Ձեր վստահելի աղբյուրը

Ինչո՞ւ պետք է հավատամ այն դատախազությանը, որի երկրից 25 տարվա ընթացքում 29 միլիարդ դոլար է  հոսել դուրս: Ինչո՞ւ պետք է հավատամ, բա ո՞վ է պետության շահերը պաշտապնել, ինչո՞ւ չի պաշտպանվել,- Ազգային ժողովում հայտարարեց «Օրինաց երկիր կուսակցություն» խմբակցության ղեկավար Հեղինե Բիշարյանը՝ խոսքն ուղղելով  ՀՀ գլխավոր դատախազի թեկնածու Արթուր Դավթյանին:

Ըստ նրա խոսքի՝ 25 տարիների ընթացքում ստեղծվել են պետականապաշտպան համակարգերը, սակայն արդյունքում կա՝ թելանված, կործանված, ծանր իրավիճակում հայտնված պետություն:

«Այսօր գիտե՞ք ինչն է զավեշտը՝ մոդա չէ, որ իշխանության մեջ պաշտոններում լինեն մարդիկ, ովքեր օֆշորում ունեցվածք չունեն»,- ասաց պատգամավորը:

Հ. Բիշարյանը խոսեց կադրերի ու կամքի փոխհարաբերության մասին ևս՝ այսօր պետք չէ խոսել կադրերի մասին, այլ կարևոր է կամքը, այն կամքը, որով պետք է երկրում բան փոխվի:

«Չպետք է խոսել մանր-մունր երևույթների մասին, կամ տեսեք՝ այս կադրը, այն կադրը Սինգապուր են ստեղծում: Սինգապուր ունենալու գաղտնիքը, ամենակարճ ճանապարհն ասեմ՝ հարկավոր է Հայաստան վերադարձնել 29 միլիարդ դոլարը»,- ասաց նա:

Հ. Բիշարյանի խոսքով, խմբակցության պատգամավորներն ազատ են  գլխավոր դատախազի ընտրության հարցում: