Վարորդը դատարանում հաղթել է ՃՈ-ին՝ սահմանելով փայլուն նախադեպ
Փաստաբան Ռուզաննա Ազրոյանը «Արմենիա» հեռուստաընկերության մոտ, Դավթաշեն-Եղվարդ ճանապարհին գերազանցել է սահմանված արագությունը՝ մեքենան վարելով 57 կմ/ժ արագությամբ: Մինչդեռ խճուղու վրա տեղադրված է 40 կմ/ժ արագություն սահմանող նշան: Այսինքն՝ այդ տարածքում 40 կմ/ժ-ից ավելի երթևեկելն արգելվում է: Փաստաբանը տուգանվել է Ճանապարհային ոստիկանության կողմից, չի վճարել տուգանքը և ավելին, վիճարկել է խախտման վերաբերյալ վարչական ակտը ու հասել հաղթանակի:
«Վարչական դատարանին հայց եմ ներկայացրել, որով խնդրել էի 40 կմ/ժ արագություն սահմանող նշանը, որպես վարչական ակտ, ճանաչել ոչ իրավաչափ: Եվ որպես ածանցյալ պահանջ, վերացնել իմ նկատմամբ տուգանքը», -Panorama.am-ի թղթակցի հետ զրույցում ասաց Ռուզաննան, ում համար մեծ ուրախություն էր Վարչական դատարանում ունեցած հաջողությունը:
Իր պահանջը փաստաբանը հիմնավորել է Ճանապարհային երթևեկության անվտանգության ապահովման մասին ՀՀ օրենքի համապատասխան դրույթներով ու դրան հետևող ենթաօրենսդրական ակտերով: Մասնավորապես, ըստ այդ օրենքի, երթևեկության կանոնները, ճանապարհային նշանները հաստատվում են կառավարության որոշմամբ, իսկ կառավարությունը 40 կմ/ժ արագություն սահմանող նշանի վերաբերյալ որոշում չունի:
«Կառավարության համապատասխան որոշմամբ, որով սահմանված են կանոնները, Երևանը բնակավայր է, որտեղ երթևեկելի արագությունը 60կմ/ժ արագությունն է: Այնտեղ հստակ նշված է, որ կարող են սահմանվել 20 կմ/ժ արագության նշաններ, օրինակ բակերում: Նաև նշված է, որ կարող է լինել 50 կմ/ժ արագության նշան: Այդ արագությամբ կարող են շարժվել այն մեքենաները, որոնք ունեն կցորդներ: Նաև այսպիսի նախադասություն կա՝ արագությունը սահմանափակող նշանները կարող են այդ արագությունը սահմանափակել միայն դեպի առավելագույնը: Սա նշանակում է, որ եթե Երևանում թույլատրելի առավելագույն արագությունը 60կմ/ժ-ն է, ապա դա կարող է սահմանափակվել միայն դեպի առավելագույնը: Երևանում կան փողոցներ, օրինակ Իսակովի պողոտայում առավելագույն արագությունը 70 կմ/ժ-ն է, այսինքն՝ 60 կմ/ժ-ն սահմանափակվել է դեպի առավելագույնը: Բայց դեպի նվազագույն սահմանափակումը իրավաչափ չէ», -ներկայացրեց մեր զրուցակիցը:
Նրա եզրակացությամբ, երկար տարիների ընթացքում երևանյան փողոցներում կանգնեցված 40 կմ/ժ արագություն սահմանող ճանապարհային նշանը տեղադրված է եղել ոչ իրավաչափ, այսինքն՝ անօրինական: Ստացվում է այն տարածքներում, որտեղ տեղադրված են այդ նշանները, արագությունը գերազանցած և տուգանված վարորդները ոչ իրավաչափ կերպով են տուգանվել:
Փաստաբանից հետաքրքրվեցինք, թե կարո՞ղ են այդ խախտման համար տուգանված վարորդները դիմել դատարան և հետ վերցնել գանձված գումարները, փաստաբանը պատասխանեց, որ նոր երևան եկած հանգամանքի հիմքով վարորդները կարող են փոխհատուցում պահանջել Ճանապարհային ոստիկանությունից:
Վճիռը, որը կայացրել է Վարչական դատարանի դատավոր Կարեն Ավետիսյանը, հրապարակվել է մարտի 29-ին, բայց դեռ օրինական ուժի մեջ չի մտել, իսկ դրա համար պահանջվում է 1 ամիս ժամանակ, եթե չի բողոքարկվում Վերաքննիչ դատարան:
Ազրոյանը ասաց, որ Վարչական դատարանը «օբյեկտիվ վճիռ է կայացրել, խորը վերլուծություն է կատարել», հետևաբար ՃՈ-ի կողմից վերաքննիչ բողոքը հաջողություն չի ունենա: Թեպետ վարորդը հույս ունի, որ ՃՈ-ն վերաքննիչ բողոք չի ներկայացնի:
Փաստաբանի խոսքով, իր հայցապահանջը, նման բնույթի, առաջինն է և այդ մասով որոշումը՝ աննախադեպ:
«Դեռևս սովետի ժամանակներից ու նույն սովետի օրենքներով իրոք, կար այդ 40 կմ/ժ արագություն սահմանող նշանը տեղադրելը օրինակ, դպրոցների մոտ: Այն ժամանակներից այդ ընկալումը եկել է և բոլորի ենթագիտակցության մեջ մնացել է այդպես», -նկատեց փաստաբան Ազրոյանը՝ ընդգծելով, որ գուցե լիազոր մարմինը՝ Ճանապարհային ոստիկանությունը, ուշադիր չի եղել ու նման բացթողում է եղել:
Նա հորդորեց բոլոր վարորդներին այս բնույթի խախտման համար չվճարել տուգանք, բողոքարկել խախտման վերաբերյալ ակտը, քանի որ անպայման կհասնեն հաջողության:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
