Ձեր վստահելի աղբյուրը

Հացի շուկայում Սննդամթերքի անվտանգության ծառայության կողմից իրականացրած վերահսկողական գործողությունների իրականացումը  «Իրազեկ և պաշտպանված սպառող» ՀԿ նախագահ Բաբկեն Պիպոյանը որպես դրական քայլ է գնահատում, սակայն համարում է նաև, որ ծառայությունը սխալ ուղղությամբ է սկսել:

«Այն, որ որոշել են վերջապես ստուգումներ իրականացնել՝ լավ է: Այն, որ ցանկություն կա՝ դա էլ է լավ: Բայց, ցավոք սրտի, չգիտեն՝ ինչն է պետք ստուգել և ինչպես: Կարևոր է, որ ոլորտը տանեն ինքնակարգավորման, որպեսզի սպառողը լինի պաշտպանված, իսկ տնտեսությունը տուժի մաքսիմալ քիչ: Իրենք անում են հակառակը՝ տնտեսությունը տուժում է մաքսիմալ շատ, սպառողը չի շահում»,-Panorama.am-ին  ասաց ՀԿ նախագահը:

Պիպոյանն ասում է՝ ինքը կարող է ՍԱՊԾ հրապարակած լուսանկարներում պատկերված արտադրություններից հաց գնել և ուտել: Այդ պայմաններում արտադված հացը, ըստ նրա, կարող է լինել անվտանգ:

«Հացամթերքի շուկան այն ոլորտն է, որտեղ արտադրության սանիտարական պայմանները մնացած ճանապարհի համեմատ երկրորդական են: Հացի մեջ մանրէաբանությունը չի ստուգվում, որովհետև ռիսկային չէ: Ջերմային մշակման պարագայում մանրէաբանական աղտոտվածությունը վերանում է»,-ասաց նա:

Սպառողների իրավունքների պաշտպանությամբ զբաղվող մասնագետի խոսքով, այս պարագայում կարևոր էր սկսել իրացման ցանցերից  ու գնալ դեպի արտադրություն:

«Խնդիրն ավելի շատ արտադրությունից դեպի իրացման ցանց տեղափոխման ընթացքում է: Սանիտարական նորմալ, մաքուր պայմաններում արտադրված հացը դրեցին բանանի արկղի մեջ, տեղափոխեցին, արդեն խնդիր է: Հացը կրծքին դրած տեղափոխեցին, դրեցին կեղտոտ բեռնախցիկում, խնդիր է: Շատ ցավալի է, որ լիազոր մարմինը չի տարբերում ռիսկը վտանգից, որովհետև այդտեղ կան վտանգի աղբյուրներ, բայց բուն սանիտարական վիճակի ռիսկը բավականին ցածր է: Եթե համեմատենք այլ ոլորտներում առկա ռիսկերի հետ, այդ թվում նույն հացամթերքի շուկայի իրական ռիսկերի հետ, այն ինչի մասին խոսել է ՍԱՊԾ-ն, ռիսկի հետ որևէ կապ չունի: Հացի ռիսկն է հացի բաղադրությունը, խոնավությունը, տեղափոխման պայմանը: Մնացածը հնարավոր վտանգներն են»,-ասաց նա:

Պիպոյանի խոսքով, ճիշտ կլիներ, եթե խոշոր ու միջին իրացման ցանցերի առաջ խնդիր դրվեր՝ պետք է հաց ստանալ միայն  ընկերություններից, որոնք ապահովում են տեղափոխման ու համապատասխան ուղեկցող փաստաթղթերի պայմանները:

Անդրադառնալով արտադրական պրոցեսը կասեցրած ընկերությունների՝ հրապարակած ցանկին, ՀԿ նախագահն ընդգծեց՝  այնտեղ որևէ խոշոր ընկերության անուն չկա:

«Փոքր բիզնեսին  նեղացնելու դարաշարջա՞ն է եկել: Երբ մենք խոսում ենք ռիսկից, ապա ռիսկն այնտեղ է, որտեղ ազգաբնակչության սպառման հիմնական ծավալն է, որովհետև փոքր տնտեսվարողի պարագայում վտանգը կարող է մեծ լինել, բայց հանրային առողջապահության առումով կարևոր է լայն սպառում ապահովող տնտեսարողների ստուգումը: Իրավունք չկա, մեծ մասին գնահատական չունենալով գնալ դեպի փոքր բիզնես»,-ասաց նա»,-ասաց նա:

Նա մատնացույց է անում ՀԿ-ի կողմից ուսումնասիրությունների մեթոդաբանությունը, երբ ստւգվել էր կաթնամթերք արտադրող ութ ընկերություն, որոնք ապահովում են բնակչության կողմից սպառման 90 տոկոսը:

«Եթե 90 տոկոսի մասին գնահատական չկա, էն 10 տոկոսի մասին ինչ թվեր են նկարած, որպես սպառող ու նրանց իրավունքների պաշտպանությամբ զբաղվող, ինձ հետաքրքի չէ: Նկարչությունը վիճակագիրների գործն է, իսկ սննդի անվտանգությունով պետք է զբաղվեն այն մարդիկ, ովքեր գիտեն, թե ինչ է առողջապահությունը, եթե չգիտեն, այդ պարագայում ստիպված են զբաղվել վիճակագրական-նկարչական աշխատանքներով»,-կարծիք հայտնեց նա:

Հիշեցնենք, որ ՍԱՊԾ-ն վերահսկողություն է իրականացրել մայրաքաղաքում և մարզերում հաց արտադրող 24 տնտեսավարող սուբյեկտների մոտ և ամփոփել գործողությունների արդյունքները: Արդյունքում՝ արտադրողների մեծ մասի մոտ արձանագրվել են սննդամթերքի անվտանգության ոլորտը կարգավորող իրավական ակտերի պահանջների անհամապատասխանություններ ինչպես հիգիենայի նորմերին, այնպես էլ սննդամթերքի մակնշմանը, արտադրության կազմակերպմանը, տեղափոխմանը և փաստաթղթավորմանը ներկայացվող պահանջների խախտումներ: Հայտնաբերվել են նաև դեպքեր, երբ աշխատակիցները չեն անցել պարտադիր նախնական և պարբերական բժշկական զննություն: