արեցինք, հույս ունենք պետությունն էլ աջակցություն կցուցաբերի»,- նշեց նա:
Նախորդող հրապարակում՝
Հայաստանը՝ աստղագիտական գերտերություն և տարածաշրջանային աստղագիտական կենտրոն. Հայկ Հարությունյան
Լրահոս
Տեսանյութեր
ՈՒՂԻՂ. Հակակոռուպցիոն դատարանում ընթանում է ԲԴԽ նախկին նախագահ Ռուբեն Վարդազարյանի գործով նիստը
