Ձեր վստահելի աղբյուրը

Այսօր հանրապետության տարածքում կա ավելի քան 750 հա ապակեպատ ու սինթետիկ թաղանթներով կառուցված ջերմատներ: Դրանցից 85 հա-ն ժամանակակից տեխնոլոգիաներով կառուցված ջերմատներն են: Panorama.am-ի հետ զրույցում նման թվեր ներկայացրեց գյուղատնտեսության փոխնախարար Գառնիկ Պետրոսյանը:

Նա դժվարանում է հստակ ասել, թե քանի ջերմոցատեր կա Հայաստանում. «Դրանք պատկանում են հազարավոր մարդկանց, որովհետև կան 140 քմ-ից սկսած մինչև մի քանի հեկտարանոց ջերմատներ»:

Նախորդ տարվա համեմատ ջերմատների մակերեսն ավելացել է. «Ջերմատների ավելացման բավականին լուրջ միտում կա: Հակապես հիմա խոշոր ջերմատնային տնտեսություններն են սկսում մեծ զարգացում ապրել: Յուրաքանչյուր տարի մի քանի տասնյակ հեկտարով ավելանում են: Այս տարի էլ նախնական տվյալներով սպասվում է շուրջ 40-50 հա մակերեսով խոշոր ջերմատների ավելացում»:

Ջերմատնային ոլորտի զարգացումը նախարարությունում համարում են հեռանկարային: Այս պահին, ասում են, հատկապես լոլիկի մեծաքանակ արտահանմամբ հետաքրքրված ռուսաստանցի բազմաթիվ գործարարներ են այցելում ու զանգահարում Հայաստան: 

Ջերմոցագործների միության նախագահը վերջերս հայտարարել էր, որ ջերմոցատերերը ջեռուցման հետ կապված խնդիրներ են ունենում, իսկ գազ ու էլեկտրաէներգիա մատակարարող ընկերությունները չեն ընդառաջում նրանց խնդրանքին ու չվճարման դեպքերում դադարեցնում են մատկարարումը: Խնդրի մասին նախարարությունում տեղյակ են: Բայց պետությունը ոչինչ ձեռնարկել չի կարող:

«Անընդհատ ասում եք, պետությունը, պետությունը, ի՞նչ պիտի անի պետությունը: Անցած տարի նույն միության նախագահը գրավոր դիմեց մեզ 4-5 տնտեսությունների համար: Մենք պաշտոնական գրություն ուղարկեցինք «Հայռուսգազարդ»՝ խնդրելով, որ այդ ընկերությունները որոշ ժամանակ հետո վճարեն պարտքը: Նրանք մեզ շատ քաղաքակիրթ ձևով պատասխանեցին. «Գիտե՞ք ինչ, այդ ընկերությունները կարող են դիմել բանկերին, վարկ ձևակերպել ու վճարումները կատարել: Հակառակ դեպքում մենք նույնպես կհայտնվենք դժվարին կացության մեջ»:

Գառնիկ Պետրոսյանի խոսքով, այս պարագայում ջերմոցատերերը պետք է կարողանան այնպես պլանավորել աշխատանքը, միջոցներ հայթայթել, որ կարողանան ժամանակին վճարումներ կատարել: Նա էներգակիրների բարձր գների պարագայում որպես հաջող օրինակ մատնանշում է խոշոր ջերմատները, որոնցում  էներգախնայող ու էներգակարգավորող սարքավորումներ են տեղադրված, դրանք կարողանում են շահույթով աշխատել: Նա որպես դրական արդյունք, մատնանշում է ՌԴ թարմ լոլիկի ու վարունգի արտահանման ծավալների կտրուկ ավելացումը:

Նման սարքավորումների ձեռքբերման համար ֆինանսական մեծ միջոցներ են հարկավոր, որոնք ոչ բոլոր գյուղատնտեսներն ունեն: Պետրոսյանը համամիտ է:

«Փոքր ջերմատները ծառայում են ուշ աշնանը կամ վաղ գարնանը բերք ստանալու համար: Դրանք հիմնականում դեկտեմբեր, հունվար, փետրվար ամիսների ընթացքում չեն շահագործվում: Այդ ամիսներին ջեռուցման ծախսերն ահռելի չափերի են հասնում: Հետևաբար, փոքրերի համար արդյունավետ չէ այդ ընթացքում ջերմատները շահագործելը: Նրանք ավելի ուշ են սկսում սածիլացում կատարել, նրանք  1-1.5 ամիս ավելի շուտ բերք կսկսեն հավաքել, քան դաշտում են ստանում բերքը»,-ասաց փոխնախարարը:

Պետրոսյանի խոսքով, պետք է ջերմատներն էլ շուկայի պահանջներին համընթաց շարժվեն: Այսօր ջերմատներում բացի վարունգից, պոմիդորից աճեցնում են նաև տարբեր տեսակի ծաղիկներ:

«Ծաղիկներ մշակողները բավականին լուրջ հաջողություններ ունեն, և ներքին շուկայի պահանջարկն են բավարարում, և բավականին մեծ ծավալով արտահանում են իրականացնում:  Վարդի նկատմամբ պահանջարկը բավականին մեծ է, շատ բարձրորակ վարդի տարբեր տեսակներ են արտահանվում: Անսպառ հետաքրքրություն կա տեղական ծաղիկների նկատմամբ: Մոտ 30 հա տարածքի վրա հիմնվել է ամսական բողկի արտադրություն, ոչ ստանդարտ մոտեցում է, մեկ ամսվա ընթացքում մի վեգետացիան ավարտվում է»-ասաց նա:

Պետրոսյանը չի համարում, որ հարևան Թուրքիայից լոլիկի ու վարունգի ներկրումը խանգարում է ջերմատների զարգացմանը: Ի դեպ, նախորդ տարվա հունվարի համեմատ Թուրքիայից լոլիկի ներկրման ծավալներն ավելացել են:

«Փետրվարի 8-ի դրությամբ այս տարի ներմուծվել է 23 տոննա լոլիկ և 16 տոննա վարունգ: Նախորդ տարվա նույն ժամանակահատվածում ներմուծվել է 1 տոննա լոլիկ և 38 տոննա վարունգ: Թուրքիայից ներկրված լոլիկի ինքնարժեքն ավելի ցածր է ստացվում, փոքր քանակությունները չեն կարող էական եղանակ ստեղծել: Գնային առումով ձմռան ամիսներին թուրքականը մրցունակ է, իսկ որակական առումով տեղականը մի քանի անգամ գերազանցում է թուրքականին»,-ասաց Պետրոսյանը: