Ձեր վստահելի աղբյուրը

Հայաստանի Ազգային ժողովում առաջին ընթերցմամբ ընդունված Ընտրական օրենսգրքի նախագծի` մինչև երկրորդ ընթերցում ընկած ժամանակահատվածը Վենետիկի հանձնաժողովը մի շարք դիտողություններ ու առաջարկություններ է ներկայացրել, որոնք հիմնականում ընդունվել են»

Այսօր ԱԺ պետական-իրավական հարցերի մշտական հանձնաժողովի նիստում կառավարության աշխատակազմի ղեկավար-նախարար Դավիթ Հարությունյանը ներկայացրեց, որ մասնավորապես ընդունվել է կոալիցիաներ ձևավորելու ժամանակահատվածի վերաբերյալ ՎՀ դիտողությունը:

«Մենք ենթադրում էինք, որ մինչև արդյունքների վերջնական հրապարակումը անցնում է յոթ օր և դրանից հետո երեք օրը բավարար է, սակայն առաջարկություն կա փոքր-ինչ ավել ժամանակ տրամադրելու: Մեր կարծիքով սկզբունքորեն կարող ենք լրացուցիչ երեք օր տրամադրել և երեք օր էլ նախատեսում ենք երկարաձգել եթե երկրորդ փուլ կա դաշինքների ձևավորման համար», -հայտարարեց Հարությունյանը:

Մյուս առաջարկությունը վերաբերում է ընտրացուցակների հրապարակմանը, որը ընդդիմության հիմնական պահանջն էր:

«Փաստացի մասնակիցների ցուցակները պահպանվեն մի կողմից, մյուս կողմից ձևակերպումն հետևյալն է` ստեղծել այնպիսի մեխանիզմներ, որ ողջամտորեն շահագրգիռ բոլոր կողմերը կարողանան արդյունավետորեն, բովանդակային ծանոթանան այդ ընտրացուցակներին», -ներկայացրեց Հարությունյանը և հիշեցրեց ԸՕ նախագծով իշխանությունների կատարծ փոփոխությունը, որի համաձայն տեխնիկական սարքի միջոցով քվեարկության ավարտից անմիջապես հետո տպվեն այն ընտրողների համարները, որոնք փաստացի մասնակցել են քվեարկության:

Այս փոփոխությունից հետո, ըստ նախագծի համահեղինակի, կատարել են «երկու կարևոր քայլ ևս»:

Ըստ այդմ, բոլոր վստահված անձինք, ստանալու են ոչ թե լուսանկարելու իրավունք, այլ ստանալու են այդ ժապավենը, իսկ դիտորդները և ԶԼՄ ներկայացուցիչները կարող են լուսանկարել:

«Դրանից հետո վստահված անձնանց հնարավորություն է տրվում ընտրովի ստուգել և ժամանակահատվածը ֆիքսված է` քսան րոպե ժամանակ է տրվում, թե որքանով է այդ ցուցակը համապատասխանում է իրական ցուցակին: Կարծում ենք` քսան րոպեն լիովին բավարար է, որ տարբեր հատվածներ ուղղակի ստուգեն ու պարզեն` համապատասխանում է, թե ոչ» , -նկատեց Դավիթ Հարությունյանը:

ԸՕ նախագծով նաև նախատեսել են իրավիճակ, երբ տեխնիկական խնդիրների պատճառով չի աշխատում ընտրացուցակը տպող սարքը: Այդ պարագայում նախատեսում են մեխանիզմ, երբ ընտրատեղամասում ներկա գտնված անձինք իրավունք ունեն դիմում գրել տարածքային ընտրական հանձնաժողով, որը կբավարարի, եթե չկա վերահաշվարկի դիմում:

«Եթե կա վերահաշվարկի դիմում, ապա առաջարկությունը հետևյալն է` վերահաշվարկին զուգահեռ պետք է իրականացվի ծանոթացում: Ուզում եմ ձեզ հիշեցնել, որ մեր գործընկերներից մի քանիսը հարցադրում էին անում` ասելով, որ վերահաշվարկին կարող է հերթ չհասնի, դա նշանակում է , որ մարդիկ կզրկվեն ստորագրված ցուցակներին ծանոթանալու հնարավորությունից:

Այդ իսկ պատճառով մենք նախատեսել ենք վերահաշվարկի երեք հերթեր` առաջին հերթը այն դեպքն է, երբ արձանագրության պատճենը, որ տրամադրվել է տեղամասային ընտրական հանձնաժողովի նիստին ներկա գտնվելող անձանց  և վերջնական արձանագրությունը հակասության մեջ են ու կան հակասող թվեր, այդ դեպքում առաջնահերթ է լինում վերահաշվարկը այդ տեղամասերում: Երկրորդ հեթին վերհաշվարկ կատարվում է այն տեղեմասերում, որոնց վերաբերյալ կա դիմում ցուցակին ծանոթանալու և սարքերն այնտեղ չեն աշխատել: Իսկ երրորդ հերթին վերահաշվարկ կատարվում են մնացած ընտրատեղամասերում, որոնց վերաբերյալ կան դիմումներ», -ներկայացրեց Հարությունյանը: