Ձեր վստահելի աղբյուրը

Անդրադառնալով Թուրքիայի կողմից ռուսական ռազմական ինքնաթիռի խոցման միջադեպին և այդ համատեքստում Ռուսաստանի կողմից Թուրքիային տրվելիք հնարավոր պատասխաններին՝ Bloomberg գործակալությունը ի թիվս այլ տարբերակների նշում է, որ Ռուսաստանը կարող է փոխել հավասարակշռության նժարը Հայաստանի օգտին՝ այս կերպ վնասելով Ադրբեջանին, ով հանդես է գալիս որպես Թուրքիայի դաշնակից:

Պարբերականի հոդվածագիրները նշում են, որ Ռուսաստանի կողմից Թուրքիային տրվող պատասխան գործողություններից առաջինը կարող է լինել զբոսաշրջության ոլորտում խիստ սահմանափակումներ մտցնելը: Ըստ նրանց, ՌԴ արտգործնախարարի հայտարարությունը արձակուրդները Թուրքիայում չանցկացնելու մասին արդեն իսկ ավելին է , քան զուտ անվտանգության նկատառումներով արված հայտարարություն:

«Ներկա պահին 10.000 ռուսներ արձակուրդ են անցկացնում Թուրքիայում, բայց այնտեղ մուտքը շուտով կարող է փակ լինել»,- հոդվածագիրները մեջբերում են Ռուսաստանի զբոսաշրջության միության նախագահ Իրինա Թուրինայի խոսքը:

Անդրադառնալով էներգետիկ ոլորտում երկու երկրների համագործակցությանը՝ հոդվածագիրները նկատում են, որ Թուքիա մտնող գազի կեսից ավելի գալիս է Ռուսաստանից, որը 2014 թվականի տվյալներով կազմել է մոտ 27 մլրդ խմ:

Պարբերականի հետ զրույցում ՌԴ Էներգետիկայի փոխնախարարը նշել է, որ Թուրքիային գազամատակարարումը կշարունակվի այնքան, որքան նախատեսված է արդեն իսկ եղած պայմանավորվածությունների շրջանակներում: Իսկ թե հետագայում ինչ ընթացք կունենան այդ ամենը և հատկապես Թուրքական հոսքը, պարբերականի փոխանցմամբ ռուս պաշտոնյան հրաժարվել է մեկնաբանել:

Անդրադառնալով ռազմական ոլորտին և այդ շրջանակներում Ռուսաստանի կողմից Թուրքիային տրվող հնարավոր պատասխաններին, հոդվածագիրները գրում են. «Պուտինը ռազմական սպառնալիք չի հնչեցրել Թուրքիայի դեմ, բայց կարող է անուղղակի ձևով վնաս հասցնել այս ոլորտում Թուրքիայի շահերին: Ռուսատանը կապեր ունի Սիրիայում և Իրաքում քրդական խմբերի հետ և կարող է նրանց զենք մատակարարել: Ռուսաստանը կարող է փոխել նաև հավասարակշռության նժարը ի վնաս Թուրքիայի դաշնակից Ադրբեջանի և ի օգուտ Հայաստանի՝ Լեռնային Ղարաբաղի հակամարտության համատեքստում: Լարվածությունը կարող է հասնել Թուրքիայի հետ Հայաստանի փակ սահմանին, որը հայկական կողմից պաշտպանում են ռուսական զորքերը»:

Ռազմական պատասխանների մասով հոդվածագիրները հիշեցնում են, որ Ռուսաստանը նաև սկսել է ուժեղացնել իր ներկայությունը Սիրիայում, այնտեղ տեղակայելով C-400 համակարգեր:

Պարբերականը անդրադառնում է նաև ռուս-թուրքական առևտրային հարաբերություններին՝ նկատելով, որ որոշ թուրքական ապրանքատեսակների մուտքը կարող է արգելվել Ռուսաստան, ինչպես օրինակ դեկտեմբերի 1-ից կդադարեցվի թուրքական թռչնամսի ներմուծումը: