Հրապարակվել է ՄԻՊ զեկույցը
Այսօր հրապարկվել է ՀՀ մարդու իրավունքների պաշտպանի տարեկան հաղորդումը 2015 թվականի ընթացքում Պաշտպանի գործունեության, մարդու իրավունքների և ազատությունների պաշտպանության վիճակի մասին՝ համաձայն ՀՀ Սահմանադրության և «Մարդու իրավունքների պաշտպանի մասին» ՀՀ օրենքի պահանջների: Նման հայտարարություն է տարածել Մարդու իրավունքների պաշտպան Արման Թաթոյանը:
«Հաղորդմանը կից հրապարակվել է նաև Մարդու իրավունքների պաշտպանի՝ որպես կանխարգելման անկախ ազգային մեխանիզմի 2015 թվականի գործունեությունն արտացոլող զեկույցը:
Շնորհակալություն ենք հայտնում Մարդու իրավունքների պաշտպանի հաստատության հետ արդյունավետ համագործակցության, տեղեկությունների փոխանակման և իրավունքների ու ազատությունների պաշտպանության ոլորտի խնդրահարույց հարցերի վերհանման համար:
Հաստատակամ ենք շարունակելու մարդու իրավունքների պաշտպանության վիճակի բարելավմանն ուղղված մեր գործընկերությունը և սերտ հիմքերի վրա պահելու համատեղ աշխատանքի ամուր ավանդույթները»,-ասված է ՄԻՊ հայտարարության մեջ:
Զեկույցում նշվում է, որ հասարակությանը շարունակել են անհագստացնել հավաքների ազատության անհամաչափ սահմանափակումների, արդար դատաքննության, խոսքի ազատության, անձնական ազատության իրավունքների ոչ իրավաչափ սահմանափակման, կրթության իրավունքի իրացման, ընտանեկան բռնության, սելեկտիվ աբորտների, խտարականության դրսևորումների, սոցիալական ոչ բավարար երաշխիքների և այլ իրավունքների հետ կապված խնդիրները:
Դատախազությանը վերաբերող մասում նշվում է, մի շարք դեպքերում անձը, որպես վկա հայտնած տեղեկությունների հիման վրա կարճ ժամանակ անց նույն գործով ներգրավվել է որպես կասկածյալ կամ մեղադրյալ, ինչի պատճառով խախտվել են վերջինիս լռելու իրավունքը, ինչպես նաև անմեղության կանխավարկածը:
Պաշտպանի կողմից առաջարկվում է, բացառել որպես վկա անձի հայտնած տեղեկությունների հիման վրա վերջինիս նույն կամ մեկ այլ գործով որպես կասկածյալ կամ մեղադրյալ ներգրավելու պրակտիկան:
ՃՈ-ին վերաբերող հատվածում պաշտպանը նկատում է, որ ճանապարհային ոստիկանությունը մի շարք դեպքերով վարորդներին նշանակել է անհիմն տուգանքներ, նրանց անօրինական պահանջներ ներկայացրել, արձանագրված վարչական իրավախախտումների վերաբերյալ անձանց պատշաճ չի ծանուցել, անհիմն կատարողական վարույթներ է հարուցել ու կրկնապատկել վարորդների տուգանքները:
Առողջապահության նախարարության գործունեությանը վերաբերող հատվածում մասնավորապես նշվում է. «Կրկին արձանագրվել են մի շարք դեպքեր, երբ մինչև յոթ տարեկան երեխաները չեն ստացել անվճար կամ արտոնյալ պայմաններով դեղեր՝ իրազեկման պակասի, ինչպես նաև բուժաշխատողների կողմից դեղերի չտրամադրման պատճառով: Կրկին արձանագրվել են բուժաշխատողների կողմից պացիենտների նկատմամբ խտրական վերաբերմունքի դրսևորման դեպքեր»:
Աշխատանքի և սոցիալական հարցերի նախարարության վերաբերյալ ասված է. «2015թ.-ին սոցիալապես անապահով ընտանիքներին տրամադրվող օգնության համակարգում դեռևս արդի են մի շարք խնդիրներ, այդ թվում` չարաշահումներ, ավելորդ վարչարարություն, օրենսդրական բացթողումներ»:
Բացի այդ, Պաշտպանի զեկույցում ասվում է, որ 2015թ.-ի ընթացքում ևս չեն իրականացվել անհրաժեշտ և բավարար ծրագրեր՝ ուղղված երեխաների` ընտանեկան միջավայրում ապրելու իրավունքի ապահովմանը:
Շարունակել է չլուծված մնալ թափառաշրջիկ և մուրացիկ երեխաներին և նրանց ընտանիքներին երկարաժամկետ սոցիալական աջակցության և ծառայությունների տրամադրման, ապօրինի/հարկադիր աշխատող երեխաների հայտնաբերման և աջակցության հարցը:
Բնապահպանությանը վերաբերող մասում նշվում է, որ ապօրինի ծառահատումները 2015 թվականին դեռևս շարունակվել են, չնայած խնդրի մասին ահազանգել են թե՛ բնապահպանները, թե՛ Մարդու իրավունքների պաշտպանը՝ 2014թ.-ի իր տարեկան զեկույցում:
Զեկույցում ընդգրկված ոլորտներն ու ոլորտներում գրանցված թերություններն այս հրապարկման մեջ ամբողջությամբ ներկայացված չեն: