Ձեր վստահելի աղբյուրը

ԱԺ պատգամավոր Էդմոն Մարուքյանը ուսումնասիրել է վարչապետ Հովիկ Աբրահամյանի ղեկավարած Կոռուպցիայի դեմ պայքարի խորհրդի մեկամյա գործունեությունն ու եզրակացրել` «կոռուպցիայի դեմ պայքարում ոչինչ չի արվել»:

«Ես ոչ մի աշխատանք չեմ տեսել, որ արվել է և որից Հայաստանի քաղաքացին իր մաշկի վրա կզգար, որ իշխանությունները պայքարում են կոռուպցիայի դեմ, կզգային փոփոխություններ», -Panorama.am-ի թղթակցի հետ զրույցում ասաց պատգամավոր Մարուքյանը:

Եվ որպես այլընտրանք նա և իր ղեկավարած «Լուսավոր Հայաստան» կուսակցությունը ներկայացրել են օրենսդրական նախաձեռնությունների փաթեթ, որը փետրվարի 2-ից դրվել է Ազգային ժողովում շրջանառության մեջ: «Տնտեսական մրցակցության պաշտպանության մասին», «Հանրային ծառայությունները կարգավորող մարմնի մասին», «Հեռուստատեսության և ռադիոյի մասին» և «Վերահսկիչ պալատի մասին» ՀՀ օրենքների նախագծերի փաթեթով Մարուքյանը կոռուպցիայի դեմ պայքարի այլընտրանքային ճանապարհ է առաջարկում, որը համարում է «մարտահրավեր կոռուպցիայի դեմ պայքարի խորհրդին»:

«Լուսավոր Հայաստան» կուսակցությունում վստահ են, որ փաթեթի ընդունումը կնվազեցնի ամենաբարձր մակարդակով իրականացվող հովանավորչությունը Հայաստանում, կապահովի որոշ պետական մարմինների պաշտոնատար անձանց քաղաքական չեզոքությունը:

«Այս ծրագիրը մարտահրավեր է և պետք է այնպես անել, որ այն դառնա օրենք ու բոլոր բացերը փակվեն: Առաջարկում ենք ոչ արդյունավետ ծախսերի մեխանիզմների սահմանափակում, ծախսերի պարագայում պատասխանատվության հարցի լուծում, չկա ոչ մի քայլ, ինչն արվել է, հօգուտ քաղաքացիների: Կոռուպցիայի դեմ պայքարի հարցում մարդկանց մոտ շարունակում է բացասական կարծիքը տիրապետող լինել, գոյություն չունի նման պայքար, ու ամեն միջոցառման ժամանակ դիվանագետները անընդհատ բարձրաձայնում են այդ հարցերը: Եվ բացի այդ, «Թրանսփարենսի ինթերնեյշընըլ»-ի զեկույցների համաձայն, կոռուպցիայի ինդեքսի առումով մենք շարունակում ենք մնալ ճահճի մեջ», -իր նախաձեռնությունը հիմնավորում է ԱԺ պատգամավորը:

Դիտարկմանը, որ փետրվարի 5-ին Կառավարության և ԱՄՆ ՄԶԳԾ-ի (USAID) միջև ստորագրվեց համաձայնագիր, որի շրջանակներում ամերիկյան կառավարությունը Հայաստանին կոռուպցիայի դեմ պայքարում տրամադրեց շուրջ 750 հզ ԱՄՆ դոլար, Մարուքյանը արձագանքեց. «Իսկ այլ մարմին, այլ ծրագիր կա՞ որ ԱՄՆ կառավարությունը աջակցի: Հայաստանի կառավարությունն ասում է` մենք կամք ունենք ու ուզում ենք պայքարել, նրանք էլ ասում են, դե եթե ունեք, եկեք, աջակցենք, պայքարեք: Եթե արդյունքներ չեղան պարզ է չէ՞ այդ ֆինանսական միջոցները կդադարեցվեն, ինչպես դադարեցվեց Հազարամյակի մարտահրավերներ ծրագիրը»:

Որոշ շրջանակներում կա տեսակետ, որ «Կոռուպցիայի դեմ պայքարի խորհրդի մեջ ընդգրկված են թաթախված պաշտոնյաներ» դիտարկմանը, Մարուքյանն ի պատասխան ասաց, որ իր կարծիքով, Կոռուպցիայի դեմ պայքարի խորհուրդը սխալ կառուցվածք ունի: 

«Գործադիր իշխանության ներկայացուցիչները չպետք է լինեն խորհրդի կազմում: Ինչպե՞ս կարող է որևէ կուսակցության անդամ հանդիսացող խորհրդի անդամը կամ նախագահն իրականացնել իր լիազորությունները նույն կուսակցության այլ անդամների կողմից ղեկավարվող պետական մարմիններում, որոնց թվում են նախարարություններ և այլ գերատեսչություններ ու մարմիններ, խուսափել շահերի բախումից և լինել անկողմնակալ», -հավելեց պատգամավորը:

Հարցին, թե դա պակա՞ս պայքար է ենթադրում երևույթի դեմ, պատգամավորը պատասխանեց. «Դա ենթադրում է զրոյական պայքար կամ ոչ մի պայքար, այսինքն` էլի իմիտացիա է. կա խորհուրդ, որն էլի իմիտացիայի արդյունք է` ցույց տալու համար, որ մենք ուզում ենք պայքարել կոռուպցիայի դեմ: Կոնկրետ արդյունքներ են պետք մեզ, որ ասեն` սա արել ենք, էս սողանքը փակվել է»: