Մեր բոլոր գործողությունները օրենքի շրջանակում են եղել. Բագրատ Ենգիբարյանը՝ ՎՊ-ի ստուգումների մասին
Ձեռնարկությունների Ինկուբատոր հիմնադրամի տնօրեն Բագրատ Ենգիբարյանն այսօր լրագրողների հետ հանդիպման ժամանակ անդրադառնալով Վերահսկիչ պալատի ստուգումներին՝ նշեց, որ դրանք անհիմն են, իրենց բոլոր գործողությունները օրենքի շրջանակում են եղել և ակնկալում է, որ ճիշտ, արդար որոշում կկայացվի:
Նշենք, որ ՀՀ գլխավոր դատախազության պետական շահերի պաշտպանության վարչության կողմից ՀՀ վերահսկիչ պալատի 2016թ. ընթացիկ հաշվետվության ուսումնասիրությամբ պարզվել է, որ «Ձեռնարկությունների ինկուբատոր» հիմնադրամի ծառայողների կողմից հիմնադրամի գույքի կառավարման, պետական միջոցների տնօրինման գործընթացներում թույլ են տրվել խախտումներ և չարաշահումներ, որոնք առաջացրել են ծանր հետևանքներ: Քրեական գործի նախաքննությունն իրականացնում է ՀՀ քննչական կոմիտեին:
Վերահսկիչ պալատը Ձեռնարկությունների ինկուբատոր հիմնադրամում հիմնականում 3 ուղղություններով՝ «Սորսիո» կազմակերպության բաժնեմասը 20% հավելումով վաճառելու, կազմակերպության կողմից աշխատակիցներին տրվող փոխառությունների և Գյումրիի տեխնոլոգիական կենտրոնի գործունեության հետ կապված, չարաշահումներ ու թերացումներ էր հայտնաբերել։
Բագրատ Ենգիբարյանի խոսքերով՝ այս ամենը շատ լուրջ հարված է Հայաստանի տեղեկատվական տեխնոլոգիաների դաշտին ու երկրի միջազգային վարկանիշին։ «Նմանատիպ ազդակները վատ են անդրադառնում հայկական ՏՏ-ի զարգացման և միջազգային հեղինակության վրա: Ինձ համար անհասկանալի է և անկեղծ ասած, միտում ենք տեսնում, քանի որ ընտրել են մի կազմակերպություն, որը բավականին մեծ ազդեցություն ունի ոլորտի զարգացման վրա, ընտրել են այն ծրագրերը, որոնք լուրջ հաջողություններ ունեն: Եւ հիմա առանց քննարկման, դրանց վերաբերյալ փորձել են ինչ-որ նյութ պատրաստել՝ վնաս հասցնելով ոչ միայն ՁԻՀ-ին, այլև ՏՏ ոլորտին»,- ասաց Բագրատ Ենգիբարյանը:
Նա նշեց, որ այս ամենը պետք է թափանցիկ լուսաբանվի, քանի որ այստեղ մեկ կամ երկու թերացման մասին չեն խոսում, այլ խոսում են իմիջի վնասի մասին: «Եթե նայենք, ապա հարյուրավոր ծրագրերից ընտրված են լավագույն հաջողված ծրագրերը: Նախ չհասկացանք, թե ստուգումն ինչից սկսվեց, քանի որ մեր նման կառույցին կարող են միայն անուղղակի ստուգել, բայց մենք բաց ենք և դեմ չենք ստուգմանը: Դրանից հետո տեսանք եզրակացությունը և ակնկալում էինք, որ կլինի քննարկում: Եթե իրականում խնդիրներ կան, ճիշտ ենք համարում, որ դրանք քննարկենք, որպեսզի հետագայում դրանք չկրկնվեն, սակայն որևէ քննարկում չեղավ: Դրա համար մենք պետք է այս հարցում հասնենք արդարադատության հաստատմանը և ապացուցենք, որ մեր երկրում հնարավոր է ճիշտ արդարադատություն»,- ընդգծեց Բագրատ Ենգիբարյանը:
Նրա խոսքերով՝ այսօր հասել են այնպիսի հաջողությունների, որ նույնիսկ հարևան երկրներն են երազում նմանատիպ կենտրոններ ունենալ, ուստի «թևերը կոտրելով ոչինչ չեն փոխի»: «Իհարկե, այս վիճակն էլ կյանքի որոշակի մի պահ է, որ պետք է լցվենք համբերությամբ և հաղթահարենք այդ ամենը: Կրկնում եմ՝ մեր հիմնական մտահոգությունը միայն այն է, որ այդ ամենը շատ լուրջ հարված է Հայաստանի ՏՏ ոլորտին: Նման հարցերում պետք է բավականին զգույշ լինենք, քանի որ գործ ունենք ներդրումների և երկրի վարկանիշի ձևավորման հետ։ Արդեն որոշ ծրագրեր մեզ խնդրել են ժամանակավորապես դադար տալ»,- ասաց Բագրատ Ենգիբարյանը:
Նա նաև նշեց, որ Վերահսկիչ պալատի եզրակացության վերաբերյալ իրենք մանրամասն ներկայացրել են իրենց դիտողությունները: