Խորհրդարանական ընտրություններին ընդառաջ փորձելու ենք ներկայանալ որպես առանցքային քաղաքական բևեռ. Օսկանյան
«Մենք գտնում ենք, որ հաջորդ խորհրդարանական ընտրությունները շատ ճակատագրական ընտրություններ են լինելու, որոշվելու է մեր երկրի ապագան հաջորդ տասնամյակների համար»,-Ազգային ժողովում լրագրողների հետ զրույցում ասաց պատգամավոր Վարդան Օսկանյանը:
Հիշեցնենք, որ այսօր Վարդան Օսկանյանը հայտարարություն է տարածել, որով տեղեկացնում էր, որ նախաձեռնում են նոր՝ «Համախմբում» կուսակցության ստեղծման գործընթաց, ներկայացրել նախաձեռնող խմբի անդամներին:
«Գտնում ենք, որ առանձին-առանձին քաղաքական ուժերը, ովքեր նույն նպատակն են դրել իրենց առաջ, շատ ավելի մեծ դժվարություն կունենան արդյունքների հասնելու, փորձելու ենք միասին ճանապարհ անցել: Այդ համախմբման մեջ մենք կոչ ենք անում ժողովորդի համախմբումը քաղաքական ուժերի շուրջ, որպեսզի կարողանանք երկրում իսկապես արմատական փոփոխություններ բերել: Փորձելու ենք գնալ այդ համախմբմանը, որպեսզի կարողանանք հասնել արդյունքների», -նշեց նա:
Վ.Օսկանյանի խոսքով, ներկայանալու են այնպիսի ծրագրով, որ ժողովուրդը տեսնի՝ իսկապես խնդիրներ են լուծվելու:
«Մենք մեր առաջ հստակ նպատակ ունենք՝ կազմակերպվել, ծրագիր ներկայացնել, գնալ հաջորդ խորհրդարանական ընտրություններին, հասնել իշխանության ձևավորման և այդ ծրագրի իրականացմանը: Այսօր մեր երկրի առաջ ծառացել են բազմաթիվ լրջագույն խնդիրներ, որոք լուծումներ են պահանջում: Այսպես իսկապես հնարավոր չէ շարունակել: Մենք այդ ծրագրով հանդես կգանք, եթե ժողովուրդը հավանություն տա դրան, կարծում եմ, հնարավոր կլինի երկրում իսկապես իրավիճակ փոխել»,- ասաց Վ.Օսկանյանը:
Նա նշեց, որ համագումարի ընթացքում կորոշվի կուսակցության ղեկավարը, ղեկավար կազմը, ասաց, որ ՀՀ երկրորդ նախագահ Ռոբերտ Քոչարյանը կուսակցության հետ բացարձակապես կապ չունի:
Վ.Օսկանյանի խոսքով, այս նոր կուսակցությամբ իրենք նոր մշակույթ են բերելու կուսակցաշինության, կուսակցական գործունեության մեջ, լինելու են բաց, թափանցիկ, հնարավորություն են տալու յուրաքանչյուր անհատի, ով մաս կկազմի կուսակցության, իրեն դրսևորելու կուսակցության մեջ, ապահովելու են սերնդափոխությունը:
«Խորհրդարանական ընտրություններին ընդառաջ մենք փորձելու ենք ներկայանալ որպես առանցքային քաղաքական բևեռ և ընտրությունների օրերին հանդիսանալ ժողովրդի համար իսկական այլընտրանք իշխող քաղաքական ուժին: Այս ճանապարհին պատրաստ ենք համագործակցելու ցանկացած քաղաքական ուժի, հասարակական կազմակերպության, անհատների հետ, ովքեր իսկապես ուզում են հաջորդ խորհրդարանական ընտրությունների արդյունքում երկրում տեսնել արմատական փոփոխություններ»,- նշեց նա:
Վ.Օսկանյանն ասաց, որ իր քաղաքական գործունեության 25 տարիների ընթացքում որևէ մեկի հրաժարականը չի պահանջել, չի էլ պատրաստվում դա փոխել:
Պատասխանելով հարցին, թե ընտրությունների հետո հնարավո՞ր է ՀՀԿ-ի հետ կոալիցիա կազմել, նա ասաց, որ նման զարգացում չի պատկերացնում, էապես տարբերվում են իրենց մոտեցումները, ծրագրերը:
«Եթե մեզ հաջողվի այլընտրանքը լինել, ժողովուրդը համոզվի դրանում, կարծում եմ՝ մեր ծրագրով հանդես գանք, մեզ հետ համախոհ ուժերի հետ կարողանանք կառավարություն կազմել, ծրագրերն իրականացնել»,- ասաց Վ.Օսկանյանը:
Հարակից հրապարակումներ`
Լրահոս
Տեսանյութեր
Հայաստանում փոքրահասակ բնակչության շրջանում բավականին տարածված է գժախոտով թունավորումը. Ռ. Աբովյան
