Ձեր վստահելի աղբյուրը

Այսօր Երևանի պետական համալսարանի  եվրոպական ուսումնասիրությունների կենտրոնի դահլիճում տեղի ունեցավ հանդիպում Գերմանիայի Ֆեդերատիվ Հանրապետության Բունդեսթագի պատգամավոր, արտաքին հարաբերությունների հանձնաժողովի անդամ  Քրիստոֆ Բերգների հետ, ով հանդես եկավ Եվրոպական Միության հարևանության քաղաքականության մասին դասախոսությամբ:

Քրիստոֆ Բերգները Հայաստան է ժամանել ապրիլի 23-ին կայանալիք «Ընդդեմ ցեղասպանության հանցագործության» գլոբալ ֆորումին մասնակցելու նպատակով:

Հանդիպման ընթացքում տեղի ունեցած հարցուպատասխանի ընթացքում գերմանացի պատգամավորը անդրադարձավ Գերմանիայի կողմից Հայոց Ցեղասպանության ժանաչման հանգամանքին՝ նշելով, որ «Ցեղասպանություն» եզրույթից խուսափելու համար Գերմանիան ունեցել է մի շարք քաղաքական պատճառներ:

«1915թ-ի իրադարձությունների առումով Գերմանիայում մենք ունեցել ենք տարօրինակ իրադրություն. մի կողմից գրականությունն ու մշակութային լայն շրջանակները բարձրաձայնել են եղելությունը, ընկալել են այն ու որակել որպես Ցեղասպանությունը, մեծ ողբերգություն, մյուս կողմից քաղաքական գործիչներն այս առումով լռություն են պահպանել: Գերմանիայի քաղաքական գործիչները, որոնք ականատեսն են եղել Թուրքիայում կատարվող իրադարձություններին, փորձել են բարձրաձայնել այդ մասին. Գերմանիայի խորհրդարանը, որն այն ժամանակ  «Ռայխստագ» էր կոչվում, փորձեց բարձրաձայնել այդ փաստը, սակայն դա նրան արգելվեց մի քանի պատճառներով: Առաջին հերթին որովհետև Գերմանիան պատասխանատու էր մեծագույն ցեղասպանություններից մեկի՝ հրեաների հոլոքոստի համար և երկրորդ հերթին ցեղասպանության խնդրի շահարկումը բարձրաձայնում էր մի հարց, որի համար մենք բոլորս պատասխանատու էինք: Վերջապես կարևոր պատճառ էր նաև այն, որ Գերմանիայում ապրում է թուրքական խոշոր համայնք, որն ունի քաղաքական որոշումների վրա ազդելու մեծ կարողություններ:

Այդուհանդերձ 2005թ-ին Գերմանիայի Բունդեսթագը միաձայն՝ առանց գեթ մեկ դեմ ձայնի, հաստատեց մի բանաձև, որում մենք խուսափեցինք օգտագործել «Ցեղասպանություն» եզրույթը: Եթե համարձակ խոսեմ՝ ես ինքս խուսափեցի այդ եզրույթից, որպեսզի լինեմ մեծամասնություն ներկայացնող քաղաքական ուժի մաս: Բանաձևում «Հայոց Ցեղասպանություն» տերմինի փոխարեն կիրառվեց  «Հայկական կոտորածներ» ձևակերպումը:

Տասը տարի անց Բունդեսթագի օրակարգում կրկին հայտնվեց այդ բանաձևում «Ցեղասպանություն» եզրույթը ներառելու հարցը, ինչը, սակայն, կրկին տեղի չունեցավ պառլամենտական մեծամասնության և Գերմանիայի կառավարության միջև գործող կոնսենսուսի և քաղաքական փոխպայմանավորվածության շրջանակներում, թեև բոլորը հասկանում և գիտակցում են, որ դա Ցեղասպանություն է:

Այժմ մենք փորձում ենք վերջնականացնել ու ամբողջացնել այդ բանաձևը՝ դրանումներառելով «Ցեղասպանություն» եզրույթը, և ես կարծում եմ, որ շատ կարևոր է, որպեսզի Գերմանիան և գերմանական խորհրդարանը գնան այդ քայլին»,- նշեց Քրիստոֆ Բերգները: