Ձեր վստահելի աղբյուրը

«Լուսավոր Հայաստան» կուսակցությունը սեպտեմբերի 18-ին կայացած տեղական ինքնակառավարման մարմինների ընտրություններում ավագանու թեկնածուներ է առաջադրել Նոյեմբերյանում, համայնքապետի թեկնածու Արմավիրի մարզի Ջրառատ գյուղում:  Նոյեմբերյանի ավագանու կազմում «Լուսավոր Հայաստան» կուսակցությունը կունենա 2 անդամ, իսկ Ջրառատում նրանց թեկնածուն՝ Արման Ղուկասյանը պարտվել է:

«Ինչպե՞ս ենընթացել ՏԻՄ ընտրությունները. ամփոփ գնահատականներ» թեմայով քննարկման ժամանակ կուսակցության  խորհրդի անդամ Դավիթ Խաժակյանը նշեց, որ Ջրառատում քվեարկության ընթացքում մի քանի խախտումներ են իրենք գրանցել, սակայն դրանց վերաբերյալ հանձնաժողովի նախագահը հրաժարվել է արձանագրություններ կազմել:

«Ընտրատեղամասի մոտ կուտակումներ կային: Մի քաղաքացի եկավ ու տեսավ, որ իր փոխարեն արդեն քվեարկված է: Հանձնաժողովի անդամը բացատրեց, որ տեղի է ունեցել շփոթմունք: Մենք պահանջեցինք արձանագրություն կազմել, սակայն հրաժարվեցին»,-տեսած ու գրանցած խախտումները թվարկեց նա:

Դ. Խաժակյանի խոսքով, քվեաթերթիկները հաշվելու ընթացքում տուփից դուրս են եկել դատարկ ծրարներ, բացի այդ էլ ավագանու ընտրության ծրարի մեջ եղել են համայնքապետի ընտրության  քվեաթերթիկներ:

«Գիտենք, որ դատարկ ծրարները կարուսելի հայտանիշն են: Մենք պահանջեցինք, որ հանձնաժողովն արձանագրություն կազմի: Այս անգամ էլ հրաժարվեցին: Տեսանյութով ֆիքսված է»,-ասաց նա, ավելացնելով, որ արձանագրություն կազմելու պահանջ էին ներկայացնում նաև դիտորդներն ու վստահված անձինք:

Հարցին, թե խախտումները որևէ կերպ ազդե՞լ են քվեարկության արդյունքների վրա, Դ. Խաժակյանը նշեց, հնարավոր է՝  էական ազդեցություն ունենային:

Նշենք, Ջրառատ գյուղում համայնքապետի գրանցված չորս թեկնածուներից «Լուսավոր Հայաստան» կուսակցության անդամ, ինքնաառաջադրված Արման Ղուկասյանն առավել քիչ թվով ձայներ է հավաքել: Նրան կողմ է քվեարկել 82 ընտրող:

ՀՀԿ-ական ինքնաառաջադրված գյուղապետ Սամվել Գալստյանի օգտին, ըստ ԿԸՀ հրապարակած տվյալների, քվեարկել է 647 ընտրող, անկուսակցական Հակոբ Մելքոնյանի օգտին՝ 394 ընտրող, անկուսակցական Տիգրան Խաչարյանի օգտին՝ 120 ընտրող: