Ձեր վստահելի աղբյուրը

Կենտրոնական ընտրական հանձնաժողովը այսօրվա նիստում բավարարեց Հայ Ազգային կոնգրես խմբակցության ղեկավար Լևոն Զուրաբյանի դիմումը և որոշեց երկարացնել ընտրական հանձնաժողովներում ՀԱԿ շուրջ 400 ներկայացուցիչների արտոնագրի ժամկետները:

Մասնավորապես, Լևոն Զուրաբյանը ԿԸՀ նախագահին ուղղված իր դիմումի մեջ գրել էր. «Հաշվի առնելով, որ 2015 թվականի դեկտեմբերի վեցին նշանակված Սահմանադրական փոփոխությունների հանրաքվեն արտահերթ ընտրական գործընթաց է և նախատեսված չի եղել նախօրոք և քանի որ ընտրական հանձնաժողովներում ընդգրկվելու իրավունքի համար 2015-ին նախատեսված արտոնագրման դասընթացները տեղի են ունեցել հանրաքվեն նշանակելուց առաջ` օգոստոսին, արձակուրդային ժամանակահատվածում, ինչը հնարավորություն չի տվել շատերին ում արտոնագրի ժամկետը լրացել կամ լրանում է 2015-ին, մասնակցել այդ դասընթացներին, իսկ այլ դասընթացներ նախատեսված չեն մինչև հանրաքվեի անցկացումը: Նկատի ունենալով նաև Հանրաքվեի գործընթացի վերահսկելիության և թափանցիկության ապահովման կարևորությունը, առաջարկում ենք Կենտրոնական ընտրական հանձնաժողովի որոշմամբ, երկարացնել 2015-ին լրացած արտոնագրերի ժամկետները և դրանք թողնել ուժի մեջ` ներառյալ հանրաքվեի անցկացումը»:

ԿԸՀ նախագահ Տիգրան Մուկուչյանը մինչև որոշումը հրապարակելը տեղեկացրեց, որ հունիս-հուլիս ամիսներին նախապես հայտարարվել է ընտրական հանձնաժողովների անդամների դասընթացների կազմակերպման մասին, ստացվել են հայտեր այլ կուսակցություններից, ինչպես նաև ՀԱԿ-ից` 705 անդամի վերապատրաստման մասին: Մուկուչյանի խոսքով, սակայն, օգոստոս-սեպտեմբերին կազմակերպված դասընթացներին ՀԱԿ-ից մասնակցել է 383 ներկայացուցիչ, իսկ 346-ը ստացել են արտոնագրեր:

Այս տվյալները հրապարակելուց հետո Տիգրան Մուկուչյանը ԿԸՀ-ում ՀԱԿ ներկայացուցիչ Սամվել Աբրահամյանից հետաքրքրվեց, թե ինչո՞ւ նրանք չեն մասնակցել դասընթացներին, հատկապես, որ սեպտեմբեր ամիսն արձակուրդային ժամանակահատված չի համարվում:

Ի պատասխան Աբրահամյանն ասաց, որ իրենք ընդդիմություն են և իրենց շարքերում արտագնա աշխատանքի մեկնողները շատ են, իսկ նշված ժամանակահատվածը համարվում է արտագնա աշխատանքի մեկնելու ժամանակահատված:

Նիստից հետո Սամվել Աբրահամյանից Panorama.am-ը հետաքրքրվեց, թե բոլոր 1997 ընտրատեղամասերում ՀԱԿ-ը անդամների քանակի հետ կապված խնդիրներ չի՞ ունենա, ինչին ՀԱԿ ներկայացուցիչը արձագանքեց. «ՀԱԿ-ը ընտրատեղամասերում քանակի խնդիրներ չունի: Խնդիրը որակյալ կադրերով ապահովելու մեջ է, ինչի ուղղությամբ ներքին դասընթացներ, ուսուցումներ ենք անում, որպեսզի կարողնանք ընտրել նրանցից առավել պատրաստվածներին»:

Աբրահամյանն ասաց, որ հնարավոր է լինեն ընտրատեղամասեր, որտեղ ՀԱԿ-ը ներկայացուցիչ չի ունենա:

«Եթե չենք նշանակում որևէ հանձնաժողովում մեր ներկայացուցչին, չի նշանակում չունենք ռեսուրս: Ենթադրենք լեռնային գյուղ է, որտեղ կա 50 ընտրող, այդտեղ կարող է չնշանակենք: Մեզ համար կարևորը գլխավոր կետերը, որոնք որոշիչ են, դրանք փակելն է», -հավելեց պարոն Աբրահամյանը` նկատելով, որ ընդդիմադիր ներկայացուցիչները հանձնաժողովներում պետք է լինեն ուժեղ ու պատրաստված:

Նշենք, որ ընտրական հանձնաժողովներում ընդգրկված ԱԺ-ում ներկայացված կուսակցությունների ներկայացուցիչները տարեկան մեկ անգամ մասնակցում են որակավորման դասընթացների և ստուգարքի հիման վրա նրանց տրվում է որակավորման վկայական` 3 տարի ժամկետով:

Ի դեպ, ԿԸՀ նախագահի ներկայացրած տվյալներով, 2012-ին Հայ ազգային կոնգրես կուսակցությունը ներկայացրել է 1440 հայտ, դասընթացներին մասնակցել է 756 քաղաքացի, ստուգարքի արդյունքում որակավորման վկայականներ են տրվել 649 քաղաքացիների:

Թեմային առնչվող հրապարակում`
«Ոչ»-ի ճակատը ընտրական հանձնաժողովներում ներկայացուցիչներ ապահովելու խնդիրներ ունի