Ն. Զոհրաբյանը պահանջում է ԵԽԽՎ-ում հատուկ կարգով քննարկել Ադրբեջանում տեղի ունեցած խայտառակ սահմանադրական հանրաքվեն
Այսօր մեկնարկել է ԵԽԽՎ աշնանային նստաշրջանը, որի ընթացքում ելույթ է ունեցել ԲՀԿ խմբակցության ղեկավար Նաիրա Զոհրաբյանը, ով պահանջել է, որ ԵԽԽՎ-ն հատուկ կամ հրատապ կարգով քննարկի Ադրբեջանում սեպտեմբերի 26-ին տեղի ունեցած հակաժողովրդավարական սահմանադրական հանրաքվեն, որը Ադրբեջանը պաշտոնապես հռչակեց սուլթանատ։
ԲՀԿ մամուլի ծառայությունը տարածել է Նաիրա Զոհրաբյանի ելույթը.
«Ես կարծում եմ, որ մենք հրատապ կարգով ուղղակի պարտավոր ենք քննարկել Ադրբեջանում սեպտեմբերի 26-ին տեղի ունեցած Սահմանադրական փոփոխությունների հանրաքվեն։ Այդ հանրաքվեով Եվրոպայի Խորհրդի անդամ երկիրը պաշտոնապես վերածվում է սուլթանատի, և երկրի հիմնական օրենքով ամրագրվում է նախագահի աթոռը ժառանգությամբ փոխացնելու սուլթանատի հիմնական մոդելը։
Սահմանադրական փոփոխություններով սեփական պաշտոնավարումը 5 տարուց դարձնելով 7 տարի, իսկ նախագահի թեկնածուի համար նախատեսված տարիքային նվազագույն շեմը 35-ից դարձնելով 25 տարի, սրանով Ալիևը երկրի մայր օրենքով ամրագրեց իր պաշտոնավարումից հետո նախագահի աթոռը կրտսեր Ալիևին փոխանցելու դրույթը։ Եւ չնայած թե դեռևս ազատության մեջ մնացած Ադրբեջանի մի քանի իրավապաշտպան կազմակերպությունները, թե «Մուսաֆաթ» կուսակցությունը, թե ԱՄՆ Պետդեպը և մի խումբ կոնգրեսականներ կոչ արեցին Սահմանադրական դատարանին դրական եզրակացություն չտալ Ալիևի հերթական բռնապետական թելադրանքին, սակայն սեպտեմբերի 26-ի հանրաքվեով Ադրբեջանը պաշտոնապես դարձավ բռնապետական սուլթանություն։
Հարգելի գործընկերներ, ես անգամ չեմ ցանկանում քննարկել, թե ինչ խայտառակ օրինախախտումներով է անցել հանրաքվեն։ Հույս ունեմ մեր Վեհաժողովը կքննարկի նաև ԵԽԽՎ դիտորդական առաքելության խիստ անհասկանալի գնահատականը, որ Ադրբեջանում հանրաքվեն անցել է բաց և թափանցիկ՝ արհամարհելով ԵԱՀԿ-ի եւ Վենետիկի հանձնաժողովի գնահատականները։
Առնվազն հասկանալի չէ, թե ինչպե՞ս են Վեհաժողովի մեր գործընկերները օրինակելի համարում մի հանրաքվե, երբ ամբողջ միջազգային մամուլը և անգամ ադրբեջանական որոշ լրատվամիջոցներ հրապարակել են հարյուրավոր փաստեր ընտրակեղծիքների վերաբերյալ. օրինակ, թե ինչպես են քվեարկության տարել քվեարկելու իրավունք չունեցող դպրոցահասակ երեխաների։ Ավելին, աշխարհի տարբեր երկրներում ապրող ադրբեջանցիները նշյալ երկրների ադրբեջանական դեսպանատների մոտ կազմակերպել են ցույցեր՝ «Ժողովուրդը թագավոր չի ուզում» պաստառներով։ Ու նման խայտառակությունից հետո հայտարարվում է, թե ադրբեջանցիների 91 տոկոսը կողմ է թագավոր ունենալուն։
Հարգելի գործընկերներ, այն, ինչ տեղի ունեցավ սեպտեմբերի 26-ին Ադրբեջանում, մեր կառույցում պետք է լրջագույն քննարկման առարկա դառնա։ Մենք լռեցինք, երբ Ալիևը սահմանադրական նախորդ փոփոխություններով նախագահ առաջադրվելու իրավունքը դարձրեց ցմահ, լռում ենք հիմա, երբ ԵԽ անդամ երկիրը պաշտոնապես հայտարարվում է սուլթանատ։
Ես պահանջում եմ, որ քվեարկության դրվի Ադրբեջանում տեղի ունեցած հակաժողովրդավարական սահմանադրական հանրաքվեն հատուկ կամ հրատապ կարգով քննարկելու հարցը»։
Նաիրա Զոհրաբյանը նաև վարման կարգով է ելույթ ունեցել, ով հայտարարել է, որ ԵԽԽՎ նախագահը, խախտելով ԵԽԽՎ կանոնակարգը, կամայական կերպով հերթական անգամ իրեն ցանկանում է զրկել ելույթի իրավունքից։
ԲՀԿ պատգամավորն իր ելույթում ասել է՝
«Հարգելի գործընկերներ,
ԵԽԽՎ նախագահ Պեդրո Ագրամունտը ԵԽԽՎ բոլոր նստաշրջաններում համառորեն խոչընդոտում է իմ ելույթներին՝ հանձնարարելով ԵԽԽՎ քարտուղարությանը իմ ելույթները ելույթ ունեցողների ցանկում գրել ամենավերջում։ Ավելին, այն, որ իմ ելույթները Ագրամունտին նյարդայնացնում են, այդ մասին նա փոխանցել է հայկական պատվիրակության ղեկավար Հերմինե Նաղդալյանին և ԵԽ-ում Հայաստանի նորանշանակ դեսպան Պարույր Հովհաննիսյանին։ Ավելին, Ագրամունտը իրեն իրավունք է վերապահում ԵԽԽՎ ամբիոնից հնչեցրած իմ ելույթները խմբագրել և իրեն ոչ հաճո հատվածները հանած տեղադրել Վեհաժողովի պաշտոնական կայքում, ինչի մասին ևս նա տեղեկացրել է մեր պատվիրակության ղեկավարին, նշելով, որ իմ լեքսիկոնը իր համար ընդունելի չէ։
Այսինքն, երբ ես ապրիլյան պատերազմի ժամանակ հայ զինվորին մորթած ադրբեջանցուն անվանում եմ երկոտանի կենդանի, դա մեծապես վիրավորում է Ագրամունտի զգացմունքները և նա իմ ելույթից հանում է նշյալ հատվածն ու նոր տեղադրել տալիս Վեհաժողովի կայքում։
Տեղեկացնում եմ ձեզ, պարոն Ագրամունտ, որ դուք գերազանցում եք ձեր լիազորությունները և զբաղված եք բացարձակ ինքնիրավչությամբ ու օրինախախտմամբ։ Տեղեկացնում եմ ձեզ, որ օրենքի ընձեռած բոլոր հնարավորություններով ես պայքարելու եմ ձեր ինքնիրավչության և կամայականությունների դեմ»։
Հարակից հրապարակումներ`
- «Արդյո՞ք սա է իրական ժողովրդավարությունը». Նաիրա Կարապետյանը ԵԽԽՎ-ում անդրադարձել է Ադրբեջանի հանրաքվեին
- Նաիրա Կարապետյան․ Ադրբեջանը ԵԽԽՎ-ում բարձրացնում է Հայաստանի «Իսկանդերների» հարցը