Ձեր վստահելի աղբյուրը

Այսօր Եվրոպայի խորհրդի խորհրդարանական վեհաժողովում ելույթ ուեցավ  Ավստրիայի նախագահ Հայնց Ֆիշերը։

Նախագահն իր ելույթում անդրադարձավ Եվրոպայի առաջ կանգնած խնդիրներին՝ ահաբեկչություններիին, միգրացիոն ճգնաժամին։ Նախագահի խոսքերով, ահաբեկչության նոր տարբերակը փորձում է սպանել հնարավորինս շատ մարդ, հնարավորինս դաժանորեն։ Եվրոպայում ստեղծված միգրացիոն ճգնաժամը, որը մեծապես ազդել է նաև Ավստրիայի վրա, նախագահի խոսքերով, չի կարող լուծվել առանձին երկրների կողմից, այլ անհրաժեշտ է համաեվրոպական մոտեցում։ 

Հայնց Ֆիշերն անդրադարձավ նաև Ռուսաստանի հետ հարաբերություններին, նշելով, որ 2 տարի առաջ, երբ կրկին հանդես էր գալիս ԵԽԽՎ-ում, այստեղ քննարկվում էր Ուկրաինայում, Ղրիմում ստեղծված իրավիճակի պատճառով ՌԴ պատվիրակությանը ձայնի իրավուքից զրկելու հարցը։

«Այսօր արդեն անցել է 2 տարի, սակայն խնդիրը, դժբախտաբար, շարունակվում է և չի լուծվել։ Կան որոշ դրական փոփոխություններ Մինսկի բանակցությունների հետ կապված, սակայն խնդիրը դեռևս արմատապես չի լուծվել»,-ասաց Հայնց Ֆիշերը։

Տեղեկացնելով, որ նախորդ շաբաթ հանդիպումներ է ունեցել  ՌԴ նախագահ Վլադիմիր Պուտինի և ԱԳ նախարար Սերգեյ Լավրովի հետ, Ֆիշերը նշեց, որ Ուկրաինայում իրավիճակի հարցը քննարկման առանցքում է եղել։

Նախագահը նշեց, որ ՌԴ-ն դժվար թե բավարաված է ստեղծված իրավիճակից, սակայն նաև դեռևս պատրաստ չէ ողջամիտ գին վճարել խնդրի լուծման համար, սակայն Ուկրաինան ևս պատրաստ չէ այդ գինը վճարել՝ այն է Մինսկի համաձայնագրի իրականացումը։

«Բոլոր կողմերը պետք է հասկական, որ առկա է կորելացիա՝ մի կողմից Մինսկի համաձայնագրի  իրականացումը, մյուս կողմից պատժամիջոցների վերացումը»,-ասաց Ֆիշերը:

Նախագահը կոչ արեց կարգավորել հարաբերությունները Ռուսաստանի հետ, որի համար ՌԴ-ն պետք է հասկանա, թե ինչ են իրականացնում իր եվրոպացի գործընկերները, իսկ Եվրոպան էլ պետք է հասկանա, թե ինչ է ուզում Ռուսաստանը։

Ֆիշերը նաև՝ որպես իր անձնական կարծիք, նշեց, որ այն քաղաքականությունը, որ Ուկրաինային կանխատեսելի ապագայում կարող է տանել դեպի ՆԱՏՕ-ին անդամակցություն, Ուկրաինայի, Ռուսաստանի և Եվրոպայի համար կունենա ավելի շատ բացասական, քան դրական արդյունքներ։