Ձեր վստահելի աղբյուրը

Եվրոպայի խորհրդի խորհրդարանական վեհաժողովի Հայաստանի հարցով համազեկուցողներ Ալան Միլն ու Ջուզեպպե Գալատին Հայաստանի բոլոր քաղաքական ուժերին կոչ են անում շարունակել ընտրական նոր օրենսգրքի շուրջ երկխոսությունը և գտնել փոխզիջում, որպեսզի հասնեն հնարավոր լայն կոնսենսուսի։ Այս մասին ասվում է մայիսի 11-12-ին Հայաստան կատարած այցից հետո համազեկուցողների հայտարարության մեջ։

«Նոր ընտրական համակարգը, եթե այն իրականացվի պատշաճ կերպով, Հայաստանի ժողովրդավարացման գործընթացը կարող է տանել դեպի նոր կարևոր փուլ»,-ասվում է համազեկուցողների հայտարարության մեջ։
Սակայն, միևնույն ժամանակ համազեկուցողները լիովին համակարծիք են Վենետիկի հանձնաժողովի օրենսգրքի բարդության հետ կապված մտահոգությունների հետ, որը կարող է ազդեցություն ունենալ ընտրական համակարգի նկատմամբ հանրային վստահության վրա, ինչը ժողովրդավարական ընտրություններ անցկացնելու համար առանցքային պահանջ է։

«Մենք, հետևաբար, ողջունում ենք  իշխանությունների պատրաստակամությունը շարունակել Վենետիկի հանձնաժողովի հետ սերտ համագործակցությունը, որպեսզի հաշվի առնվի նրա առաջարկություններն ու մտահոգությունները, ինչպես եղել է Սահմանադրական բարեփոխումների ընդունման ժամանակ»,-ասվում է հայտարարության մեջ։

Համազեկուցողների կարծիքով, Հայաստանում նոր քաղաքական համակարգի ներդրումը կարող է պոտենցիալ շահեկան լինել կուսակցություններին, ովքեր ցանկանում են համագործակցել և ընդգրկվել քաղաքական կոալիցիաներում,որը կարող է հակազդել «հաղթողը տանում է ամեն ինչ» մտածելակերպին, որը, ցավոք, գերակա է եղել Հայաստանի քաղաքական միջավայրում՝ երբեմն նրա ժողովրդավարական կոնսոլիդացիայի հաշվին։

Այս առումով, համազեկուցողներ մտահոգություն են հայտնում ընտրական օրենսգրքի նախագծում առկա դրույթների հետ կապված, որը կարող է արգելել երեքից ավել կուսակցությունների կառավարություն կազմել քվեարկության առաջին փուլից հետո, ինչը շատ քիչ ժամանակ է թողնում կուսակցություններին կազմել կառավարող կոալիցիա՝ մինչ ընտրությունների երկրորդ փուլի հաստատումը։ Համազեկուցողները, ուստի, ողջունում են ցուցումները, որ կոալիցիա կազմելու ժամանակահատվածը կարող է երկարացվել և կոչ են անում իշխող մեծամասնությանը՝ դիտարկել առաջին փուլից հետո կառավարություն կազմելու համար 3 կուսակցությունների սահմանափակումից հրաժարումը։

Լեռնային Ղարաբաղի հակամարտության հետ կապված՝ համազեկուցողներն իրենց մտահոգությունն են հայտնել ապրիլին ռազմական գործողությունների սրումից հետո շփման գծի երկայնքով շարունակվող լարվածության վերաբերյալ։ Նրանք ողջունել են ԵԱՀԿ Մինսկի խմբի համանախագահների հայտարարությունը, որ Հայաստանի և Ադրբեջանի նախագահները համաձայնել են ստեղծել միջադեպերի հետաքննության մեխանիզմներ ԵԱՀԿ հովանու ներքո, ինչը կարևոր է հրադադարի ռեժիմի ամրապնդման համար։

Համանախագահները նաև հայտարարել են․«Մենք տեղեկացվել ենք վերջին ռազմական գործողությունների ընթացքում վայրագությունների մեղադրանքների և հնարավոր պատերազմական հանցագործությունների մասին։ Այս զեկույցների վերաբերյալ պետք է անցկացվի լիարժեք և անկախ հետաքննություն, ցանկալի է ԵԱՀԿ Մինսկի խմբի շրջանակներում, և եթե հաստատվեն, ապա նրանք, ովքեր պատասխանատու են, պետք է ամբողջությամբ պատասխանատվություն կրեն և դատապարտվեն ազգային և միջազգային մարդասիրական և մարդու իրավունքների օրենքներով։ Եթե այս ամենը մնա առանց հետաքննության, ապա  այս զեկույցները կշարունակեն հակամարտության կողմերի միջև լինել անվստահության և լարվածության աղբյուր»։

Հայաստան այցի ընթացքում համազեկուցողները նաև անդրադարձել են կոռուպցիայի դեմ պայքարի հարցերին, որը շարունակում է լուրջ խնդիր լինել Հայաստանում։ Համազեկուցողները ողջունում են նոր օրենքի մշակումը, որը Բարձրաստիճան պաշտոնյաների էթիկայի հանձնաժողովին կարող է հնարավորություն տալ պատժամիջոցներ կիրառել ցանկացած բարձրաստիճան պաշտոնյայի նկատմամբ, ներառյալ պատգամավորների և կառավարության անդամների, ովքեր միտումնավոր չեն գրանցել կամ սխալ են գրանցել իրենց ակտիվների, ունեցվածքի, նվերների մասին տվյալները։ Միևնույն ժամանակ համազեկուցողները իշխանություններին կոչ են անում առավել ընդայնել պաշտոնյաների թիվը, որոնց վրա պետք է տարածվի էթիկայի, ունեցվածքի և շահերի բախման վերաբերյալ կարգավորումները։

Համազեկուցողներն Հայաստան ացի վերաբերյալ տեղեկատվությունը հունիսին ներկայացնելու են ԵԽԽՎ մոնիտորինգի հանձնաժողովին։ Համազեկուցողների հաջորդ այցը Հայաստան կլինի 2016թ․-ի աշնանը։