Ձեր վստահելի աղբյուրը

«Մենք ուրիշ զրույց ենք արել, ինքն ուրիշ բան է ներկայացնում: Այդպես չի կարող լինել»,-Panorama.am-ի հետ զրույցում ասաց  «Բերձոր» ժողգործիքների անսամբլի տնօրենի ժամանակավոր պաշտոնակատար Արարատ Սուջոյանը՝ անդրադառնալով Զարուհի Հակոբյանի հայտարարությանը: 

Հիշեցնենք, որ «Սասնա ծռեր» խմբի անդամ Մարտիրոս Հակոբյանի դուստրն այսօր հայտարարել է՝ իրեն առաջարկել են աշխատանքից ազատվելու դիմում գրել և դա պայմանավորել էր իր հայրիկի գործունեությամբ:

Սուջոյանը պատմեց, որ Հակոբյանի արձակուրդի ժամկետը վերջացել է հուլիսի 29-ին:

«Արձակուրդը վերջացել է, սակայն Զարուհի Հակոբյանը, ով համույթի երգիչն է, և քանոնահարը գործի չեն եկել: Ես այսօր զանգել եմ, ասում եմ՝  ո՞րն է պատճառը, ինչի՞ չես գալիս: Կարո՞ղ է բուլետեն ես բերելու, կարո՞ղ է գալու ես՝ բացատրագիր գրես, արդեն 25-26 օր է՝  բացակայում ես աշխատանքից»,- ասաց Ա. Սուջոյանը:

Տնօրենի ժ/պ-ի հավաստմամբ, բացակայության օրերին Զ. Հակոբյանը որևէ անգամ իր հետ կապ չի հաստատել՝ տեղեկացնելու բացակայության պատճառների մասին:

«Ես նույնիսկ ընթացքում՝ մոտ տասն օր առաջ մեկ անգամ էլ զանգել եմ իրեն, ասել եմ, աշխատավարձ էլ ունես, արձակուրդայինդ խի՞ չես գալիս ստանաս, փողը հետ է գնալու, պրոբլեմներ են առաջանալու: Ասեց՝ ես Երևանում եմ, կգամ, կասեմ՝ ինչ կա-չկա: Ինքը չի ներկայացել աշխատանքի վայր, չի ասել»,-ասաց Սուջոյանը:

Նրա խոսքով, հաջորդ հեռախոսային խոսակցությունը Զարուհու հետ եղել է այսօր առավոտյան:

«Շատ նորմալ աղջիկ է, շատ լավ: Ախր կոշտ էլ չեմ խոսացել հետը, շատ կուլտուրական, շատ քաղցր»,-ասաց տնօրենի պաշտոնակատարը:

Նա պնդում է, որ ինքը Զարուհի Հակոբյանին աշխատանքից ազատվելու վերաբերյալ դիմում գրելու առաջարկ չի արել:

«Ինքն է ինձ ասել, ես աշխատանքից ազատվելու եմ, որ եկա էլ, չեմ երգելու, այսինքն բացատրագիր գրելու անհրաժեշտություն չունեմ: Հարցնում եմ՝ այսինքն գործի չե՞ս գալու, ասում է՝ ոչ, դիմում կգրեմ, կազատվեմ»,-ասաց Սուջոյանը, ավելացնելով, որ միայն դրանից հետո, ասել է՝ ժամանակին դիմում գրեն, քանի որ ամիսը վերջանում է ու ֆինանսական հարցեր կան:

Տնօրենը պատրաստվում է Զարուհի Հակոբյանի աշխատանքի մնալ-չմնալու հարցը քննարկել իրավաբաների հետ:

«Եթե բացատրագիր չբերի, ես պետք է իրեն Աշխատանքային օրենսգրքի 113 հոդվածով ազատեմ:

Ամբողջ մի ամիս, եթե դուք գործի չգնաք, ձեզ հետ ինչպե՞ս կվարվեն ձեր կազմակերպությունում: Ես պետք է ամեն բան օրենքի շրջանակում անեմ»,-ասաց նա:
Հակոբյանի՝ լրագրողների հետ հանդիպման ժամանակ արած հայտարարությունից հետո Սուջոյանը խոսեց  նրա հետ:

«Հիմա էլ ասում է՝ ոչ, ես դիմում չեմ գրելու: Նեղացել է կոլեկտիվից, որ չեն զանգել, տեղեկանան ինքը ո՞նց է: Բայց դա ի՞նչ կապ ունի: Հիմա ասում է՝ ես չգիտեմ առավոտ ինչ եմ ասել, բայց հիմա դիմում չեմ գրելու: Ես իրան ասում եմ՝ ես քեզ նման բան եմ ասել՝ աշխատանքից ազատվելու»,-ասաց տնօրենի  պաշտոնակատարը:

Զարուհին Սուջոյանին ասել է, որ մի քանի անգամ դպրոց է գնացել, սակայն ոչ ոք տեղում չի եղել:

«Ըտենց բան չի կարող լինել, ես արձակուրդում եմ եղել, բայց միշտ այնտեղ եմ եղել: Ճիշտն ասած, հարմար չի ասելը, բայց 100 տոկոսով սուտ է խոսում: Եթե եկել էր, տեղում չէինք, թող զանգեր տնօրենին կամ որևէ աշխատակցի: Կարող է բանկ էի գնացել 10 րոպեով»,-ասաց Սուջոյանը: