Հայ ըմբիշները ևս երկու բրոնզե մեդալ են նվաճել Կիևի մրցաշարում
Հայաստանի ազատ ոճի ըմբշամարտի հավաքականի անդամներն ավարտել են իրենց ելույթներն Ուկրաինայի անվանի մարզիկներին ու մարզիչներին նվիրված միջազգային 20-րդ մրցաշարում:
Մրցումային վերջին օրը մրցագորգ էին դուրս եկել 61 կգ, 70 կգ, 86 կգ և 125 կգ քաշային կարգ ունեցող ըմբիշները:
Հայ ըմբիշներին հաջողվեց երկու բրոնզե մեդալ նվաճել:
61 կգ քաշային Վալոդյա Ֆրանգուլյանը մեկնարկային գոտեմարտում պարտվեց իրանցի ըմբիշ Մեհրան Նասիրիաֆրաչալիին, իսկ բրոնզե մեդալի համար պայքարում առավելության հասավ ուկրաինացի Պետրո Բիելիչուկի նկատմամբ:
70 կգ քաշային Վալտեր Մարգարյանը նունպես մեկնարկային գոտեմարտում պարտվեց իրանցի մարզիկի, սակայն բրոնզե մեդալի համար պայքարում հաղթեց ԱՄՆ-ի ներկայացուցիչ Աարոն Պիկոյին: Այս մասին հայտնում է ՀԱՕԿ-ի պաշտոնական կայքը:
Այսպիսով` Հայաստանի հավաքականի ըմբիշները հայրենիք կվերադառնան երեք բրոնզե մեդալով:
Մրցաշարին մասնակցում էին 6 երկրի ավելի քան 100 ըմբիշ:
Մրցաշարը մեկնարկել էր փետրվարի 13-ին և ավարտվեց փետրվարի 14-ին: