Ձեր վստահելի աղբյուրը

Այսօր առավոտյան Կապանի թիվ 38/6 ընտրատեղամասում , որտեղ ընթանում են ՏԻՄ ընտրությունուններ, տեղի է ունեցել  միջադեպ. «Քաղաքացիական պայմանագիր» կուսակցության կողմից ավագանու անդամի թեկնածու առաջադրված Մարինե Ղազարյանի վստահված անձը հավաստիացնում  է, որ ավագանու  թեկնածուներից մեկը ժամեր շարունակ գտնվել է ընտրատեղամասի տարածքում, ինչի իրավունքը չունի:

«Ավագանու թեկնածու Վահե Պետրոսյանը առավոտյան  9-ից մինչև մոտավորապես 12-ը շրջում էր տեղամասում: Մենք նկատողություն արեցինք իրեն, ես անձամբ տեղեկացրի այդ մասին հանձնաժողովի նախագահին,նա հարցերը լուծեց. Թեկնածուն հեռացավ, սակայն որոշ ժամանակ անց հագուստը փոխած վերադարձավ տեղամաս՝ պատճառաբանելով, թե եկել է քվեարկելու: Ես մի քանի անգամ նրան զգուշացրեցի 50 մետր հեռավորություն պահելու անհրաժեշտության մասին, սակայն նա բանի տեղ չէր դնում՝ պատճառաբանելով, թե իր ընկերոջ հետ է զրուցում, և այլն»,- «Panorama.am»-ի թղթակցի հետ զրույցում նշեց  «Քաղաքացիական պայմանագրի» կողմից առաջադրված թեկնածուի վստահված անձ Ալիսա Սարգսյանը:

Մեր հարցին, թե որ կուսակցությունից է Վահե Պետրոսյանը, վստահված անձը նշեց, որ նա ինքնաառաջադրվել է ու որևէ կուսակցություն չի ներկայացնում:

Նույն տեղամասի հանձնաժողովի նախագահ  Արամ Շահնազարյանը, մեզ հետ զրույցում, անդրադառնալով կատարված միջադեպին, նշեց. «Չեղած տեղից բաներ են սարքում, փորձում են մեկ բաժակ ջրում փոթորիկ ստեղծել: Թեկնածուն տեղամասում չի եղել, ինձ ասել են, որ տեղամասից դուրս է գտնվել ավագանու թեկնածուն, ես ճշտել եմ, թե ով է, մոտեցել եմ ու տեղյակ եմ պահել, որ նա պետք է հեռանա, և նա հեռացել է: Ինքը նաև այս տեղամասում ընտրելու իրավունք ունի, ուստի հեռանալուց հետո կրկին վերադարձավ՝ այս անգամ քվեարկելու նպատակով»:

Նշենք, որ մամուլում տեղեկություն էր տարածվել, թե թիվ 38/6 տեղամասում հանձնաժողովի անդամները վիճաբանել են, ինչին միջամտել է ոստիկանությունը: Այս կապակցությամբ հանձնաժողովի նախագահը նշեց.  «Հանձնաժողովի աշխատանքները առավոտից ընթանում են բնականոն հունով, փոքրիկ միջադեպեր են միայն եղել, որոնք որևէ ազդեցություն ընտրական գործընթացի վրա չեն կարող ունենալ: Մասնավորապես`  վստահված անձինք են բարձր տոնով իրար հետ խոսել, վիճաբանել են, ես անգամ չեմ էլ փորձել խորանալ եղելության մեջ, ընդամենը խնդրել եմ ոստիկաններին, որ միջամտեն ու կարգի հրավիրեն, իսկ հանձնաժողովի անդամների միջև որևէ կոնֆլիկտ չի եղել, կարծում եմ չի էլ լինի մինչև օրվա վերջ, որովհետև մենք իրար վաղուց ճանաչում ենք, ու մինչև  ընտրությունները պայմանավորվել ենք, որ ինչ էլ պատահի՝ մեր խնդիրը մեկն է՝ ապահովել արդար ու թափանցիկ  քվեարկություն»: