Վլադիմիր Մարգարյան. «Ադրբեջանցի մի քանի երկրպագուներ գոռում էին «Ղարաբաղ»
Ռիո դե Ժանեյրոյում կայանալիք օլիմպիական խաղերին մնացել է քիչ ժամանակ: Սա այն շրջանն է, որն ամենալարվածն ու ամենապատասխանատուն է օլիմպիադա մեկնող մարզիկների համար: Մարզումներ, ուսումնամարզական հավաքներ, ծանրաբեռնված գրաֆիկ, ֆիզիկական և հոգեբանական պատրաստվածություն, անհանգստություն, սպասելիքներ, հույզեր…
Ռիոյին անհամբեր սպասող մարզիկներից մեկն էլ բռնցքամարտիկ Վլադիմիր Մարգարյանն է, ով պատասխանատու այդ ստուգատեսին հանդես գալու իրավունքը նվաճել է Թուրքիայի Սամսուն քաղաքում ավարտված օլիմպիական վարկանշային մրցաշարում: Մեզ հետ զրույցում 69 կգ քաշային կարգում հիանալի մրցելույթներ ունեցած մարզիկը խոսել է Թուրքիայի մրցաշարի, օլիմպիական խաղերի և մարզաձևին վերաբերվող մի շարք հարցերի շուրջ:
«Թուրքիայում մեզ բավականին լավ ընդունեցին: Որևէ խնդիր չենք ունեցել: Անվտանգության աշխատակիցները մեզ գրեթե ամենուր ուղեկցում էին, սակայն առանց նրանց էլ ենք շրջել քաղաքում` թե «Armenian Boxing Team» մարզահագուստով, թե առանց դրա: Մարզադահլիճում ևս լարվածություն չկար` բացառությամբ մի քանի դեպքերի, երբ ադրբեջանցի որոշ երկրպագուներ մենամարտերի ժամանակ գոռում էին «Ղարաբաղ, Ղարաբաղ»,- պատմեց հայ բռնցքամարտիկը:
Հիանալի հանդես գալով Թուրքիայի Սամսուն քաղաքում ընթացող Եվրոպա աշխարհամասի օլիմպիական վարկանշային մրցաշարի մի քանի փուլերում, ցավոք, Վլադիմիր Մարգարյանը կիսաեզրափակչում պարտվեց իտալացի Վինչենցո Մանգիակապրեին: Նրա խոսքերով` մրցակիցը բավական փորձառու էր: Այնուհետև բրոնզե մեդալի համար պայքարում հայ բռնցքամարտիկն առավելության հասավ Մոլդովան ներկայացնող Վասիլի Բելուսի նկատմամբ:
«Նախկինում չէի հանդիպել Իտալիայի ներկայացուցչին: Նա տարիքով ավելի մեծ էր, շատ ավելի փորձառու, սակայն այնպես չէ, որ ինձ հաղթեց մեծ առավելությամբ: Մեր միջև շատ հետաքրքիր մենամարտ տեղի ունեցավ: Կարող եմ ասել, որ անցկացրածս բոլոր հանդիպումներից հենց իտալացու հետ մենամարտն է ինձ դուր եկել: Թեև պարտվեցի, բայց շատ հետաքրքիր դիմակայություն ստացվեց: Մոլդովացի մրցակիցը ևս շատ փորձառու էր: Մինչ ինձ հետ մենամարտելը նա հաղթել էր Եվրոպայի առաջնության եզրափակիչ դուրս եկած մասնակցին: Ուրախ եմ, որ կարողացա հաղթել նրան և արժանանալ բրոնզե մեդալի»:
Վլադիմիր Մարգարյանն արդյունքներից գոհ է, բայց, կարծում է, որ կարող էր անել ավելին, իսկ մենամարտերից յուրաքանչյուրն էլ փորձի փոխանակման առումով շատ կարևոր էր:
«Միշտ էլ կարող ես ավելին անել, բայց, ընդհանուր առմամբ, գոհ եմ: Իմ մրցակիցները բոլոր փուլերում շատ ուժեղ էին: Դա ինձ համար էր նաև կարևոր` ուժերի փորձարկման տեսանկյունից: Այժմ պատրաստվում ենք Ռիոյի օլիմպիական խաղերին: Այս ամիսը մարզումային տեսանկյունից համեմատաբար թեթև կլինի: Կմնանք Հայաստանում, վերականգնողական վարժություններ կկատարենք: Մինչ այդ մեծ ծանրաբեռնվածությամբ էինք աշխատում, իսկ այժմ մարզվում ենք ավելի թեթև գրաֆիկով: Այնուհետև գլխավոր մարզիչը կորոշի, թե որ քաղաքում կանցկացնենք ուսումնամարզական հավաքը: Ամենայն հավանականության, կմեկնենք արտերկիր: Այս պահին դեռ ոչինչ պարզ չէ»,- նշեց Մարգարյանը:
Մինչ ամառային օլիմպիական խաղերը բռնցքամարտի ևս մեկ վարկանշային մրցաշար տեղի կունենա Ադրբեջանում, սակայն հասկանալի պատճառներով Հայաստանի հավաքականը չի մասնակցի այդ ստուգատեսին:
«Ադրբեջան մեկնելն այս պայմաններում անիմաստ է ու ռիսկային: Առավել ևս սա պարզապես վարկանշային մրցաշար է. ոչ աշխարհի առաջնություն է, ոչ էլ Եվրոպայի: Գուցե լուրջ մրցաշար լիներ, պատասխանատվությունը մեծ լիներ, մտածեինք մեկնելու ուղղությամբ, բայց հիմա կորցնելու ոչինչ չունենք: Հասկանալի է, որ մեզ պարզապես չեն թողի հաղթել որևէ մենամարտում: Այնտեղ պայքարում են, որպեսզի նմանատիպ մրցաշարերում որևէ հայ մասնակից չհաղթի` որքան էլ ուժեղ լինի, որքան էլ լավ մենամարտի: Թուրքիայում, օրինակ, մի փոքր այլ էր: Ճիշտ է, որոշակի վիճելի պահեր եղան մրցավարության հետ կապված, սակայն, ընդհանուր առմամբ, ես գոհ եմ: Իմ մարտերում ամեն ինչ արդար է ընթացել: Երբ հաղթել եմ, որևէ մրցավար այդ հաղթանակը չի խլել ինձանից»,- նշեց հայ բռնցքամարտիկը:
Ռիոյի օլիմպիական խաղերից Վլադիմիր Մարգարյանը մեծ ակնկալիքներ ունի, սակայն կարծում է, որ հաջողության գրավականը յուրաքանչյուր մարզիկի մոտեցման և աշխատասիրության մեջ է. «Անհնարին ոչինչ չկա: Թուրքիայում կայացած մրցաշարը ևս մեկ անգամ հաստատեց, որ դա իրոք այդպես է: Սկզբում մտածում էինք, որ այնտեղ կկարողանանք ամենաշատը 1-2 ուղեգիր նվաճել, բայց, փաստորեն, բերեցինք չորսը: Նախօրոք չեմ ցանկանում կանխատեսումներ անել, սակայն մեծ հույսեր ունեմ: Ամեն ինչ կախված է նրանից, թե ինչպես կնախապատրաստվես: Կարևոր է պատրաստ լինել թե ֆիզիկապես, թե հոգեպես, իսկ դրա համար ունենք ընդամենը 2,5 ամիս: Հավատում ենք, որ ամեն ինչ լավ կլինի»:
Նրա հետ զրույցում պարզեցինք, որ կա մարզիկ, ում հետ վերջինս կցանկանար հանդիպել օլիմպիական խաղերի շրջանակներում:
«Եզրափակչում կցանկանայի հանդիպել աշխարհի կրկնակի չեմպիոն, Ղազախստանի ներկայացուցիչ Դանիար Իլյուսինովի հետ: Նա 69 կգ քաշային կարգում լավագույնն է: Ինչու չէի ցանկանա ավելի վաղ փուլում հանդիպել նրա հետ, քանի որ, հնարավոր է, վստահության պակաս զգացվեր, բայց եթե այդ մենամարտը տեղի ունենա եզրափակչում, ապա, վստահ եմ, շատ հետաքրքիր, լարված ու դիտարժան հանդիպում կստացվի»,- ասաց Վլադիմիր Մարգարյանը:
Հայ բռնցքամարտիկի խոսքերով` Հայաստանում կան բոլոր պայմանները մարզաձևի զարգացման ու առաջընթացի համար: Մնացածն արդեն կախված է մարզիկի կատարած աշխատանքից: Վլադիմիրը պատրաստ է մնալ այստեղ, մարզվել, աշխատել և, իհարկե, հաջողությունների հասնել:
Հարակից հրապարակումներ`
Լրահոս
Տեսանյութեր
Մատենադարանից երիտասարդական երթով դեպի համազգային հանրահավաք
