Ձեր վստահելի աղբյուրը

Ռեժիսորներ Գաբրիել Օսորիոնի և Պատո Էսկալանի «Արջի պատմությունը», Փիթ Դոկտորի և Յոնաս Ռիվերաի «Գլուխկոտրուկը» անիմացիոն ֆիլմերը «Օսկար» 88-րդ մրցանակաբաշխության ժամանակ ճանաչվել են լավագույնները՝ համապատասխանաբար «Լավագույն անիմացիոն կարճամետրաժ ֆիլմ» և  «Լավագույն անիմացիոն լիամետրաժ ֆիլմ» անվանակարգերում:

Նկարիչ-անիմատոր Նաիրա Մուրադյանի կարծիքով, «Օսկար» մրցանակի առավել արժանի էին ռուս ռեժիսոր Կոնստանտին Բրոնզիտի «Մենք չենք կարող ապրել առանց տիեզերքի» կարճամետրաժ անիմացիոն ֆիլմը և բրազիլացի ռեժիսոև Ալե Աբրեուի «Տղան ու աշխարհը» լիամետրաժ անիմացիոն ֆիլմը:

«Հատուկ հասկանալի, ավելի շուտ ընթեռնելի մեսիջ ունեցող ֆիլմերն են ստանում մրցանակ, բայց կինոն միայն դաստիարակող ու պլակատային լինելով կորցնում է իր հմայքը ու չի վարակում ստեղծագործելու»,- պատասխանելով Panorama.am-ի հարցին, թե ի՞նչ չափանիշներ պետք է ունենան «Օսկարի» ներկայացված, հաղթած անիմացիոն ֆիլմերը, ասաց Ն. Մուրադյանը:

Ինչ վերաբերում է անիմացիայի ոլորտում նոր թրենդներին, անիմատորն ասաց. «Մի գուցե և կան նոր թրենդներ, բայց չեմ հետևում դրանց ու չեմ կարևորում»:

Պատասխանելով հարցին, թե անիմացայի մեջ ի՞նչն եք գնահատում, Ն.Մուրադյանը նշեց. «Անկեղծ ու հուզիչ պատմությունը հետաքրքիր նկարչական լեզվով պատմած, միակ թրենդն է, որ ժամանակից չի վախենում ու չի հնանում»:

Ի դեպ՝ վերջերս «Միրզոյան» գրադարանում նկարիչ, անիմատոր Նաիրա Մուրադյանի «Ամանոր» վերջին անիմացիայի ցուցադրությունն էր, որ անցավ «բիսով» ու ջերմ նստվածք թողեց։

 «Մենք չենք կարող ապրել առանց տիեզերքի»

 

«Տղան ու աշխարհը»