«Ձկների որսը թույլատրելի պետք է լինի այն դեպքում, երբ դրանց արդյունագործական պաշարները հասնում են 1000 տոննայի»
«Սևանա լճում սիգի պաշարն այս տարի էականորեն չի ավելացել»,- այսօր լրագրողների հետ հանդիպմանը հայտնեց Կենդանաբանության և հիդրոէկոլոգիայի գիտական կենտրոնի տնօրեն Բարդուղ Գաբրիելյանը:
Նրա ներկայացրած տվյալների համաձայն՝ անցյալ տարի սիգի արդյունագործական պաշարը եղել է 430 տոննա, այս տարի` 450 տոննա. «Մենք կառավարությանն առաջարկել ենք ուժեղացնել սիգի որսի արգելքը, ուժեղացնել հսկողությունը ձվադրման շրջանում՝ նոյեմբերի 25-ից մինչև հունվարի 10-ը, բայց նախարարությունը որոշել է արգելք դնել դեկտեմբերի 1-ից: Արդեն ամսի 2, 3-ին ես տեսել եմ վաճառքի հանված սիգ, դա նշանակում է, որ արգելքը պատշաճ չի իրականացվում»:
Բարդուղ Գաբրիելյանի խոսքով՝ արդյունագործական նշանակության ձկան երկրորդ տեսակը կարասն է, որի պաշարները նույնպես նվազել են վերջին տարիներին. «Սրա պատճառը կրկին որսն է, ինչպես նաև մակաբույծների առկայությունը: Այս երկուսի համեմատ բարվոք վիճակում է իշխան ձկնատեսակը, սակայն քանի դեռ ձկնատեսակը չունի բնական վերարտադրություն, նրա պոպուլյացիան համարել վերականգնված չի կարելի: Իշխանը շարունակում է մնալ առանց բնական ձվադրավայրերի, քանի որ մեր գետերը չունեն համապատասխան միջավայր:Ձկների որսը թույլատրելի պետք է լինի միայն այն դեպքում, երբ դրանց արդյունագործական պաշարները կհասնեն ամենաքիչը 1000 տոննայի»:
Ինչ վերաբերում է խեցգետնի պաշարներին՝ Կենդանաբանության և հիդրոէկոլոգիայի գիտական կենտրոնի տնօրենը հայտնեց, որ այն հասել է 4,5 հազար տոննայի, որը կես տոննայով ավել է անցյալ տարվա համեմատ. «Սակայն այստեղ էլ գնալով մանրացում է նկատվում, խոշոր խեցգետիններ գրեթե չեն հանդիպում հիմա»:
Լրահոս
Տեսանյութեր
Հայաստանում փոքրահասակ բնակչության շրջանում բավականին տարածված է գժախոտով թունավորումը. Ռ. Աբովյան