Արծվիկ Մինասյանը կարծում է, որ նոր Սահմանադրությունը վերջ կդնի նաև թշնամական մոտեցումներին
«Այո և Ոչ» ռեալիթի շոուի վերջին օրն է: Հարավային թևի մասնակիցներն այսօր հյուրընկալվել են Կոտայքի մարզկենտրոն Աբովյանում:
Դաշնակցական գործիչ, «Այո»-ի կողմնակից Արծվիկ Մինասյանը հավաքվածներին ասաց, թե ինչու է ՀՅԴ-ն կարևորում Սահմանադրական փոփոխությունների իրականացումը:
«Սահմանադրությունը՝ որպես մայր օրենք, հիմնական փաստաթուղթ կարևոր է պետության և քաղաքացու հարաբերությունները կարգավորելու տեսանկյունից: Եթե այդ փաստաթուղթն իր մեջ պարունակում է թերություններ, ոչ լիարժեք լուծումներ կամ պայմանավորում է որոշակի գործողությունների իրականացում այս կամ այն իշխանության ցանկությունից, ապա այն լիարժեք լինել չի կարող: Ցանկացած պահի կարող է ստեղծվել մի իրավիճակ, երբ իշխանությունը չցանկանա այս կամ այն քայլն անել»,-ասաց նա:
Հաջորդ գործոնը, որի համար նա կարևորում է փոփոխությունները, գործող Սահմանադրության կողմից՝ քաղաքացիների տնտեսական, մշակութային, քաղաքական ու այլ իրավունքների իրացման համար մեխանիզմներ չտրամադրելն է:
«Եվ վերջապես երրորդ պատճառը. եթե պետական մեխանիզմը Սահմանադրության մեջ լիարժեք չէ, այն հիմնված չէ փոխադարձ զսպումների համակարգի վրա, ապա պետական համակարգը չի կարող արդյունավետ գործել»,-ասաց նա:
Նրա խոսքով, յուրաքանչյուր ընտրությունից հետո դժգոհությունն ավելանում է, իշխանություններից ժողովուրդը դժգոհում է, «բայց որ ամենավատն է, այս դժգոհությունները ի վերջո չեն բերում են անհանդուրժողականության ավելացման, հաճախ հանդիպում ենք թշնամական երևույթների՝ ամեն ինչ պետք է վերցնեմ, որպեսզի կառավարեմ, ամեն ինչ պետք է ունենամ, որպեսզի լավ ապրեմ»:
Մինասյանն ասաց, որ նման մոտեցումները վերջ դնելու համար պետք է ազգովի կարողանանք քննարկել այս փոփոխությունները, որպեսզի ստեղծվող Սահմանադրությունը տա այդ հարցերի պատասխանները:
«Այս փոփոխությունները այդ հարցերին տալիս են լուծումներ, մենք կարող ենք քննարկել, թե այդ լուծումները որքանով են արդյունավետ, բայց ակնհայտ է, որ այս փաստաթուղթը առաջընթաց է գործող Սահմանադրությունից»,-ասաց դաշնակցական գործիչը: