Ձեր վստահելի աղբյուրը

Հոկտեմբերի 1-10-ը Երևանում առաջին անգամ կանցկացվի «Երևան օփեն» շախմատի միջազգային մրցաշարը, որին կմասնակցեն շուրջ 11 երկրների 132 շախմատիստներ: Միջազգային մրցաշարեր Հայաստանի տարբեր քաղաքներում շատ են կազմակերպվել, սակայն «օփեն» անվանմամբ անցկացվում է միայն Կարեն Ասրյանի անվան հուշամրցաշարը՝ Ջերմուկում:

«Երևան-օփենի» բացման հանդիսավոր արարողությանը քիչ ժամանակ է մնացել: Նախապատրաստական բոլոր աշխատանքներն ավարտվել են և այժմ սպասում ենք մասնակիցների ժամանմանը,- լրագրողների հետ հանդիպման ժամանակ տեղեկացրեց Երևանի շախմատի ֆեդերացիայի փոխնախագահ Նորայր Քալանթարյանը: 

Աշխարհի տարբեր երկրների տարբեր քաղաքներում անցկացվում են շախմատային նման մրցաշարեր: Հարևան երկրում նույնպես կա «Բաքու Օփեն» անվանումը կրող մրցաշար:

«Սեպտեմբերի 28-ին իրենց մոտ ավարտվեց այդ մրցաշարը: Սպասվում էր, որ Օլիմպիադայից հետո իրենք շատ ուժեղ կազմ կհավաքեն, բայց, համեմատելով մեր նախնական մեկնարկային մասնակիցների ցանկը, կարող ենք փաստել, որ մենք գերազանցում ենք իրենց՝ մասնակից ուժեղ և տիտղոսակիր շախտմատիստների առումով: Մասնավորապես, իրենց մոտ մասնակցել է 12 գրոսմայստեր, մեզ մոտ գրանցված են արդեն 23-ը»,- ասաց Քալանթարյանը:

Հաշվի առնելով այն հանգամանքը, որ հարևան երկրում «Բաքու օփենն» անցկացվում է մի քանի տարի շարունակ, իսկ մեզ մոտ՝ առաջին անգամ, իհարկե, սա մեծ հաջողություն է:  Հոկտեմբերի 1-ին, 18.00-ին, Հայաստանի շախմատի ակադեմիայի շենքում տեղի կունենա Բացման հանդիսավոր արարողությունը, որին ներկա կլինի նաև ՀՀ նախագահ, Հայաստանի շախմատի ֆեդերացիայի նախագահ Սերժ Սարգսյանը:

«Երևան Օփենն» անցկացվում է Էրեբունի-Երևան տոնակատարության շրջանակներում և ունի իր նպատակը, որի մասին խոսեց Նորայր Քալանթարյանը:

«Ուզում ենք ցույց տալ, որ շախմատով ևս կարող ենք ներկայանալ և հրապուրել զբոսաշրջիկներին, որպեսզի գան Երևան: Մարզական նպատակն էլ այն է, որ մենք ունենք բավականին տաղանդավոր շախմատիստներ, որոնք մրցաշարային պրակտիկայի պակաս ունեն: Իրենց համար բավական թանկ է նստում արտասահմանյան երկրներ մեկնելն ու միջազգային մրցաշարերի մասնակցելը, որպեսզի կարողանան մրցել աշխարհի ուժեղագույն շախմատիստների հետ և լրացնեն միջազգային նորմաներ: Մրցաշարի կարևորագույն արժեքներից մեկն այն է, որ մենք ունենք ՖԻԴԵ-ի պահանջներին բավարարող արտասահմանցի տիտղոսավոր շախմատիստներ, ինչը մեզ թույլ է տալիս սահմանել գրոսմայստերական և միջազգային վարպետի նորմաներ»,- ասաց Քալանթարյանը:

Panorama.am-ի թղթակցի այն հարցին, թե ընտրության հնարավորության դեպքում ո՞ւմ է տրվում միջազգային տնային այս մրցաշարին մասնակցելու իրավունքը՝ արտասահմանցի շախմատիստներին, թե՞ այդ նույն պրակտիկայի պակասն ունեցող հայ շախմատիստներին, Նորայր Քալանթարյանը պատասխանեց, որ բնականաբար, իրենց նպատակը երիտասարդ հայ շախմատիստներին իրենց տաղանդը բացահայտելու հնարավորություն տալն է:

«Եթե երեխան ընդունակություն ունի և առաջընթացի տեղ կա, գործուղում ենք տարբեր մրցաշարերի և առաջնությունների մասնակցելու: Այսինքն ոչ մի երեխա, ով ունի արժանիքներ և պոտենցիալ, ֆինանսական խնդիրների պատճառով չի զրկվի մրցաշարերին մասնակցելու հնարավորությունից:

Ինչ վերաբերում է դրսից հրավիրված շախմատիստներին, ապա մենք կոնֆենսացնում ենք միայն տոմսի արժեքը, մնացած ծախսերն իրենց վրա են: Մրցաշարային ֆոնդը կազմում է 16,000 ամերիկյան դոլար: Առաջին 15 տեղերը գրաված մարզիկների համար մրցանակներ են սահմանված, առաջին տեղը գրաված շախմատիստը կստանա 3000 դոլար: Կարծում եմ՝ մրցանակները մեծ մասամբ կմնան Հայաստանում»,- ասաց Քալանթարյանն ավելացնելով, որ Հայաստանից կմասնակցեն բոլոր ուժեղագույն շախմատիստները՝ բացառությամբ Կարեն Գրիգորյանի, ով Սերբիայի ակումբային առաջնությանն է մասնակցում, Գաբրիել Սարգսյանի ու Հրանտ Մելքումյանի, ովքեր ևս այլ մրցաշարերի են մասնակցելու:

Բացի «Երևան օփենից», հոկտեմբերի 1-2-ը Ծաղկաձորում տեղի կունենա «Շախմատային կրթության տեսական և գործնական հիմնահարցերը դպրոցում» անվանումը կրող միջազգային կոնֆերանսը: Այն կազմակերպում է Հայաստանի շախմատի ակադեմիան և ՀՀ կրթության և գիտության նախարարությունը: Կոնֆերանսի անցկացմանն աջակցում է շախմատի համաշխարհային ֆեդերացիան, Հայաստանի շախմատի ֆեդերացիան և Խաչատուր Աբովյանի անվան հայկական պետական համալսարանը: Այս մասին տեղեկացրեց Հայաստանի շախմատային ֆեդերացիայի գլխավոր քարտուղար Միքայել Անդրիասյանը, ով, ի դեպ, Հայաստանի շախմատի գործող չեմպիոն Զավեն Անդրիասյանի եղբայրն է:

«Այս տարի կոնֆերանսին մասնակցության հայտ են ներկայացրել շուրջ 20 երկրների ներկայացուցիչներ: Առաջին կոնֆերանսը տեղի է ունեցել 2014 թ.: Այդ ժամանակ այն կրում էր «Շախմատը դպրոցում» անվանումը: Մեծածավալ աշխատանք է կատարվել այս տարիների ընթացքում: 2011 թ. սկսած, երբ շախմատը ներդրվեց դպրոցներում որպես պարտադիր առարկա, Հայաստանի շախմատի ակադեմիայում և Խ. Աբովյանի անվան հայկական պետական համալսարանում բացվեց շախմատի ամբիոն:

2015 թ. Հայաստանի շախմատի ֆեդերացիայի փոխնախագահ Սմբատ Լպուտյանի նախաձեռնությամբ բացվեց շախմատի հետազոտման կենտրոն և թե կենտրոնի, թե ամբիոնի աշխատակիցները վերջին 3 տարիների ընթացքում անցկացրել են բազմաթիվ հետազոտություններ, որոնց արդյունքները կներկայացվեն կոնֆերանսի ժամանակ: Մեր մեթոդիստները, հոգեբաններն ու սոցիոլոգները կոնֆերանսի ընթացքում կներկայացնեն իրենց աշխատանքների արդյունանքերը:

Բացի այդ, մեծ գործունեություն է ծավալվում դպրոցներում, արդեն 10-րդ անգամ դպրոցականների շրջանում անցկացվում է դպրոցականների օլիմպիադա, որին մասնակցում են 15,000 աշակերտներ: Օլիմպիադան անցկացվում է 4 փուլով, և որպեսզի երեխաներին ավելի շատ մոտիվացնեն, այդ մրցաշարի հաղթողները մասնակցում են դպրոցականների միջազգային մրցաշարի, որը կրում է «Սպիտակ նավակ» անվանումը»,- ասաց Անդրիասյանը:

Ի դեպ՝ «Սպիտակ նավակ» մրցաշարին այս տարի հայ դպրոցականները մասնակցել են 2-րդ անգամ և գրավել են մրցանակային 3-րդ տեղը, իսկ նախորդ տարի Չեխովի անվան դպրոցի թիմը դարձել էր մրցաշարի հաղթող: