Ձեր վստահելի աղբյուրը

«Գևորգ Սաֆարյանը ընդդիմադիր քաղաքական գործիչ է և նրա վերջին տարիների գործունեությունն ուղղված է եղել իշխանություններին պաշտոնանկ անելուն: Եվ փաստորեն մենք գործ ունենք ընդդիմադիր գործչի հետ», -այսօր Կենտրոն և Նորք Մարաշ վարչական շրջանների ընդհանուր իրավասության դատարանում «տոնածառի գործով» դատական իստում իր պաշտպանական ճառում հայտարարեց Սաֆարյանի փաստաբան Տիգրան Հայրապետյանը:

Նկատենք, որ 2015-ի ամանորի գիշերը «Հիմնադիր խորհրդարանի» անդամները հայտարարել էին, որ դիմավորելու են Ազատության հրապարակում, և Գևորգ Սաֆարյանը փորձել էր փոքրիկ արհեստական տոնածառ տեղադրել, բայց ոստիկանները թույլ չէին տվել: Նրան մեղադրում են այդ գիշերը ոստիկանների նկատմամբ ոչ վտանգավորչ բռնություն գործադրելու համար:

Նա դատարանին տեղեկացրեց, որ Սաֆարյանի նկատմամբ մահափորձ է կատարվել, բութ գործիքով գիշերվա ժամին հարձակվել են նրա վրա, սակայն այդպես էլ որևէ լուծում չի ստացել հարուցված քրեական գործը, հանցագործները պատասխանատվության չեն ենթարկվել:

Փաստաբան Հայրապետյանն իր ճառում կարևորեց Սաֆարյանի՝ քաղաքականությամբ զբաղվելու հանգամանքը և դա չկարևորելու դեպքում արդար դատական ակտ չի կայացվի:

«Սաֆարյանը վերջին 5 տարիները բացառապես զբաղվել է քաղաքական, հասարակական գործունեությամբ և ոչ մի տեղ չի աշխատել: Կազմակերպել է հանրահավաքներ: Այսինքն՝ միենք գործ ունենք մի անձի հետ, որը ոչ թե պատահականությունների զուգորդմամբ միջադեպի է ականատես եղել, այլ մենք գործ ունենք քաղաքական, հասարակական գործչի հետ, և միջադեպն էլ կատարվել է այդ ժամանակ», -հավելեց Հայրապետյանը:

«Տոնածառի գործով» տուժող ճանաչված ոստիկաններից Գեղամ Խաչատրյանը, ըստ փաստաբանի, դեպքից մի քանի օր առաջ ընդգծված ատելություն պարունակող հայհոյանքներ է տեղադրել իր ֆեյսբուքյան էջում:

«Այսինքն ոստիկանության գումարտակի հրամանատարը, որը պետք է հասարակական կարգը պահպաներ, նման հայհոյանքներ է գրում իր ֆեյսբուքյան էջում: Հետագայում նա հայտարարեց, որ դա իր անձնական կարծիքն է և ոչ թե ոստիկանության: Հետաքրքիր է, եթե նա նման հայհոյանքներ է գրում իր ֆեյսբուքյան էջում, արդյոք փոխվո՞ւմ է իր վերաբերմունքը երբ ոստիկանի համազգեստ է հագնում», -նկատեց պաշտպանը:

Հայրապետյանը դատարանին հիշեցրեց ոստիկան Խաչատրյանի մեկ այլ գրառում ևս, թե երբ հայ ազգը ամանորի գիշերը տոնում է, ուրախանում, «մենք գնում ենք Ազատության հրապարակում զվռնող կապիկներին քշենք այնտեղից»:

«Գեղամ Խաչատրյանը դատարանում հայտարարեց, որ դեպքի օրը ամեն մի հայհոյանքին ինքը պատասխանել է եռապատիկ հայհոյանքով: Հարգելի դատարան, կարծում եմ սա այս գործի համար մեծ նշանակություն ունեցող հանգամանք է: Ստացվում է, որ ՀՀ ոստիկանության ծառայողի պարտականությունն այն է, որ ամանորի գիշերը պետք է հայհոյանքներ ուղղի Հայաստանի Հանրապետության քաղաքացիներին: Ավելին, տեսանյութում տեսանք, որ Գևորգ Սաֆարյանի կողքին կային կանայք ու աղջիկներ: Այսինքն՝ ստացվում է, որ ոստիկանը սարսափելի հայհոյանքներով պատասխանում է Սաֆարյանին, որի շրջապատում կային կանայք ու աղջիկներ», -հայտարարեց փաստաբանը՝ նկատելով, որ դատարանը պետք է գնահատական տա ոստիկանի նման վարքագծին:

Ի դեպ, փաստաբանը դատարանում հայտարարեց, որ պետք չէ արժանահավատ համարել ոստիկան Գեղամ Խաչատրյանի ցուցմունքները:

Մեղադրանքը պաշտպանող դատախազի հայտարարություններին, թե ոստիկանները դիմել են այդ քայլին ինքնապաշտպանվելու հանգամանքից ելնելով, այսօր Հայրապետյանը հակադարձեց՝ ասելով, թե որևէ քաղաքացի ոստիկաններին ոչինչ չի ասել, ոչ մի բռնություն նրանց նկատմամբ չեն գործադրել:

Փաստաբանը ավարտելով ճառը, հայտարարեց, որ Գևորգ Սաֆարյանի նկատմամբ մեղադրանքն առաջադրվել է քանի որ նա ընդդիմադիր է և ընդդիմադիր հայացքների համար է հունվարի 1-ից մինչ այժմ ազատազրկման մեջ գտնվում:

«Ուզում եմ ասել, որ ես հավատում եմ, որ դուք կկարողանաք այս ակնհայտ անարդարությունը մեկնաբանել ու հասցնել այն բոլոր անձանց, ովքեր խառնված են Սաֆարյանի անազատության գործին, որպեսզի արդար դատական ակտ կայացվի և Գևորգ Սաֆարյանը դատարանի դատավճռով արդարացվի», -դիմելով նիստը նախագահող դատավոր Մնացական Մարտիրոսյանին, հայտարարեց փաստաբանը:

Իր ճառը ներկայացնելու համար ժամանակ խնդրեց Գևորգ Սաֆարյանը, և կողմերի համաձայնությամբ դատական նիստը հետաձգվեց մինչև հունվարի 16-ը:

Հիշեցնենք՝ այս գործով մեղադրողը նաորդ դատական նիստում միջնորդել էր 2,5 տարվա ազատազրկման դատապարտել Գևորգ Սաֆարյանին: