Զինծառայողների ապահովագրական վճար տրամադրելու մասին նախագիծն ընդգրկվել է ԱԺ լիագումար նիստի օրակարգ
ԱԺ պաշտպանության և անվտանգության հարցերով մշտական հանձնաժողովում քննարկվեց Հայաստանի պաշտպանության ժամանակ զինծառայողների կյանքին կամ առողջությանը պատճառված վնասների հատուցումների համար պետական ապահովագրական վճար տրամադրելու մասին նախագիծը: Քննարկումների արդյունքում հանձնաժողովն օրենսդրական փաթեթին տվեց դրական եզրակացություն, այն կընդգրկվի ԱԺ նստաշրջանի և առաջիկա քառօրյա նիստերի օրակարգերի նախագծերում:
Հիշեցնենք, որ «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին», «Զինծառայողների և նրանց ընտանիքի անդամների սոցիալական ապահովության մասին» «Պետական կենսաթոշակների մասին» ՀՀ օրենքներում լրացումներ ու փոփոխություններ կատարելու մասին փաթեթով, որը նախօրեին հավանության է արժանացել կառավարության կողմից, առաջարկվում է անհրաժեշտ դրամական միջոցները ձևավորվել նաև յուրաքանչյուր աշխատող ֆիզիկական անձի կողմից ամսական 1000 դրամ գումարի չափով վճարվող դրոշմանիշային վճարներից:
Քննարկմանը ներկա պաշտպանության նախարար Վիգեն Սարգսյանն ասաց, որ նվազագույն աշխատավարձ ստացողների վրա չի տարածվելու, պետությունը՝ պետական սեկտորի մասով փոխհատուցում է այդ գումարն ինքը, մասնավոր սեկտորում՝ գործատուն:
Հարցին, թե՝ ի՞նչ նկատառումներից ելնելով ենք մենք նշում, որ հատուցման գումարները վճարվում են 2017 թ. հունվարի 28-ից հետո, չէ՞ որ ունեցանք քառօրյա պատերազմ, 90-ականներին մարտական գործողություններ կատարելիս զոհվել են, վիրավորվել.... պատասխանեց.
«Ինչ վերաբերում է քառօրյա պատերազմի դասերին, նաև այն զոհվածերին, հաշմանդամներին, որ ունեցել ենք 25 տարվա ընթացքում: Հատուկ շեշտեցի, որ, իհարկե, հատուկ հոգածության ուղղություն և հարց է, մենք փորձելու ենք անդրադառնալ նաև այդ խմբերին, եթե հիմնադրամը հաջողակ լինի նաև հետադարձ հայացքով այս հիմնադրամի միջոցով, առաջիկայում առնվազն գոնե նպաստների ավելացման միջոցներով:
Քառօրյա պատերազմն ու դրանից հետո ստեղծված վիճակը ևս մի բան հուշեց. երբ որ չկա նման խնդիրներ լուծելու միասնական համակարգ, մենք ունենում ենք բավականին էմոցիոնալ, որոշ առումով՝ չկանոնակարգված վիճակ:
Օրինակ՝ այն զոհվածի ընտանիքը, որը Երևանին ավելի մոտ է ապրում, տարբեր խողովակներից ավելի շատ աջակցություն է ստանում, քան նույն օրը նույն տեղում զոհվածի ընտանիքը, ով ապրում է հեռավոր շրջանում: Նույն նվիրատուներին ավելի հեշտ է Երևանի շրջակայքում տարածել իրենց գործունեությունը, քան հեռավոր մարզերում, երբեմն Ղարաբաղում:
Սա էլ պետք է հաշվի առնենք:
Մեր ցանկությունն է, որ այս հիմնադրամն այնքանով վստահելի դառնա, որ եթե նման իրավիճակներ են ծագում, որևէ մեկը կասկած չունենա, թե ինչպես պետք է փորձի ձեռք մեկնի, հասնի այն բոլոր մարդկանց, ովքեր հայտնվել են այդ պահին նման իրավիճակում:
Արդար է, որ միայն ապագա դեպքերի հանդե՞պ է: Մի կողմից շատ տրամաբանական է, որովհետև ապահովագրական քաղաքականություն է, իսկ ապահովագրությունը չի կարող հետադարձ կիրառում ունենալ, միշտ ապահովագրում ես ապագայի հնարավոր դեպքերը: Բարոյական առումով խնդիրը կա, բայց կա նաև այն, ինչ կոչվում է մուլտիպլիկատիվ էֆեկտ, որի իմաստը հետևյալն է. եթե որևէ բանում մի քայլ առաջ ես անում, ստեղծում ես ստանդարտ, որը հետագայում տարածվում է բոլոր նույն խմբին պատկանող մարդկանց վրա»,- ասաց պաշտպանության նախարարը:
Վ. Սարգսյանը մեծ հույս ունի, որ գործելու է բարոյական, քրիստոնեական ընկալումը՝ ում շատ է տրված, նրանից շատ է ակնկալվում:
«Մենք բոլոր քննադատություններն ընդունելով և հասկանալով՝ պետք է նաև արդար լինենք: Երկար տարիներ է բազմաթիվ գործարարներ, պետական պաշտոնյաներ, այդ թվում պետական պաշտոնյաներ, ում մասին որևէ մեկը չի էլ ենթադրվում, որ ինքը կարող է որևէ բանի մեջ խառնված լինել, շատ ավելի մեծ մասնակցություն են ունենում նման ծրագրերին, քան որևէ մեկը, ումից անգամ ակնկալում են: Որևէ մեկը ի ցույց չի դնում պարզ պատճառով՝ բարեգործության կարևոր սկզբունքներից մեկն է»,- ասաց պաշտպանության նախարարը:
Հարակից հրապարակումներ`
- Զինծառայողներին փոխհատուցումը ենթադրում է ապահովագրում, ոչ թե՝ բարեգործություն
- ԿԲ-ն կապահովի զինծառայողների ընտանիքներին հատուցվելիք գումարի տնօրինման թափանցիկությունը
- Կներդրվի զինծառայողների կյանքին կամ առողջությանը պատճառված վնասների հատուցման նոր համակարգ
- Վ. Սարգսյանը ՀՀ Նախագահին զեկուցել է զոհված զինծառայողների ընտանիքներին աջակցության ծրագրի մեկնարկի մասին
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ