Ձեր վստահելի աղբյուրը

Ազգային ժողովում ստեղծված հատուկ աշխատանքային խմբում դեռևս շարունակվում են ԱԺ կանոնակարգ նոր օրենքի մշակման աշխատանքները և սպասվում է, որ այն խորհրդարանում շրջանառության մեջ կդրվի սեպտեմբերի կեսին: Այդ մասին Panorama.am-ին տեղեկացրեց աշխատանքային խմբի ղեկավար, ԱԺ պետա-իրավական հանձնաժողովի նախագահ, Հանրապետական խմբակցության անդամ Հովհաննես Սահակյանը:

ԱԺ կանոնակարգ օրենքի փոփոխությունը, նկատենք, բխում է 2015 թվականի դեկտեմբերի 6-ին ընդունված Սահմանադրությունից: Հայաստանն այդպիսով անցում է կատարում խորհրդարանական կառավարման համակարգին, իսկ ԱԺ կանոնակարգ օրենքը անհրաժեշտ է խորհրդարանի գործունեությունը կանոնակարգելու համար:

«Սահմանադրության փոփոխությամբ խորհրդարանն ստանում է կարևոր դերակատարություն: Առանցքային պաշտոնների նշանակման հարցում խորհրդարանը մեծ դեր ունի՝ սկսած նախագահի ընտրությունից, վերջացրած վարչապետից ու դատական մարմինների ներկայացուցիչներից», -մեզ հետ զրույցում նշեց Սահակյանը:

ԱԺ կանոնակարգ օրենքի նախագիծը, որը ծավալով ավելի մեծ կլինի քան գործով օրենքը, Սահակյանի ներկայացմամբ, մատչելի  լինելու և կարգավորելու է խորհրդարանի ու դրա տարբեր մարմինների՝ հանձնաժողովների գործունեությունը:

«Մշակվող Կանոնակարգ օրենքի շրջանակներում առաջարկվող մեխանիզմներն այլ են. մենք այնպես ենք արել, որ այն լինի ավելի մատչելի, ավելի պարզ, որպեսզի թիրախային խմբի համար դրանից օգտվելը հեշտ լինի՝ նկատի ունենալով մեր հին փորձը, որ ԱԺ գործող կանոնակարգ օրենքում մեկ հարցի պատասխանը գտնելու համար երկար փնտրտուքի մեջ են ընկնում մարդիկ: Փորձել ենք բաժինների, գլուխների վերածել և ամեն հարցի պատասխանը տալ», -ասաց պատգամավորը:

ԱԺ կանոնակարգ օրենքի նախագիծը մեկ անգամ արդեն քննարկվել է Սահմանադրության բարեփոխումների ընթացքն ապահովող հանձնաժողովում, կարվեն փոքր շտկումներ և նախագիծը շուտով կներկայացվի ԱԺ խմբակցություններին, որից հետո կառավարությանը և այնուհետև կանցկացվեն քննարկումներ, լսումներ: Սպասվում է, որ օրինագիծը ԱԺ լիագումար նիստի քննարկմանը կներկայացվի հոկտեմբերին կայանալիք ԱԺ քառօրյա նիստերում:

Բայց մինչ այդ, Կանոնակարգ օրենքի մշակման վրա աշխատած աշխատանքային խումբը կայցելի Մեծ Բրիտանիա՝ ծանոթանալու խորհրդարանական կառավարման անգլիական փորձին, կխորհրդակցեն միջազգային փորձագետների հետ: Բացի այդ, խմբի անդամները եղել են Գերմանիայում, և Կանոնակարգ օրենքի նախագծի հիմքում որոշ իմաստով ընկած է գերմանական փորձը:

«Սա այն օրինագիծն է, որը պետք է ապահովի Սահմանադրության ողնաշարի գործունեությունը, քանի որ երկրում անելիքների մեծ մասը ընկնում է Ազգային ժողովի վրա», -հավելեց Սահակյանը:

Ինչ վերաբերում է ԱԺ կանոնակարգ օրենքով ընդդիմության լիազորություններին, ապա ըստ Սահակյանի, խորհրդարանում ընդդիմության դերակատարումը բարձր է սահմանվել Սահմանադրությամբ, իսկ ԱԺ Կանոնակարգ օրենքի նախագծով առաջարկվում են դրա գործունեության գործիքակազմեր:

«Օրինակ Սահմանադրությունն առաջարկում է մեկ ընդդիմադիր ԱԺ փոխնախագահ, մենք մշակել են դրա ընտրելու կարգը»,-նկատեց պատգամավորը: