Ձեր վստահելի աղբյուրը

Տավուշի մարզի Մովսես գյուղում խաղահրապարակի ուղղությամբ հակառակորդի կողմից «ԴՇԿ»-ով կրակ արձակելու դեպքի վերաբերյալ Մարդու իրավունքների պաշտպան Արման Թաթոյանը տեղեկություն է տրամադրելու Եվրոպայի խորհրդի և ՄԱԿ-ի Մարդու իրավունքների հանձնակատարներին, ՄԱԿ-ի Երեխայի իրավունքների կոմիտեին, ինչպես նաև Երեխաների օմբուդսմենների եվրոպական ցանցին։ 

ՄԻՊ աշխատակազմի տարածած հաղորդագրության մեջ նշվում է.

«2016 թվականի հուլիսի 20-ին՝ ժամը 17:10-ի սահմաններում ադրբեջանական զինված ուժերը խոշոր տրամաչափի զինատեսակներից կրակ են բացել ՀՀ Տավուշի մարզի Մովսես գյուղի ուղղությամբ: 

Կրակը բացվել է գյուղի դպրոցին մոտ գտնվող մարզադաշտում խաղացող 15-20 երեխաների ուղղությամբ: Այս մասին մեզ տեղեկացրել է Մովսես համայնքի ղեկավարը, ինչպես նաև այդ տեղեկությունները տարածվել են լրատվության միջոցներով:

Ադրբեջանի զինված ուժերի այս հանցավոր բնույթի նպատակային ոտնձգությունը կոպտորեն խախտում է միջազգային, այդ թվում՝ միջազգային մարդասիրական իրավունքի նորմերը: Դրանք հենց Ադրբեջանի ստանձնած միջազգային պարտավորությունների խախտում են: Յուրաքանչյուր երեխա կրակոցից կամ ցանկացած այլ ոտնձգությունից ենթակա է հատուկ պաշտպանության: Այդ պահանջը ենթակա է խիստ պահպանության առանձնապես խաղաղ բնակավայրերի, առավել ևս դպրոցների պաշտպանության առումով:

Ադրբեջանական զինված ուժերի այս ագրեսիվ արարքի վերաբերյալ տվյալները, նմանատիպ դեպքերը բացառելու ուղղությամբ համապատասխան միջոցներ ձեռնարկելու կոնկրետ առաջարկով, կփոխանցվեն Եվրոպայի խորհրդի և ՄԱԿ-ի Մարդու իրավունքների հանձնակատարներին, ՄԱԿ-ի Երեխայի իրավունքների կոմիտեին, ինչպես նաև Երեխաների օմբուդսմենների եվրոպական ցանցին»։

Ավելի վաղ Panorama.am-ի թղթակցի հետ զրույցում Մովսեսի գյուղապետ Արարատ Ավալյանը տեղեկացրել էր, որ հակառակորդը «ԴՇԿ»-ից կրակել է մասնավորապես դպրոցին հարակից խաղահրապարակի ու գերեզմանատան ուղղությամբ, որտեղ մարդիկ համեմատաբար շատ են եղել:

«Դպրոցին մոտ խաղահրապարակ ունենք, երեխեքը խաղալուց են եղել ըտեղ, կրակել են: Մեկ էլ գերեզմանատան ուղղությամբ են կրակել, որտեղ հուղարկավորություն էր: Արարողությունից հետո մի քանի անգամ կրակեցին մեքենաների ուղղությամբ: Մեքենաները չեն վնասվել, բայց մեկի մեքենայի անտենան ա խփել, կոտրել», -ասել էր պարոն Ավալյանը: