Ս. Ֆարմանյան. «Պեդրո Ագրամունթը ԵԽԽՎ-ի ամոթն է»
ԼՂ հակամարտության գոտում լարվածության սրման հետ կապված ԵԽԽՎ նախագահ Պեդրո Ագրամունթի հայտարարությունը փաստում է նրա կողմնակալ վերաբերմունքը Ադրբեջանի նկատմամբ: Այս մասին իսպանական մամուլում հրապարակված հեղինակային հոդվածում գրում է ՀՀ ԱԺ պատգամավոր, ԵԽԽՎ հայկական պատվիրակության անդամ Սամվել Ֆարմանյանը:
Հեղինակը հիշեցնում է վերջերս ԵԽԽՎ-ում պրոադրբեջանական երկու բանաձևերի մասին՝ նշելով, որ դեռ այն ժամանակ ԵԽԽՎ-ում այդ բանաձևերին դեմ հանդես եկողները պնդում էին՝ նման միակողմանի բանաձևերը վնաս են հասցնում ԼՂ հակամարտության կարգավորնան խաղաղ գործընթացին և առիթ տալիս Ադրբեջանի ղեկավարությանը լայնամասշատաբ ռազմական գործողություններ սկսել՝ վտանգելով Հարավային Կովկասի փխրուն խաղաղությունը:
«ԵԽԽՎ-ում քննարկումների ժամանակ ես բարձրաձայնել էի այս բանաձևերի մասին՝ մտքումս ունենալով այսօր ծավալված զարգացումները: Մտահոգություններս արդարացան ԵԽԽՎ նստաշրջանից երկու ամիս անց: Ադրբեջանի ռազմական ուժերը պատերազմական գործողություններ ձեռնարկեցին շփման գծի ողջ երկայնքով և Հայաստանի սահմանին՝ թիրախ դարձնելով քաղաքացիական ենթակառուցվածքները և բնակավայրերը: Մեկ օրում պաշտոնական տեղեկություններով երկու կողմերից էլ տասնյակ զոհեր եղան: Ադրբեջանական զինուժը որդեգրեց Իսլամական պետություն ահաբեկչական կառույցի գործելաոճը՝ ռմբակոծելով դպրոցներ, սպանելով երեխաների, անմարդկայնորեն գնդակահարելով ծերերին՝ այդ ամենում ներառելով ԻՊ ճամբարներում մարզված մարտիկների»,- գրում է հեղինակը:
Վերջինս հիշեցնում է միջազգային հանրության, մի շարք երկրների կոչերն ուղղված Ադրբեջանին առ այն, որ ԼՂ հակամարտությունը չունի ռազմական լուծման ճանապարհ:
«Եթե Ադրբեջանի ղեկավարությանն ուղղված միջազգային հանրության ուժեղ և միաձայն կոչերը խաղաղության հասնելու հույսի պատուհան են, ապա պարոն Ագրամունթի միակողմանի և անպատասխանատու հայտարարությունը լուրջ մտահոգությունների տեղիք է տալիս՝ խաթարելով նաև այն կառույցի ժողովրդավարական կերպարը, որը նա ղեկավարում է: Ադրբեջանի հարցերով երկար ժամանակ ԵԽԽՎ-ում զեկուցող աշխատած և պարբերաբար մամուլի ուշադրության կենտրոնում կոռուպցիոն սկանդալների պատճառով հայտնվող մարդը միջազգային հանրությանը հակադրվում է ոչ միայն Ադրբեջանում մարդու իրավունքների պարբերական խախտումներն անտեսելով, այլ նաև իր ապակառուցողական և բացառիկ վտանգավոր հռետորաբանությամբ՝ պարզորոշ կերպով իրեն այս փխրուն խաղաղության պայմաններում նույնացնելով Ադրբեջանի հետ».- գրում է Ս. Ֆարմանյանը:
Հեղինակը դիտարկում է անում, որ ԵԽԽՎ նախագահի այս հայտարարությունը փաստում է նաև մամուլի հրապարակումներն այն մասին, որ վերջինս Ադրբեջանի լոբբիստների շարքերում է:
Լրահոս
Տեսանյութեր
Ձեր մկաններն ու մտքերը լարեք, որ շուտով պետք է անենք դա․ Բագրատ Սրբազան
