Ձեր վստահելի աղբյուրը

Յուրաքանչյուր երեխայի ծնունդ մեծ երջանկություն է ծնողների համար, բայց երբ ընտանիքը համալրվում է ոչ թե մեկ, այլ միանգամից չորս երեխաներով, երջանկությունը քառապատկվում է: Ամիսներ առաջ Երևանում քառյակի լույս աշխարհ գալու մասին լուրն անտարբեր չթողեց և ոչ մեկին, լրատվամիջոցների գլխավոր լուրերը նրանց մասին էին: Քառյակի ծնունդը բժիշկները հրաշք են համարում, քանի որ բնական ճանապարհով` ոչ արհեստական բեղմնավորմամբ, քառյակ լույս աշխարհ բերելը բացառիկ երևույթ է համարվում:

Երեխաների մայրը 27 տարեկան է, սա նրա երկրորդ հղիությունն էր: Ավագ դուստրը` Աշխենը  4 տարեկան է:
Մայիսը, Նարեկը, Դայանան և Մանանան Թունյաններին աշխարհի ամենաերջանիկ ծնողներն են դարձրել:  «Երբ մտնում եմ սենյակ ու տեսնում չորս ձագուկներիս, աչքերս երջանկությունից լցվում են; Անբացատրելի զգացողություն է, մեկ-մեկ չեմ հավատում, որ այդ հրաշքն ինձ հետ է կատարվել»,- Panorama.am-ի թղթակցի հետ զրույցում ասում է քառյակի մայրը՝ Մարիամ Թունյանը: 

Երիտասարդ մայրը մեծ ոգևորությամբ պատմեց հինգ  զավակների և իր երջանիկ ընտանիքի մասին:
Նրա խոսքերով՝ երկրորդ հղիությունից հետո առաջին հետազոտությունն իրեն անակնկալի է բերել, ուլտրաձայնային հետազոտությունից հետո իմացել է,որ երկվորյակ է ունենալու: Ավելի ուշ հաստատվել է, որ իրականում նրա սրտի տակ երկու զույգ երկվորյակներ են: «Մինչև ամուսնանալս միշտ մտածում էի, որ զույգ երեխաներ եմ ունենալու, որ իրար շատ նման են լինելու, բայց երբեք չէի պատկերացնի, որ քառյակ կունենամ: Իսկապես հրաշք է»,- ասում է բազմազավակ մայրիկը: 

Մարիամին օգնում են ամուսինը, սկեսուրը, մայրը, քույրերը, ինչպես նաև 4-ամյա Աշխենը: Ի տարբերություն շատ երեխաների՝ նա չի խանդում փոքրիկներին, հակառակը, հաճույքով օգնում է խնամել նրանց. «Երեխաների հագուստները դասավորում է, լողացնելուց օգնում է: Երբ երեխաներին սիրում եմ, սկսում է իմ խոսքերը կրկնել: Մենք փորձում ենք անել հնարավորինս, որ աղջիկս իրեն մենակ չզգա, ուշադրության կենտրոնում ոչ միայն փոքրերն են, այլև Աշխենը: Ծանրաբեռնված գրաֆիկիս միևնույն է ժամանակ եմ գտնում իր հետ զբաղվել, խաղալ»:

Սկզբնական շրջանում Մարիամը գրաֆիկ է կազմել, նշել է երեխաների կերակրման ժամերը, օրվա անելիքները, բայց այժմ այդ ամենն առանց ցուցակի է անում: «Հանգիստ երեխաներ են, սկզբից հատկապես դժվար էր նրանց լողացնելը, բայց հիմա շատ արագ լողացնում եմ»,- նշում է նա:

Երեխաներն արհեստական կաթ են ուտում. «Բժիշկն ասաց, որ մեկին կարող եմ կերակրել, բայց սիրտս չտարավ՝ մեկին կերակրել, իսկ երեքին՝ ոչ: Դրա համար բոլորին արհեստական կեր եմ տալիս: Նորմալ  մեծանում են, ամեն ինչ շատ լավ է, փառք Աստծո, ամեն ինչ իր հունով գնում է»: Նրա խոսքերով՝  այն ընկերությունը, որից կաթնախառնուրդ են գնում, իրենց համար զեղչեր են անում, իսկ մեկ երեխայի համար տրամադրում են անվճար: Տակդիրները նույնպես զեղչով են գնում:

Մարիամը խոստովանում է, որ դժվարություններ կան, բայց ընտանիքը փորձում է ամեն ինչ հասցնել: «Որ գիտես քո ցանած պտուղներն ավելի քաղցր են լինելու, այդ դժվարությունները դառնում են հաղթահարելի»,- նշում է Մարիամ Թունյանը: 

Քառյակի լույս աշխարհ գալուց կարճ ժամանակ անց լրատվամիջոցներում լուրեր տարածվեցին, որ ընտանիքին, իբր, բնակարան են նվիրել: Մինչդեռ այդ լուրերն իրականությանը չեն համապատասխանում: Մարիամի խոսքերով՝  ոչ մի օգնություն պետությունից կամ պաշտոնյաներից չեն ստացել: «Երբ հիվանդանոցում էի, ծանոթներս զանգում էին ու շնորհավորում, թե  որպես օգնություն  մեզ  բնակարան են տվել, բայց նման բան չկա, իսկ եթե տրամադրեին էլ, ապա դա ոչ թե օգնություն էր լինելու, այլ  պետության կողմից նվեր իմ քառյակին, քանի որ բացառիկ դեպք է, երբ Հայաստանում քառյակ է ծնվում: Մեր երկրում 10 տարի առաջ է քառյակ ծնվել»,- ասում է բազմազավակ մայրը:

Մարիամին և քառյակին նվերներ են մատուցել միայն Կաթողիկոսը, նաև անհատ անձինք. Կիպրոսից մի կին փոքրիկ գումար է ուղարկել, ԱՄՆ-ից էլ ստացել է 400 դոլար, աջակցել է նաև Գորիսի քաղաքապետարանը: «Երեխաների ծնվելուց հետո հիվանդանոց  եկավ Գարեգին 2-րդ կաթողիկոսը, և երխաներիս գումար, հագուստ, Ավետարան, ինչպես նաև օրհնված խաչեր նվիրեց»,- պատմում է նա:

Ամանորն ու Մարիամի բարեմաղթանքը

Թունյանների ընտանիքում արդեն տոնական տրամադրություն է: Տոնածառը զարդարել են, երեխաների սենյակները՝ նույնպես:

Տանտիկներն էլ ամանորյա եռուզեռի մեջ են: Չնայած ծանրաբեռնվածությանը, ամեն ինչ տան են պատրաստելու: «Քիչ-քիչ ամեն ինչ կանենք»,- ժպտալով ասում է Մարիամը: 

Քառյակի մայրը միայն մեկ ցանկություն ունի՝ երեխաներն առողջ լինեն, իսկ դժվարությունները կհաղթահարեն: «Բոլոր կանանց էլ մաղթում եմ, որ իրենք էլ ունենան այն զգացողությունը, ինչը ես ունեմ: Թող Աստծո կամոք բոլորի օջախներում մտնի այս անբացատրելի ուրախությունը, որն այսօր մեր տանն է: Բոլոր կանայք լսեն մայրը բառը, թող բոլոր երեխաներն իրենց մայրերի հետ լինեն: Ինչպես ես եմ այս ամենը համարում հաճելի դժվարություններ, թող բոլոր մայրերի դժվարությունները իրենց երեխաներին խնամելը լինի: Անքնությունը, հոգնածությունը հաճելի է, կարևորը՝ գիտեմ, որ ես շրջապատված եմ հրաշքներով, ունեմ մեծ ընտանիք»,- ասում է Մարիամ Թունյանը:

Լուսանկարները՝ Մարիամ Թունյանի անձնական արխիվից: