Ձեր վստահելի աղբյուրը

Կառավարության նիստերի դահլիճում մեկնարկել է «Բարգավաճ Հայաստան» կուսակցության քաղաքական խորհուրդի նիստը: Միքայել Մելքումյանը լրագրողների հետ ճեպազրույցում հայտարարեց, որ նիստի ընթացքում քննարկվելու են ապագայի վերաբերյալ խնդիրներ:

«Դուք գիտեք, որ ապրիլին ունենք խորհրդարանական ընտրություններ, ցանկացած նիստի ընթացքում քննարկվում է հանրապետությունում ստեղծված  քաղաքական իրավիճակն ու կուսակցության անելիքները»,-ասաց նա:

Բացի արածների ու անելիքների մասին քննարկումները, ԲՀԿ-ականներն անդրադառնալու են նաև կուսակցության նախկին առաջնորդի՝ Գագիկ Ծոռուկյանի քաղաքականության վերադարձի հետ կապված խնդիրները:

«Այսինքն այն ակնկալիքները,  ցանկությունները, որոնք քաղխորհուրդը կհամարի պատեհ»,-ասաց Մելքումյանը, նշելով, որ Ծառուկյանի վերադարձի հետ կապված խնդիրներ չկան:

ԲՀԿ քաղաքական խորհրդի ընդլայնված նիստում, որին մասնակցել են ԲՀԿ քաղաքական խորհրդի անդամները, ԲՀԿ տարածքային կառույցների պատասխանատուներն ու տարածքային խորհուրդների ակտիվների ներկայացուցիչները ընդունվել հայտարարություն, որում ըստ կուսակցության մամուլի խոսնակ Վանիկ Էլիզբարյանի տարած հայտարարության, ասված է.

«ԲՀԿ քաղաքական խորհուրդը, հաշվի առնելով հանրապետության բոլոր համայնքներում և Երևանում տասնյակ հազարավոր մեր հայրենակիցների պահանջն ու ցանկությունը,
Հաշվի առնելով մեր երկրում հանրային-քաղաքական մեծ համախմբում ապահովելու անհրաժեշտությունը, որը ի զորու է իրականացնել ժողովրդի անվերապահ աջակցությունն ու վստահությունը վայելող գործիչ Գագիկ Ծառուկյանը,

Հաշվի առնելով երկրի ներքին և արտաքին լրջագույն մարտահրավերները բացառապես մեծ համախմբմամբ լուծելու հրամայականը,

Հաշվի առնելով, որ Ծառուկյանի ակտիվ քաղաքականությունից հեռանալով որևէ այլ գործիչ և քաղաքական ուժ ի զորու չեղավ լուծելու այդքան անհրաժեշտ հասարակական-քաղաքական համախմբման խնդիրը,

ԲՀԿ քաղաքական խորհուրդը, մեր տասնյակ հազարավոր քաղաքացիների անունից, դիմում է ԲՀԿ հիմնադիր նախագահ Գագիկ Ծառուկյանին՝ քննարկելու ակտիվ քաղաքականություն վերադառնալու և մեծ համախմբմամբ, միասնական ջանքով ու ժողովրդի աջակցությամբ մեր երկրի առջև ծառացած խնդիրները լուծելու հարցը»:

ԲՀԿ քաղաքական խորհրդի ընդլայնված նիստը նաև քննարկել է առաջիկա խորհրդարանական ընտրություններին ընդառաջ կուսակցության կազմակերպչական հարցերը։ Համաձայն հաստատված ժամանակացույցի՝ ԲՀԿ քաղաքական խորհրդի անդամները, ԲՀԿ խմբակցության և ԲՀԿ Երևանի ավագանու անդամները հանրապետության մարզերում և Երևանի համայնքներում կկազմակերպեն հանրային հանդիպում-քննարկումներ՝ երկրում առկա խնդիրների շուրջ հանրության տեսակետը լսելու և ԲՀԿ նախընտրական ծրագիրը ժողովրդի հետ քննարկումների արդյունքում ամբողջացնելու համար։

ԲՀԿ քաղաքական խորհրդի ընդլայնված նիստը քննարկել է առաջիկա խորհրդարանական ընտրություններին ընդառաջ նախընտրական հնարավոր դաշինքների հարցը։
Քննարկվել են նաև ռեյտինգային ընտրակարգով կուսակցական առաջադրումները։
Առաջիկա խորհրդարանական ընտրություններին ընդառաջ քննարկվել են կուսակցական-կազմակերպչական մի շարք հարցեր ևս։

ԲՀԿ նախագահ Նաիրա Զոհրաբյանը, ԲՀԿ քաղաքական խորհրդի փոխնախագահ Վարդան Վարդանյանը, ԲՀԿ քաղխորհրդի անդամներ Միքայել Մելքումյանը, Վահե Էնֆիաջյանը, Սերգեյ Բագրատյանը, ինչպես նաև կուսակցության տարածքային կառույցների պատասխանատուներ հանդես են եկել կուսակցության քաղխորհրդի և տարածքային կառույցների կատարած աշխատանքի հաշվետվությամբ և առաջարկներով։