Մարդիկ փորձում են գործընթացն օգտագործել իրենց կրքերն ամբողջացնելու համար. Գալուստ Սահակյան
ՀՀ Ազգային ժողովի նախագահ Գալուստ Սահակյանն այսօր լրագրողների հետ զրույցում անդրադառնալով «Նոր Հայաստան» հանրային փրկության ճակատի կազմակերպված հանրահավաքին, նշեց՝ նորմալ է գնահատում, որ հանրահավաք է կազմակերպվել:
«Դրա մեջ բոլորս մաս ունեք, սովորական բան պետք է դիտել։ Մենք հասել ենք նրան, որ մարդիկ ինչպիսի արտահայտման ձև էլ ունենան, կարողանան այն ներկայացնել հասարակությանը: Ինչը որ օրենքի շրջանակներում է, շատ բնական է: Սահմանադրական այս փոփոխությունները միտված են նրան, որպեսզի ամրապնդվի այդ ամբողջական գործընթացները և ցանկացած քաղաքական ուժ կարողանա կառավարման պրոցեսին մասնակից դառնա»,- ասաց Գ.Սահակյանը:
Հարցին, թե ինչպես է գնահատում Րաֆֆի Հովհաննիսյանի՝ ՀՀԿ գրասենյակի մոտ ծաղիկներ դնելու քայլը, Գալուստ Սահակյանը պատասխանեց. «Ծաղկեփունջ կարելի է դնել շատ տարբեր պարագայում: Կարելի է ծննդյան առումով, կարելի է նահատակների հիշատակին դնել, իսկ ծաղկեփունջ դնելու ամենաարդյունավետ մոտեցումը, որն ավելի գնահատելի է աշխարհում, դա երկրների նախագահները, խորհրդարանի նախագահները կամ վարչապետներն են դնում, որն ավելի մեծ բովանդակություն է ստանում»:
Լրագրողները հետաքրքրվեցին, թե ինչո՞ւ են իշխանությունները խոչընդոտում, որ մարզերից ավտոբուսները գան Երևան, և մարդիկ հնարավորություն ունենան հանրահավաքին մասնակցելու, Գալուստ Սահակյանը պատասխանեց. «Ես հիշում եմ, որ 88-ին, երբ զորքն էր կանգնած, մարդիկ էլի գալիս էին և իրենց տեսակետը հայտնում: Այնպես որ՝ պետք չէ պատճառներ բերեք, ոչ էլ այս սահմանադրության ընդունումը կենաց-մահու խնդիր է: Կընդունվի՝ լավ, չի ընդունվի, կյանքը դրանով չի ավարտվում, պարզապես մարդիկ փորձում են դա օգտագործել իրենց կրքերն ամբողջացնելու համար»:
Ամփոփելով քարոզարշավը՝ ԱԺ նախագահը նշեց, որ շատ լավ էր՝ հակառակ կողմերը միասին ժողովրդի մեջ էին:
«Այստեղ չես կարող տրամաբանորեն դիտարկել, թե սա մրցակցություն էր և ով հաղթեց: Կարևորն այն էր, որ քաղաքական մշակույթ է ձևավորվում, և դա շատ դրական եմ համարում»,- ընդգծեց ԱԺ նախագահը:
Դիտարկմանը, թե չի՞ կարծում, որ «ոչ»-երը գերակշռում են, Գ.Սահակյանը պատասխանեց, թե շատ կլինեն՝ կասենք ոչ:
«Որևէ բան չի տապալվելու, սա անձերի խնդիր չէ, կառավարման մոդել է, մի ձևից մյուսին անցնելը, սրա տապալելը ո՞րն է։ Մենք ասում ենք, որ սա հնարավորություն է»,-նշեց նա:
Հարցին, թե չի՞ կարծում, որ ՀՀԿ-ի քարոզարշավը պասիվ է, ԱԺ նախագահը բացասական պատասխան տվեց. «Չեմ կարծում, որ սա ՀՀԿ-ի բեռն էր, սա այն քաղաքական ուժերի բեռն էր, որ տարիներ շարունակ պայքարում էին՝ գործի այս մոդելը, պարզապես ՀՀԿ-ն միացավ այդ գործընթացին: Այնպես որ չեմ կարծում, որ սա կյանքի ու մահու խնդիր է, որ ասենք՝ ո՛չ ռեժիմին, մա՛հ ռեժիմին, ո՞ր ռեժիմին, ի՞նչ ռեժիմին՝ անհայտ է»:
Արձագանքելով «Նոր Հայաստան» փրկության ճակատի գործողություններին ու կոչերին, Գ.Սահակյանն ասաց. «Նախ փրկություն բառը չեմ ընդունում, դա ֆանատիզմ է պարունակում: Այսպիսի պահերին խորհրդարանը, մասնավորապես՝ նրա նախագահը, պետք է ամեն ինչ անի, որպեսզի կայուն պրոցեսներ ապահովվեն, դրա համար չեմ ուզում գնահատականներ տալ»:
Դիտարկմանը, թե «Նոր Հայաստան»-ն ասում է, որ «Հեղափոխությունն սկսված է», ԱԺ նախագահը պատասխանեց. «Հայտարարեցին, որ հեղափոխությունը սկսված է, երկիշխանություն է, բայց երկրորդ իշխանության իշխաններին չտեսանք»:
Հարցին, թե հնարավո՞ր է` Մարտի 1-ի կրկնություն լինի, Գալուստ Սահակյանը պատասխանեց, որ «այն ժամանակ ավելի ամուր քաղաքական գործիչներ էին և գիտեին, թե որ մասում ինչպես սկսեն ու ինչ արդյունքներ ապահովեն, բայց այս ուժը ավելի շատ քաղաքացիական է, քան քաղաքական»:
Լրահոս
Տեսանյութեր
Բագրատ Սրբազան. Գիտենք թշնամու ախորժակը և այն, թե մեր իշխանություններն ինչպես են վերաբերվում դրան