Ձեր վստահելի աղբյուրը

«Դեպի Արցախ տանող Սիսիանի ճանապարհը չի սպասարկում այն ընկերությունը, որի սեփականատերը ես եմ», -այսօր լրագրողների հետ ճեպազրույցում հայտարարեց ԱԺ փոխնախագահ Հերմինե Նաղդալյանը՝ պատասխանելով լրագրողի հարցին, թե ինչու Նաղդալյանի ընկերությունը չի բարեկարգում փոսերով ու անմխիթար վիճակում գտնվող Սիսիանի ճանապարհը, որի կարիքն այդքան զգացվեց ապրիլյան պատերազմի օրերին:

Նաղդալյանը տեղեկացրեց, որ սովորաբար ճանապարհի սկզբնամասում տեղեկացվում է, թե որ ընկերությունն է սպասարկում տվյալ ճանապարհահատվածը ու հավելեց.«Յուրաքանչյուր ճանապարհահատվածի սկզբում և վերջում մեծ տառերով ցուցանակ կա այն մասին, թե որ կազմակերպությունն է սպասարկում տվյալ ճանապարհը և պատասխանատու այդ ճանապարհի որակի համար: Եթե դուք, որպես լրագրող, պատասխանատու լինեիք, կտեսնեիք, որ այդ մեծ տառերով գրված ձեռնարկության անունը, որևէ կապ չունի այն ձեռնարկության հետ, որի սեփականատերը ես եմ»:

Հարցին, թե իր ղեկավարած ընկերությունը պատասխանատո՞ւ է գտնվել իր աշխատանքում, ԱԺ փոխնախագահը պատասխանեց. «Մեր ճանապարհները շահագործվում են և դրա համար կան պատասխանատու կազմակերպություններ և դա այն կազմակերպությունը չէ, որը ինձ է պատկանում, բայց քանի որ այս պատերազմական օրերին նաև անմիջապես ձնհալից հետո, ճանապարհը իրականում բավականին վատ վիճակում էր, մեր կազմակերպությանը խնդրեցի օգնել, աջակցել, որ ճանապարհը կարգի բերվի»:

Արդյունքում, ըստ Նաղդալյանի, «շատ կարճ ժամանակում» Սիսիան-Գորիս ճանապարհահատվածն ամբողջապես փոսալցվել է:

«Դա բացարձակ չէր մտնում մեր պարտականությունների մեջ, բայց մենք կարևորելով այդ ճանապարհի նշանակությունը, կատարել ենք: Պետությունը այս պահի դրությամբ գումար չի ծախսել, բայց կա կառավարության որոշում, որով նախատեսված է, որ այդ միջոցները կծախսվեն», -հավելեց Նաղդալյանը:

Լրագրողի հարցին, թե ինչպե՞ս է կարողանում համատեղել խորհրդարանական գործունությունն ու ճանապարհաշինարարությունը, Նաղդալյանը ի պատասխան, նախ ասաց, որ ինքը ճանապարհաշինարար չէ, հետո հավելեց.

«Եթե տեղյակ եք մեր երկրի օրենքներին, ապա յուրաքանչյուր պատգամավոր, ունենալով սեփականություն, ունենալով դրա իրավունքը, պարտավորված է այդ սեփականությունը հանձնել ինչ-որ մեկի կառավարմանը: Ձեռնարկությունն ունի իր տնօրենը, գործադիր մարմինը, որն իրականացնում է աշխատանքները, ես այդ սեփականությունը հանձնել եմ կառավարման: Այնպես որ որևէ օրենքի խախտում չկա»:

Նկատենք, որ Հայաստանի Սահմանադրությունն է արգելում պատգամավորին զբաղվել ձեռնարկատիրական գործունեությամբ: Նաղդալյանին պատկանող ընկերությունը «Սիսիանի ԲՈւԱՏ» ՍՊԸ-ն է: