Ձեր վստահելի աղբյուրը

Ժնևյան բանակցային գործընթացը տապալման եզրին է, քանզի, այսպես կոչված, Էր-Ռիադի պատվիրակությունը լքեց Ժնևը: Սիրիայի ներսում մեծ հաշվով փոփոխություններ չկան: Ժնևյան բանակցություններին զուգահեռ Սիրիայի Հալեպ նահանգում հակամարտող կողմերը սկսեցին կուտակել զգալի ներուժ, և վերջին օրերին Հալեպում և դրա շուրջ ընթացող ռազմական գործողություններն ավելի ինտենսիվ բնույթ են ստացել: Սիրիայի այլ հատվածներում տեղի ունեցող բախումները նույնպես շարունակվում են, և դժվար չէ կռահել, որ զինադադարն այլևս չի գործում (զինադադարի պայմանները չէին էլ գործել Սիրիայի զգալի հատվածի վրա): Սիրիական կառավարական ուժերը (բացառությամբ թերևս երկրի կենտրոնական հատվածում՝ Պալմիրայի ուղղությամբ և Հալեպի նահանգում ռազմական աննշան առաջխաղացմանը), ընդդիմադիր խմբավորումները, «Իսլամական պետությունը», քրդական ուժերը գտնվում են նույն դիրքերում, շատ չնչին փոփոխություններով:

Մերձավորարևելյան տարածաշրջանում (սիրիական խնդրի հետևանքով նաև առաջացած) ընթացող գործընթացները, Մերձավոր Արևելքից դուրս ստեղծված իրողությունները չեն հուշում, որ սիրիական ճգնաժամը շատ շուտ կավարտվի, քանզի Սիրիայով մտահոգված գերտերությունները զբաղված են սեփական ներքաղաքական զարգացումներով, և կարծես, սիրիական ճգնաժամի հանգուցալուծմանն ուղղված ակտիվություն չի նկատվում նաև հիշյալ պետությունների կողմից: 

Ժամանակն է գիտակցել, որ ժնևյան բանակցությունները, դրանցում ներգրավված կողմերի միմյանց նկատմամբ անհանդուրժողական վերաբերմունքն ու բանակցային սեղանին դրվող կողմերի համար անընդունելի պայմանների առկայությունը երկարաձգում են սիրիական հակամարտությունը:

Սիրիական խնդրի լուծումը պետք է իրականացվի գերտերությունների զինուժի անմիջական ներգրավվածությամբ, ցամաքային ռազմական գործողությունների տեսքով: Ըստ որում՝ այդ գործողությունների թիրախում պատք է լինեն առաջին հերթին այն կառույցները, որոնք ահաբեկչական են բնորոշվում Սիրիայով մտահոգ գրեթե բոլոր ուժերի կողմից:

Մյուս քայլը պետք է լինի Սիրիայում կրակի դադարեցման պարտադրանքն ու զինաթափումը: Սիրիայից պետք է հեռանան ներկայիս իշխանություններին սատարող և հակաիշխանական խմբավորումների անդամ հանդիսացող օտարերկրացիները: Հակամարտության մեջ ներգրավված սիրիական այն ուժերը (դիմադիր և ընդդիմադիր), որոնք չեն ընդունի կրակի դադարեցման պայմանները, պետք է անհապաղ մեկուսացվեն և ոչնչացվեն:

Ժնևներին պետք է վերջ տրվի: Դրսում ընթացող բանակցային գործընթացների նկատմամբ մշտապես բացասական ընկալում է եղել մուսուլմանների կողմից (այդ առումով պատմությունը հարուստ փորձ ունի): Միջազգային ռազմական ուժերի միջոցով Սիրիայում հաստատված զինադադարի պայմաններում պետք է բանակցություններ սկսվեն հենց երկրի մայրաքաղաքում՝ Դամասկոսում, հակամարտ կողմերի լայն ներգրավվածությամբ: Այն ուժերը, որոնք չեն միանա բանակցություններին, մեխանիկորեն վերածվում են հակասիրիական ուժերի, որոնց պետք է վտարել երկրից:

Հինգ տարի ընթացող ճգնաժամում տառապող Սիրիան արժանի է կայունության ու խաղաղության, իսկ  նման պայմանների առկայության դեպքում սիրիացիները ի վիճակի կլինեն գտնել ուղիներ խնդրի լուծման համար՝ Սիրիան թողնելով ամբողջական և միասնական:

Արաբագետ՝ Սարգիս Գրիգորյան