Ձեր վստահելի աղբյուրը

ՀՀ կառավարության այսօրվա նիստում հավանության արժանացան Օրենսդրության կարգավորման ազգային կենտրոնի (ՕԿԱԿ) առաջարկները, որոնք վերաբերում են գյուղատնտեսության, անշարժ գույքի և ֆինանսների ոլորտները կարգավորող օրենսդրությանը:

ՕԿԱԿ-ը հանդես եկավ «Օրգանական գյուղատնտեսության մասին» օրենքի փոփոխության նախաձեռնությամբ, մասնավորապես՝ առաջարկելով լիազորել Հայաստանի Հանրապետության կառավարությանը սահմանել ճանաչված միջազգային կազմակերպությունների ցանկ, որոնք կարող են հավատարմագրել սերտիֆիկացման մարմիններին՝ հաշվի առնելով այն հանգամանքը, որ ոլորտում գործող կազմակերպությունները ներկայումս չեն կարող հավատարմագրվել Հավատարմագրման ազգային մարմնի կողմից, քանի որ այն չունի օրգանական գյուղատնտեսության ոլորտում համապատասխանության գնահատման գործունեություն իրականացնող ֆիզիկական ու իրավաբանական անձանց հավատարմագրելու փորձագիտական (տեխնիկական, մասնագիտական) հնարավորություններ:

Գյուղատնտեսության ոլորտում գործող օրենսդրության մեկ այլ փոփոխությամբ առաջարկվեց թափոնների անձնագրերի համաձայնեցման գործընթացները իրականացնել 15 աշխատանքային օրվա ընթացքում, ներկայումս գործող 30-օրյա ժամկետի փոխարեն և սահմանել, որ լիազոր մարմինը համաձայնեցման ներկայացված անձնագրի թերի լինելու կամ անճշտությունների առկայության դեպքում անձնագիրը լիազոր մարմին մուտք լինելուց հետո 5 աշխատանքային օրվա ընթացքում հետ է վերադարձնում լրամշակման:

Առաջարկվեց նաև բուսաբանական հավաքածուներ և առանձին նմուշներ ՀՀ տարածքից արտահանման թույլտվություն ստանալու համար դիմելու դեպքում լիազոր մարմին հայտի հետ միաժամանակ ներկայացվող փաստաթղթերի ցանկից հանել  ներմուծող երկրի համաձայնությունը կամ թույլտվությունը, ինչպես նաև բույսերի կարանտին իրականացնող համապատասխան լիազորված մարմնի կողմից տրված  թույլտվության վկայականը կամ սերտիֆիկատը, թույլտվությունների տրամադրման ժամկետը սահմանել աշխատանքային օրերով՝ 10-օրյա ժամկետը դարձնելով 7 աշխատանքային օր:

Մեկ այլ առաջարկով վայրի կենդանիներ և կենդանաբանական հավաքածուներ ու առանձին նմուշներ ՀՀ տարածքից արտահանելու համար դիմելու դեպքում լիազոր մարմին հայտի հետ միաժամանակ ներկայացվող փաստաթղթերի ցանկից հանվեց ներմուծող երկրի համաձայնությունը կամ թույլտվությունը, թույլտվությունների տրամադրման ժամկետը սահմանվեց աշխատանքային օրերով՝ 10-օրյա ժամկետը դարձնելով 7 աշխատանքային օր, ինչպես նաև սահմանվեց, որ թույլտվությունները տրամադրվում են հայտատուի կողմից նշված, սակայն 1 տարուց ոչ ավել ժամկետով:

Գյուղատնտեսական և արդյունագործական նպատակներով բնական կենդանական պաշարների օգտագործման մասին պայմանագրի կնքման գործընթացի ժամկետը կրճատվեց՝ 15-օրյա ժամկետը դարձնելով 10 աշխատանքային օր, սահմանվեց, որ լիազոր մարմինը հայտը ստանալուց հետո երեք աշխատանքային օրվա ընթացքում ստուգում է փաստաթղթերի ամբողջականությունը և փաստաթղթերը թերի լինելու դեպքում տեղեկացնում է հայտ ներկայացրած անձին` երեք աշխատանքային օրվա ընթացքում վերացնելու լիազոր մարմնի կողմից մատնանշված թերությունները, իսկ հայտը մերժելու դեպքում որոշումը կայացնելուց հետո երկու աշխատանքային օրվա ընթացքում պատշաճ կերպով ծանուցում է դիմում ներկայացրած անձին` նշելով մերժման հիմքերը, հնարավորություն ստեղծել հայտերը ներկայացնել առձեռն, փոստով կամ էլեկտրոնային փոստի միջոցով:

Անշարժ գույքի գնահատման գործունեության մասին օրենքի փոփոխությամբ առաջարկվեց Անշարժ գույքի գնահատողի որակավորման վկայականնները այսուհետ տրամադրել անժամկետ՝ հաշվի առնելով այն հանգամանքը, որ Անշարժ գույքի կադաստրի պետական կոմիտեի կողմից որակավորվող բոլոր այլ՝ քարտեզագրության, գեոդեզիայի, չափագրման (հաշվառման) և հողաշինարարության մասնագետները արդեն իսկ որակավորվում են անժամկետ:

«Հաշվի է առնվել նաև այն, որ գնահատողների որակավորման պահանջի հիմնանպատակը այդ բնագավառում բանիմաց, որակյալ մասնագետների ներգրավումն է, ինչը լիովին ապահովվում է որակավորման մեկանգամյա ստուգմամբ, միաժամանակ, գնահատողների աշխատանքների որակի նկատմամբ լիազոր մարմինը իրականացնում է հետևողական հսկողություն և ունի որակավորման վկայականի գործողության դադարեցման իրավասություն», - ասաց ՕԿԱԿ տնօրեն Արմեն Եղիազարյանը:

«Շատ կարևոր առաջարկություն է», - արձանագրեց ՀՀ վարչապետ Հովիկ Աբրահամյանը:

Մեկ այլ նախաձեռնությամբ առաջարկվեց փոփոխություններ կատարել «Պետական պարտքի մասին» ՀՀ օրենքում՝ ՀՀ ֆինանսների նախարարությանը իրավասություն տալ սահմանել ՀՀ պետական գանձապետական պարտատոմսերի առաջնային շուկայի մասնակիցների վարքագծի գնահատման և ընտրության կարգը, ընտրություն կատարել դրան համապատասխան առաջնային շուկայի մասնակիցների և պարտավորվել ապահովել դրանց չափանիշների հրապարակայնությունը: Օրենքով սահմանել նաև, որ Հայաստանի Հանրապետության պետական (գանձապետական) պարտատոմսերի թողարկման, տեղաբաշխման, շրջանառության, հետգնման և մարման կարգերը հաստատում է ՀՀ կառավարությունը, քանի որ փաստացի նման կարգեր կառավարության որոշմամբ հաստատվել են և գործում են, սակայն «Պետական պարտքի մասին» օրենքով նման իրավասություն տրված չէ: