Ձեր վստահելի աղբյուրը

«Հարկային նոր օրենսգրքով ուզում են ԱԱՀ-ի շեմն իջեցնել 40 միլիոն դրամի, ինչը փոքր և միջին բիզնեսի համար կարող է կործանարար լինի»,- այս մասին այսօր լրագրողների հետ հանդիպման ժամանակ ասաց  «Կասեցում» շարժման ներկայացուցիչ Սամսոն Գրիգորյանը:

Նրա խոսքերով՝ ավելացված արժեք հասկացությունը չի կարող մանր բիզնեսի համար լինել աշխատելու միջոց: Բացի այդ, ԱԱՀ-ի դաշտում աշխատելու համար պետք են լավ իրավաբաններ, հաշվապահներ, որը փոքր բիզնեսը չի կարող իրեն թույլ տալ:

Սամսոն Գրիգորյանը նշեց նաև, որ նոր օրենսգրքով օրինակ՝ եթե տնտեսվարողի մոտ ստուգումներ  կատարվեն և հայտնաբերվեն խախտումներ, ապա ձեռներեցը պարտավոր է վճարել տուգանքը, եթե նույնիսկ դիմել է դատարան հայցով:

«Այսինքն՝ եթե տուգանքը կազմում է 5 մլն դրամ և տնտեսվարողն իր ամբողջ գումարը տալիս է տուգանքի վճարմանը, սակայն մեկ տարի հետո դատարանը պարզում է, որ իրականում տնտեսվարողը խախտում չի կատարել, դա տնտեսվարողի համար շատ ուշ կլինի. Նա իր բիզնեսն արդեն կորցրած կլինի»,- ընդգծեց  նա:

Ս.Գրիգորյանն ասաց նաև, որ նոր օրենսգրքով մեծ հնարավորություններ, արտոնություններ են տրվել տեսուչներին, ՊԵԿ-ի աշխատակիցներին: 

«Ինչքան ուզում են թող ամպագորգոռ բառեր ասեն, բայց մենք գիտենք, որ ամեն առավոտ ՊԵԿ-ի տեսուչները հավաքվում են ու որոշում, թե ինչպես տնտեսվարողին տուգանեն: Եւ եթե նման մեծ հնարավորություններ տան, ապա պարզ է, թե ինչ դժվարությունների առաջ կկանգնի տնտեսվարողը»,- ասաց Սամսոն Գրիգորյանը:

Ըստ նրա՝  խոսում են կոռուպցիայի, մոնոպոլիայի դեմ պայքարից, բայց ամենօրյա  շփումները հակառակն են ցույց տալիս: Օրինակ՝  ապրանք ներմուծողներից ստուգող մարմինները շատ հաճախ պահանջում են անհարկի ու անիմաստ թղթեր:

Սամսոն Գրիգորյանը նշեց, որ մինչև հիմա փոքր բիզնեսը միջնորդների օգնությամբ էր կատարում ներմուծումն ու բիզնեսի համար խնդիրներ չէր ստեղծվու:

«Սակայն վարչապետի հայտարարություններից հետո փորձել ենք օրինական դաշտում աշխատել, բայց կանգնել ենք ապառաժների առջև: Արդյունքում՝ օրինական ճանապարհով աշխատող բիզնեսը տուժում է: Մինչդեռ կոռուպցիայի դեմ պայքարելուց առաջ պետք է ամեն ինչ պարզեցնեն, որ տնտեսվարողը կարողանա աշխատել»,- ասաց նա: