Ձեր վստահելի աղբյուրը

Վերջին օրերին հատկապես առևտրականների շրջանում ակտիվորեն քննարկվում է, այսպես կոչված, «կարգոների» փակվելու լուրը: Դրանք այն կազմակերպություններն են, որոնք առևտրականներն իրենց բեռը հանձնում են ձեռքբերման երկրում և ստանում Հայաստանում` ծառայության համար վճարելով, ըստ բեռի քաշի, 6-8 դոլար՝ մեկ կիլոգրամը:Բայց պարզվում է` «կարգոների» հետ կապված խնդիրն իրականում միտումնավոր է այլ կոնտեքստում շրջանառվում:

«Ժողովուրդ»-ի տեղեկություններով՝ Վարդան Հարությունյանը ՀՀ ՊԵԿ նախագահ նշանակվելուց  հետո «կարգոներին» զգուշացրել է, որ այսուհետ իրենք երկու հարկ չեն վճարելու նախկին սկզբունքով: Բանն այն է, որ նախկին ՊԵԿ նախագահ Գագիկ Խաչատրյանի օրոք գործել է հարկման 2 տարբերակ. մեկը վճարվել է պետբյուջե, իսկ մյուսը, այսպես կոչված, «սև կասա»: Եվ  հիմա «կարգոներին» զգուշացվել է, որ գումարը վճարվելու է միայն պետբյուջե:

Այսինքն` առևտրականների վճարած գումարները որևէ կերպ չեն ավելանա: Բայց այս հեռանկարը «կարգոների» նախկին գործելաոճի հետ հարաբերություն ունեցող որոշակի շրջանակների համար, բնականաբար, ձեռնտու չէ, դրա համար էլ նրանք շրջանառության մեջ են դրել լուրերը, թե «կարգոներն» ընդհանրապես փակվում են, ինչը առևտրականների շրջանում կարող է լուրջ դժգոհություններ առաջացնել»:

Հետգրությամբ թերթը հավելել է. «Ժողովուրդ»-ը երեկ ներկայացրել էր Վարդան Հարությունյանի ունեցվածքը, որտեղ նշել էինք, որ նա 309 մլն դրամի բաժնետոմս ունի: Մեզ հաջողվեց պարզել, որ նրան է պատկանում «Գլաձոր ունիվերսալ վարկային կազմակերպություն» ՓԲԸ-ի բաժնետոմսերի 25,2 տոկոսը: Նշենք, որ «Գլաձոր ՈւՎԿ»-ն փաստացի կարելի է որակել որպես «գազի աշխատողների» կողմից հիմնադրված ընկերություն: Բանն այն է, որ ընկերության խորհրդի նախագահ Ալբերտ Խաչատրյանը «Գազպրոմ Արմենիային» պատկանող «Տրանսգազ» ՍՊԸ-ի տնօրենի տեղակալն է, խորհրդի անդամ Նիկոլայ Գաբրիելյանը, որը «Գլաձոր ՈւՎԿ»-ի ամենամեծ` 49,84 տոկոս բաժնեմասի փայատերն է,«Գազպրոմ Արմենիային» պատկանող «Տրանսգազ» ՍՊԸ-ի տնօրենն է և այսպես շարունակ: Ասել է թե` «գազային գումարները» պտտեցվում են վարկային կազմակերպության միջոցով»: