Ձեր վստահելի աղբյուրը

Գյումրիում Ավետիսյանների ընտանիքի անդամների սպանության մեջ մեղադրվող Վալերի Պերմյակովի դատավարության ժամանակ լրագրողների համար հարմար պայմաններ ստեղծվելու են: Այդ մասին Գյումրիում լրագրողների հետ զրույցում ասել է Շիրակի մարզի ընդհանուր իրավասության դատարանի նախագահ Գագիկ Հովհաննիսյանը, փոխանցում է «Aravot.am»-ը:

Աղբյուրը տեղեկացնում է, որ Պերմյակովի նախորդ դատավարության ժամանակ, որը դարձյալ անցկացվել էր ՌԴ 102 ռազմաբազայում, լրագրողների համար բավական խոչընդոտներ էին ստեղծվել` չէին թույլատրել տեխնիկա տանել ներս, ասենք՝ համակարգիչ՝ օպերատիվ աշխատելու համար, բացի այդ, հավաքել էին հեռախոսները, իսկ դահլիճն այնքան փոքր է, զուրկ ակուստիկայից, որ ոչինչ լսել հնարավոր չէր: Նկարահանող խմբերն անգամ կանգնելու տեղ չեն ունեցել:

Շիրակի մարզի ընդհանուր իրավասության դատարանի նախագահ Գագիկ Հովհաննիսյանը լրագրողներին խոստացել է ամեն ինչ ապահովել լրագրողների օպերատիվ, անարգել աշխատանքի ու դատավարության թափանցիկության համար:

Ըստ աղբյուրի, նա վստահեցրել է, որ յուրաքանչյուր լրագրող կարող է ներս տանել իր համակարգիչը կամ հեռախոսը՝ օպերատիվ աշխատելու համար:

«Պարոն Հովհաննիսյանն ասաց նաև, որ ընդմիջման ժամանակ դրսում, ցրտին չկանգնելու համար, մտադիր են փոքր վրան խփել դատարանի դահլիճից դուրս, որտեղ, սակայն, դատավարությունը ուղիղ եթերով կհեռարձակվի: Այնպես որ, լրագրողը, որը մի պահ դուրս է եկել դատարանի դահլիճից, բաց չթողնի դատական նիստի այդ հատվածը: Լրագրողները, դժգոհելով, որ ոչինչ չի լսվում դատարանի դահլիճում, նրան առաջարկեցին դինամիկ ու 4 միկրոֆոններ տեղադրել դատավորի, փաստաբանների, մեղադրողի ու նաև ամբաստանյալի դիմաց, որպեսզի լսելի լինի վերջիններիս խոսքը ու հարմար լինի ձայնագրություն կատարելու համար: Թե ինչպես է կարգավորվելու լրագրողների մուտքը ռազմաբազայի տարածք, այս ու մի քանի այլ հարցերի պատասխաններ կհստակեցվեն երկուշաբթի օրը: Այդ օրը լրագրողների հետ դատարանի նախագահից բացի, կհանդիպի նաև դատական դեպարտամենտի նախագահը», -գրում է աղբյուրը: