Ձեր վստահելի աղբյուրը

«Եթե Ադրբեջանը համաձայն չէ խաղաղ բանակցային գործողություններով գնալ կարգավորման, ապա ստիպված է լինելու գնալ պարտության վերահաստատման ճանապարհով»,-«Panorama.am»-ի հետ զրույցում անդրադառնալով Արցախի հանրապետության Ադրբեջանի հետ ունեցած սահմանի ողջ երկայնքով տեղի ունեցած ռազմական գործողություններին, նշել է քաղաքագետ Ալեքսանդր Մարկարովը:

«Ադրբեջանը 28 տարի աջ ու ձախ  փորձում է ցույց տալ, որ ինքը պաշտպանում է իր սեփական տարածքային ամբողջականությունը և անհասկանալի է, թե ինչու է այդ տարածքի մեջփորձում տեղավորել Արցախի հանրապետությունը»,- նշել է քաղաքագետը և հավելել, որ Ադրբեջանը փորձ է անում վերականգնել իր հսկողությունը այդ տարածքի նկատմամբ, իսկ այդ հարցում Ադրբեջանին օժանդակում է Թուրքիան:

«Եթե բանակցային գործընթացի մեջ չեն ուզում ներգրավվել, ապա նրանք փորձում են իրականացնել այլ քայլեր, օրինակ՝ մեկ այլ կողմի ներգրավել բանակցային գործընթացի մեջ, կամ անցնել այլ գործողությունների, այսինքն ամեն կերպ փորձել ցույց տալ, որ հարցն այլ կերպ լուծելու համար իրենք ունեն ինչ-որ ռեսուրսներ: Եթե դա դիտարկենք որպես փորձի տարբերակ, մենք կտեսնենք որ փորձը բացարձակապես չի հաջողվում, եթե դա դիտարկում ենք արտաքին դիտորդների վրա ճնշումներ գործադրելու տարբերակով, ապա արտաքին դիտորդը ճնշմանը դիմանում է և դրան պատասխանում է փոխադարձ ճնշումով»,- նշեց քաղաքագետը: 

Մարկարովի համոզմամբ, այսօրվա էսկալացիայի դրդապատճառն ընդհանուր առմամբ պարզ է՝ Ադրբեջանը փորձում է գտնել լուծումն այն տարբերակով, որը նպատակահարմար է իր համար, ինչը բնականաբար կարող է տալ բացարձակապես հակառակ էֆֆեկտ:

«Կա հայտնի ասացվածք, որ իրավիճակի վատացման դեպքում անհրաժեշտ է գտնել արտաքին թշնամի: Այս դեպքում հասկանալի է, թե ով կլինի Ադրբջանի համար: Սոցիալ տնտեսական վիճակից ուշադրությունը շեղելու դեպի այլ ուղղություն լավագույն միջոցը դա ռազմական գործողությունների ծավալումն է»,- նշեց նա և բացատրեց, թե ռազմական գործողությունների ծավալման արդյունքում ադրբեջանական կողմը չի գիտակցում, որ կստանա ոչ թե դրական այլ բացասական արդյունք:

Ռազմական գործողությունների ծավալման դեպքում փախստաանների քանակը, սոցիալ-տնտեսական վիճակի վատացումը և հիմնական եկամուտներից զրկումը ըստ քաղաքագետի, այն «ծաղկեփունջն» է որ կստանա Ադրբեջանը:

«Ռազմական գործողությունների ծավալման արդյունքում հայկական զինված ուժերի հակահարձակմաբ արդյունքում Ադրբեջանը ստիպված է լինելու խոսել ոչ թե մեկ միլիոն, այլ ավելի մեծ քանակի փաստականների, ինչպես նաև մեծաթիվ զոհերի մասին: Ռազմական գործողությունների սկսման հետ մեկտեղ կարելի է մոռանալ այն եկամուտների մասին, որոնք ստացվում են նավթից և գազից, քանի որ դրանք ամենից խոցելին են լինելու Ադրբեջանի համար»,- նշեց Մարկարովը: