Ապօրինի հարստացման քրեականացումը կարևոր գաղափար է, բայց կտա զրո արդյունք. Իշխանյան
Հայաստանի Հելսինկյան կոմիտեի նախագահ, իրավապաշտպան Ավետիք Իշխանյանը կարծում է, որ ապօրինի հարստացումը քրեակաանցնելու մասին օրենքը, որի ստեղծման վրա հիմա աշխատում են արդարադատության նախարարությունում, շատ լավ գաղափար է, բայց կարող է աշխատել միայն իրավական պետությունում:
«Եթե ընդունենք, որ այն ընդունվեց, Հատուկ քննչական ծառայությունը որևէ պաշտոնյայի դեմ քրեական գործ հարուցելո՞ւ է: Եթե վերևից ցուցում չլինի, որևէ պաշտոնյայի դեմ քրգործ հարուցելո՞ւ է, իհարկե, ոչ», -Panorama.am-ի թղթակցի հետ զրույցում ասաց իրավապաշտպանը:
Նշենք, որ Կոռուպցիայի դեմ պայքարի խորհուրդը, որը ղեկավարում է վարչապետ Հովիկ Աբրահամյանը, քննարկում էր ապօրինի հարստացումը քրեականացնելու մասին օրենք մշակելու հնարավորությունը:
Արդարադատության նախարարությունում աշխատանքային խումբը աշխատում է այդ օրենքի նախագծի վրա և հանձնարարվել է երկամսյա ժամկետում նախագիծ ներկայացնել կառավարություն, որտեղ հաստատվելուց հետո այն կներկայացվի ԱԺ: Panorama.am-ի թղթակցի հետ զրույցում օրինագծի վրա աշխատող խմբի անդամ «Իրավաբանների հայկական ասոցիացիա» ՀԿ-ի նախագահ Կարեն Զադոյանը ասել էր, որ օրինագիծը հետադարձ ուժ ունենալ չի կարող: «Այստեղ խոսքը գնում է ապօրինի ձեռք բերված ունեցվածքի բռնագրավման մասին: Իսկ քաղաքական հետապնդումներ չեն կարող լինել, քանի որ օրենքը խստացնող է և հետադարձ ուժ չի կարող ունենալ, այսինք՝ եթե որոշվի, որ այն ուժի մեջ է մտնում ասենք 2017 թվականից, բնականաբար այս բաժանարար գիծը գծվելու է այդ թվականին», -ասել էր Զադոյանը:
Նրա խոսքով, միջազգային կազմակերպությունները որպես առաջընթաց քայլ կներեկայացնեն դա, կգրեն իրենց զեկույցներում, որ Հայաստանում ապօրինի հարստացումը քրեականացվել է, բայց դա արդյունքներ չի ունենա:
«Այդ ամենը զրո արդյունքներ կտա», -արձագանքեց Իշխանյանը:
Կոռուպցիայի դեմ պայքարի խորհրդի մեջ երբ այն ստեղծվում էր քաղաքացիական հասարակությունը ներկայացնող կազմակերպություններ չընդգրկվեցին: Ավետիք Իշխանյանն ասաց, որ իր ղեկավարած կազմակերպությունը խորհրդի կազմում ընդգրկվելու համար հայտ չի ներկայացրել, որովհետև չի ցանկանում «ձևական մասնակցություն ունենալ»:
«Ես անձամբ ցավով եմ ասում, մեծ ցավով, բայց որևէ վստահություն չունեմ», -նկատեց իրավապաշտպանը:
Կոռուպցիայի դեմ պայքարը նա տեսնում է հասարակության մենթալիտետի փոփոխության մեջ: Նրա խոսքով, հասարակությունը հանդուրժողական է կոռուպցիոն երևույթների նկատմամբ ու ավելին, դրանց մասնակից:
Նրա կարծիքով, հասարակության շրջանում մտածողության փոփոխություն կարող են բերել երիտասարդական տարբեր շարժումները, որոնք անհանդուրժող են կոռուպցիայի նման արատավոր երևույթների նկատմամբ: «Դա կարող է հիմք լինել, որը կբերի մտածողության փոփոխության և իշխանության նկատմամբ ճնշումների, որպեսզի այս երկրում վերջապես բարեփոխումներ լինեն», -նկատեց իրավապաշտպանը: