Ձեր վստահելի աղբյուրը

Վանաձորի տեխնոլոգիական կենտրոնն իր ուրույն դերակատարությունը կունենա Լոռու մարզի կյանքում՝ խթանելով բարձր տեխնոլոգիական կազմակերպությունների ներգրավումն ու հիմնումը հատկապես ՏՏ և ճարտարագիտության ոլորտներում: Կենտրոնի բացման արարողությունից  հետո լրագրողների հետ զրույցում նման կարծիք է հայտնել «Ձեռնարկությունների ինկուբատոր» հիմնադրամի  նախագահ Բագրատ Ենգիբարյանը:

Նրա խոսքով, Գյումրու տեխնոլոգիական կենտրոնի հաջողված օրինակով մշակվել և իրականացվել է  Վանաձորի տեխնոլոգիական կենտրոնի ծրագիրը:

Լոռու մարզպետ Արթուր Նալբանդյանը վստահություն հայտնեց, որ քաղաքի ու մարզի տնտեսության զարգացման գործում նման կենտրոնի ստեղծումը շրջադարձային քայլ է:

«21-րդ դարում առանց ՏՏ ոլորտի ճիշտ չէր լինի Վանաձորի և ընդհանրապես մարզի զարգացումը: Համոզված եմ և վստահ, որ Վանաձորի տնտեսության մեջ այս կենտրոնը շրջադարձային քայլ է, իսկ տնտեսության զարգացման դրական տեղաշարժը կտեսնենք առաջիկա տարիներին»,-լրագրողների հետ  ճեպազրույցում նշեց մարզի ղեկավարը:

Նալբանդյանի կարծիքով, կենտրոնն իր հետ զարգացնելու է նաև մնացած ենթակառուցվածքները:

«Այնպես որ մենք կենտրոնի հետ մեծ հույսեր ենք կապում: Կենտրոնի շնորհիվ  նաև կնվազի մարզից արտերկիր արտագնա աշխատանքի մեկնող երիտասարդների թիվը»,-ասաց նա:

Միջոցառմանը ներկա տրանսպորտի, կապի, տեղեկատվական տեխնոլոգիաների նախարար Վահան Մարտիրոսյանը Հայաստանի երրորդ քաղաքում նման կենտրոնի ստեղծումը կարևորեց մի քանի հանգամանքով՝ աշխատատեղերի ստեղծում, ուսումնական պրոցեսի ավելի խոր ուսումնասիրում, կադրերի պատրաստում:

«Լոռու մարզում սա կբերի տնտեսության այլ ոլորտների զարգացմանը: Կենտրոնում ներկայացված են սարքավորումներ, որոնք օգտագործվում են ամենատարբեր ոլորտներում»,-ասաց նախարարը:

Հիշեցնենք, կենտրոնի բացմանը ներկա ՀՀ նախագահին  զեկուցել են, որ կենտրոնի գործունեության ընթացքում առնվազն 150 թիմերի, ընկերությունների, գյուտարարների և անհատ ձեռներեցների տրամադրվել են բիզնես աջակցության ու խորհրդատվական ծառայություններ: Նախատեսվում է, որ Վանաձորի տեխնոլոգիական կենտրոնի գործունեության արդյունքում կձևավորվեն առնվազն 150 ուղղակի և 1000 անուղղակի աշխատատեղեր՝ շուրջ 300 հազար դրամ միջին ամսական աշխատավարձով, տարեկան կպատրաստվի և կվերապատրաստվի առնվազն 500 մասնագետ, աջակցություն կստանան տարեկան առնվազն 50 թիմ և կազմակերպություն։