Ձեր վստահելի աղբյուրը

Մենք ունենք հիմնավոր կասկածներ, որ նախընտրական շտաբներըը ընտրությունների օրը ղեկավարում են քաղաքացիների ուղղորդված հոսքը դեպի ընտրատեղամասեր։ Այդ մասին այսօր ոստիկանությունում «Ընտրությունների ժամանակ ոստիկանության գործողությունների ուղեցույցի» նախագծի քննարկման ժամանակ ոստիկանության ներկայացուցիչներին փոխանցեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը։

Նրա կարծիքով, այդ օրը ոստիկանության օպերատիվ շտաբի հիմնական թիրախը պետք է լինեն նախընտրական շտաբները։ Նա հորդորեց ուղեցույցով նաև հստակեցնել քվեարկությունից մեկ օր առաջ՝ լռության օրը ինչ անելիքներ ունի ոստիկանությունը։

Սաքունցը նաև խնդրեց հստակեցնել, թե եթե ընտրատեղամասում 15 հոգուց ավել անձ կա, ովքեր վերահսկում են ընտրական գործընթացը, ինչպե՞ս է ոստիկանությունը ընտրատեղամասից հանելու 16-րդին։

«Ոստիկանությունն այդ պարագայում ի՞նչ պետք է անի, վարչական որոշո՞ւմ է կայացվելու, թե՞ այլ բան է արվելու։ Պետք է հնարավորինս օրինական լինեն հիմքերը գործողությունների», -ասաց Սաքունցը։

Ոստիկանության շտաբի պետ Հովհաննես Քոչարյանը արձագանքելով Սաքունցի հորդորին, ասաց, որ համաձայն է նրա հետ, և ուղեցույցում կնկարագրվեն ոստիկանության հարկադրանքի ձևերը։

«Մենք ընդունում ենք դիտողությունը և պետք է նկատել, որ այո, ոստիկանության հարկադրանք կիրառելու կարգը բաց է մնացել ուղեցույցում։ Ոստիկանության անելիքները պետք է անպայման նկարագրվեն, ինչը անպայման կանենք», -արձագանքեց Քոչարյանը։

Նաև ասաց, որ ընդունելի է համարում այն դիտարկումը, որ պետք է մանրամասնել ոստիկանության օպերատիվ շտաբի գործողությունները։

Անդրադառնալով ընտրակաշառքի դեպքերի մասին մտահոգություններին, Քոչարյանն ասաց, որ նման դեպքերը հնարավոր է կանխարգելել բացառապես հնարության աջակցությամբ։

«Հակառակ պարագայում ընտրակաշառքների դեպքերի բացահայտման աճ չի գրանցվելու որքան էլ ոստիկանությունը թիվ մեկ իրավապահն է ընտրությունների ընթացքում, այնուամենայնիվ, այս հանցագործությունն ունի առանձնահատկություններ։ Դա լատենտային հանցագործություն է և թող տպավորություն չստեղծվի, թե ընտրակաշառքը բաժանելու են մարշուտնիների մեջ, հրապարակային», -հայտարարեց Քոչարյանը՝ հորդորելով հանրությանը աջակցել իրենց, բացահայտել ընտրակաշառք տվողներին։

Նա այն կարծիքին է, որ միշտ չէ, որ ընտրողներին ընտրատեղամաս ուղեկցելը պարունակում է հակաիրավական տարրեր. «Այդ դեպքերը որքան էլ աչքի համար նեգատիվ արարքներ են, բայց քրեորեն պատժելի չեն։ Ընտրողներին կազմակերպված դեպի ընտրատեղամասեր ուղղորդելը կարող է բոլորովին էլ հակաիրավական բովանդակություն չունենա»։

Քոչարյանը նկատեց, որ այդ մասին շատ ապացույցներ կարող են լինել, սակայն ոստիկանությունը չի կարող միջամտել, որովհետև օրենքը չի արգելում քաղաքացուն ընտրատեղամաս ուղեկցելը։

Սաքունցն ի պատասխան արձագանքեց, որ խնդիր է առաջանում, երբ ուղևորափոխադրում իրականացնող բիզնեսի տերը իր փոխադրամիջոցը տրամադրում է մարդկանց ընտրատեղամաս փոխադրելուն։

«Այդտեղ կա խնդիր։ Սիրուն աչքերի համար է՞ մտահոգված մարդկանց տեղափոխել։ Խոսքը վերաբերում է ընտրողի կամքի ազատ արտահայտմանը, երբ ընտրողն իր կամքով տնից դուրս է գալիս ու գնում քվեարկության», -նկատեց իրավապաշտպանը։

Արձագանքելով Սաքունցին, Քոչարյանն ընդունեց, որ խնդիր կա, սակայն հորդորեց ծայրահեղությունների մեջ չընկնել, քանզի դա էլ ուրիշ խնդիր է։ «Խնդրում եմ մի բան հաշվի առեք՝ քրեորեն արգելված արարքներն են մեր թիրախը։ Երբեք որևէ ընտրողի նրա կամքի վրա բռնանալով ընտրատեղամաս չեն բերի։ Եթե ընտրողն եկել է ընտրատեղամաս, ուրեմն դա նրա ցանկությունն է», -հավելեց Քոչարյանը։

Դիտարկմանը, թե ընտրակաշառք է վերցրել, եկել է քվեարկության, ոստիկանության պաշտոնյան վրդովված նկատեց. «Ընտրակաշառք վերցնողից էլ ի՞նչ եք ուզում։ Եթե նա արդեն վաճառել է իրեն, պարզ է՝ ինչ վարք է դրսևորելու»։