Ձեր վստահելի աղբյուրը

Նախորդ տարվա ընթացքում Վ. Ֆանարջյանի անվան ուռուցքաբանության կենտրոնում Վերահսկիչ պալատը 2015 թվականին կատարած ուսումնասիրությունների արդյունքում բազմաթիվ կոպիտ խախտումներ է հայտնաբերել:

Մասնավորապես, ինչպես Panorama.am-ը տեղեկանում է ՎՊ հաշվետվությունից, դեղերի գնումները կատարվել են կառավարության համապատասխան որոշման պահանջների խախտմամբ, խախտվել են նաև մատակարարից դեղը ստանալիս կամ ընդունելիս դեղի մնացորդային պիտանիության ժամկետների պահանջները:

Բացի այդ, դեղերի հաշիվ-ապրանքագրերում չի նշվել դրանց խմբաքանակի (սերիայի) համարը: Մատակարարի կողմից ներկայացված հաշիվ-ապրանքագրերում չի նշվել նաև մատակարարված դեղի սերիան (բացառությամբ` «Ռիխտեր Լամբրոն» ՍՊԸ-ի):

Բացի այդ, տեղեկանում ենք, որ Ուռուցքաբանության կենտրոնում իրականացված ստուգման ընթացքում քիմիաթերապիայի բաժանմունքի կողմից տրամադրվել են բուժման նպատակով հիվանդների կողմից ձեռք բերված և 14 օրվա ընթացքում օգտագործված քիմիաթերապևտիկ դեղամիջոցների դատարկ սրվակներ:

ՎՊ ուսումնասիրությամբ պարզվել է, որ այդ ժամանակահատվածում օգտագործված 691 սրվակ դեղամիջոցներից 293-ը ԱՆ «Դեղերի և բժշկական տեխնոլոգիաների փորձագիտական կենտրոն» ՓԲԸ-ի կողմից փորձաքննություն չեն անցել:

Ավելին, դրանցից 199-ը ՀՀ դեղերի պետական գրանցամատյանում ընդհանրապես գրանցված չեն եղել:

«Փաստորեն, ստուգման ընթացքում երկշաբաթյա ժամկետի կտրվածքով ստացված արդյունքները վկայում են, որ ուռուցքաբանության կենտրոնում քիմիաթերապևտիկ բուժման նպատակով հիվանդների կողմից բերված դեղերի շուրջ 42%-ի շրջանառությունը գտնվում է պետական վերահսկողությունից դուրս», -նշված է ՎՊ ուսումնասիրության մեջ:

Նշվում է նաև, որ վերահսկողության ընթացքում արձանագրվել են դեպքեր, երբ դեղատնային ցանցում ազատ շրջանառվում են դեղեր, որոնք Հայաստան են ներմուծվել ոչ օրինական ճանապարհով, դրանց ներմուծման օրինականության վերաբերյալ գրավոր տեղեկատվություն է ստացվել Դեղերի փորձագիտական կենտրոն ՓԲԸ-ից: 

Օրինակ՝ ռուսական «Թաթքիմֆարմպրեպարատի» ԲԲԸ-ի կողմից արտադրված «ORTOPHEN» 25մգ N30 /սերիա1480814/ դեղը վերահսկողության ընթացքում ազատ շրջանառվում էր դեղատներում, այն դեպքում երբ համաձայն «Դեղերի փորձագիտական կենտրոն» ՓԲԸ-ից ստացված տեղեկատվության նշված սերիայով օրինական ներմուծում չի եղել: 

Մակեդոնական «Ռեպլեկ Ֆարմ»-ի արտադրության Ֆոլաթթու /FOLIC ACID/ 5մգ N20 /սերիա 9424 և 9426/ դեղը վերահսկողության ընթացքում ազատ շրջանառվում էր դեղատներում, այն դեպքում, երբ համաձայն «Դեղերի փորձագիտական կենտրոն» ՓԲԸ-ից ստացված տեղեկատվության նշված դեղը գրանցված չէ ՀՀ-ում և նշված սերիաներով օրինական ներմուծում չի եղել: 

Վերահսկիչ պալատի հաշվետվությունը օրերս քննարկվել է ԱԺ Ֆինանսավարկային և բյուջետային հարցերի մշտական հանձնաժողովում և դրական եզրակացությամբ ընդգրկվել ապրիլի 25-ին մեկնարկելիք ԱԺ քառօրյա նիստերի օրակարգ: