Amnesty International. Չափազանց վտանգավոր մոտեցում է Թուրքիային որպես անվտանգ վայր դիտարկելը
Գերմանիայի կանցլեր Անգելա Մերկելը Թուրքիայի ղեկավարների հետ երեկ Ստամբուլում կայացած հանդիպման ժամանակ քննարկել է միգրանտների հոսքը կասեցնելուն առնչվող հարցեր: Այս մասին հայտնում է «Deutsche Welle»-ն:
Հանդիպման ժամանակ քննարկվել են տարբեր հարցեր`սկսած միգրացիոն հոսքերը վերահսկելու համար Թուրքիային լրացուցիչ 3,4 մլրդ. եվրո օգնություն հատկացնելուց, մինչև Թուրքիայի եվրաինտեգրման գործընթացը արագացնելը:
Հանդիպումից հետո Թուրքիայի վարչապետ Ահմեդ Դավութօղլուի հետ համատեղ մամլո-ասուլիսի ժամանակ Անգելա Մերկելը հայտարարել է, որ Գերմանիան պատրաստ է արագացնել Թուրքիայի եվրաինտեգրման գործընթացը:
Գերմանիայի և Թուրքիայի ղեկավարների հանդիպման նախօրեին «Amnesty International» միջազգային իրավապաշտպան կազմակերպությունը հրապարակել էր զեկույց, որում մեղադրել էր եվրոպական առաջնորդներին` Թուրքիան «Եվրոպայի դռնապան» դարձնելու և այդ երկրի կողմից միգրանտների իրավունքները ոտնահարելու ու անհարգալից վերաբերմունք դրսևորելու վրա աչք փակելու համար:
«Միգրացիոն կառավարման» շուրջ ԵՄ-ի և Թուրքիայի միջև բանակցությունները վտանգ են պարունակում, որ փախստականների իրավունքները հայտնվելու են երկրորդ տեղում՝ առաջնահերթ իրենց դիրքը զիջելով փախստականների՝ ԵՄ մուտք գործելու կանխարգելմանն ուղղված սահմանային վերահսկողության միջոցառումներին», - նշել է Amnesty International կազմակերպության Թուրքիայի հարցերով վերլուծաբան Էնդրյու Գարդները։
«Անշուշտ, ԵՄ-ն պետք է սատարի Թուրքիային ավելի քան երկուսուկես միլիոն փախստականներին ապաստան տալու հետ կապված մարտահրավերներին դիմակայելու հարցում, և երեք միլիարդ եվրո աջակցության վերաբերյալ վերջին բանակցություններն առաջընթաց քայլ են այդ ուղղությամբ։ Սակայն փախստականներին Թուրքիայում պահելուն ուղղված պայմանագիրն անտեսում է և՛ վերջիններիս առջև այստեղ ծառացած մարտահրավերները, և՛ ԵՄ ակնհայտ անհրաժեշտությունն առավել մեծ ներդրում ունենալ աճող փախստական բնակչության պաշտպանության գործում»։
«ԵՄ բանակցություններին նախորդած մի քանի շաբաթների ընթացքում մենք ականատես ենք եղել ԵՄ սահմանը հատելու փորձի համար փախստականների կամայական ձերբակալությանը և անգամ բռնի արտաքսմանը դեպի այն երկրները, որտեղից եկել են։ Սա միջազգային իրավունքի կոպիտ խախտում է։ Անգելա Մերկելը պետք է երաշխավորի, որ, նախքան ԵՄ սահմանների կառավարման գործում Թուրքիայի որպես վստահելի գործընկեր դիտարկելը, Թուրքիան դադարեցնելու է իր նմանօրինակ գործողությունները»,- ասել է Էնդրյու Գարդները։
Amnesty International-ը նաև նախազգուշացրել է, որ Թուրքիան, որպես փախստականների համար ապաստան տրամադրող երկիր ներկայացնելը սկզբունքորեն սխալ է, քանի որ Եվրոպական հանձնաժողովի տվյալներով՝ Թուրքիայից ապաստան հայցողներից յուրաքանչյուր չորրորդին շնորհվել է ԵՄ-ում փախստականի կարգավիճակ, ինչը հստակ ապացույց է, որ այդ երկիրն ապահով չէ։
«Սառնասիրտ և չափազանց վտանգավոր մոտեցում է Թուրքիան որպես անվտանգ վայր դիտարկելը։ Աճել է բռնությունը Քրդական ժողովրդական կուսակցության (PKK) և բանակի ու ոստիկանության միջև, որը ուղեկցվում է մարդու իրավունքների իրադրության առավել վատթարացմամբ։ Ականատես ենք եղել հակաահաբեկչական օրենքների քողի ներքո քաղաքական ակտիվիստների ձերբակալության և խոսքի ազատության նկատմամբ հետագա հարձակումների դեպքերի, որոնք ուղեկցվում են նաև ձերբակալվածների նկատմամբ վատ վերաբերմունքի դրսևորմամբ: Թուրքիան հստակորեն ցանկանում է, որպեսզի սահմանային կառավարման համագործակցության պայման ճանաչվի վերջինիս ապահով երկիր լինելու հանգամանքը, սակայն դա կդիտարկվի որպես ԵՄ կողմից վախի դրսևորում։ Անգելա Մերկելը Թուրքիայի կառավարության հետ բանակցություններում պետք է այս սկզբունքները վեր դասի քաղաքականությունից»,- ասել է Գարդները։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին